Sian Northey

All posts tagged Sian Northey

Diwrnod y llyfr

Published Mawrth 11, 2019 by gwanas

Mi ges i ddau gyfle i ddathlu diwrnod y llyfr! Yn gyntaf, ar ddydd Gŵyl Dewi, ges i wahoddiad i Lyfrgell Dolgellau i ddarllen darnau o stori Cadi a’r Deinosoriaid a rhannu ambell boster. Mi wnes i wrthod taith i Sierra Leone er mwyn bod yn y llyfrgell (wir yr), ond peidiwch â deud hynny wrthyn nhw. Nhw oedd wedi gofyn gynta, wedi’r cwbl.

IMG_0019

Andros o hwyl! Fyddai Sierra Leone ddim wedi gallu cymharu. A gwneud lluniau a chrefftau deinosoraidd a Dydd Gŵyl Dewi-aidd wedyn:

IMG_0030

Yr unig ddarn anodd o’r diwrnod oedd trio penderfynu pwy oedd yn haeddu gwobr am y wisg orau. Pawb mor dda a’r holl lygaid mawr yn syllu i fyw fy llygaid a minnau’n chwysu, ddim isio pechu neb…

IMG_0028

Bu’n rhaid i mi ddewis goreuon y gwisgoedd eto ar Fawrth y 7fed yn Ysgol Llanfechell, Ynys Môn. A sbiwch anodd oedd hynny!

_105929376_llun-o-bawb
_105929378_efaacelsa-loli

A dim ond y plant bach oedd hynna!

Un o fy ffefrynnau ymysg y rhai hŷn, wrth reswm, oedd hon:

D1EZFsBW0AEQUQA

Dyna sut i blesio awdur! Wedi astudio’r clawr yn fanwl, ylwch:

51xLV3OPoLL._SX322_BO1,204,203,200_

O, ac mae Ysgol Gyfun Gwent Is Coed yng Nghasnewydd wedi plesio’n arw hefyd – sbiwch!

D1D9n82XQAA16ih

Dim ond gobeithio eu bod nhw wedi mwynhau’r darllen ynde. Gyda llaw, dwi’n clywed bod ‘na ambell ymgom Bl 7-9 arbennig wedi bod yn eiteddfodau lleol yr Urdd (Y Gwylliaid ydi’r testun) a dwi’n edrych mlaen yn arw i’w gweld a’u clywed yn y Genedlaethol fis Mai!

Ond yn ôl i ben arall y wlad, i Fôn: mi ges i fodd i fyw yn Llanfechell, unwaith i mi ddod o hyd i’r lle. Eitha anodd – yn enwedig yn y gwynt a’r glaw.

20190307_144134

Ond roedd o werth o.

Doedd fy wythnos greadigol ddim ar ben: ro’n i’n tiwtora yn Nhŷ Newydd ar y dydd Sadwrn – a’r cwrs yn llawn o bobl oedd â diddordeb mewn sgwennu ar gyfer plant a/neu bobl ifanc.

20190309_123927

Ac un peth gafodd ei drafod bod gormod o lyfrau Cymraeg gwreiddiol yn rhy ‘neis’ a dim digon o rechen/cnecian/pwmpio a phethau felly.

20190301_124146

Roedd ‘na syniadau gwych gan y criw yma!

A sôn am sgwennu a syniadau gwych, dyma lyfr i’ch rhieni/nain/taid/modryb/ athrawon. Nofel ddiweddara Sian Northey. Wrth fy modd efo hi!

20190302_190611

Advertisements

Diarhebion

Published Ebrill 14, 2018 by gwanas

image

image

Dyma i chi lyfr difyr arall gan Sian Northey a Gwasg Carreg Gwalch. Dilyniant i Dros Ben Llestri! a Dim Gobaith Caneri. 66 dihareb sydd dan sylw y tro yma, ac mae Sian wedi sgwennu stori fach sy’n eich helpu i ddeall pob un, gyda lluniau gan Siôn Morris. ee:

image

Merch o’r enw Bethan sy’n caru llyfrau… byd bach ‘de?

Hon ydi fy hoff stori i – mi wnaeth i mi chwerthin, rhaid i mi ddeud!

image

Mae rhai o’r diarhebion yn gyfarwydd, ac erail yn gwbl ddiarth i mi – ond dwi am eu defnyddio o hyn ymlaen. A dwi wedi dysgu gair newydd: goganu!

image

Dal ddim yn deall?! Yn ôl Geiriadur y Brifysgol: Dychanu, canu dychan, gwawdio, gwatwar, difrïo, difenwi, absennu.
to satirize, lampoon, mock, deride, revile, disparage, dispraise, defame. 

Dwi am ddefnyddio goganu hynny fedra i rŵan – mae’n chwip o air – a chwip o ddihareb. A chwip o lyfr defnyddiol, addysgiadol.

Da iawn unwaith eto Sian Northey! O, ac mi wnes i ei gweld hi yn y Ffair Lyfrau yn Llundain – dyma ni efo Dr Siwan Rosser (sy’n gwybod bob dim sydd i’w wybod am lyfrau plant o Gymru)

DakowMCX0AA3dV7

A dyma Siwan a minnau ac awduron eraill o Gymru (Eloise Williams a Catherine Fisher) yn barod i drafod hud a lledrith mewn llyfrau plant o Gymru:

DarXd0kWkAA5YbZ

Chwilio am glawr un o fy llyfrau i ar fy ffôn ro’n i… cyfle gwych i’w dangos i gynulleidfa gwbl newydd a wnes i’m meddwl dod â chopiau efo fi. Dyyyy. Ond mi wnes i sôn am Ramboy, fy nghyfieithiad o Pen Dafad ac mae o leia un ddynes wedi archebu copi o’r herwydd!

9780862439934

Ond mi fydd na copiau o fy llyfrau yn bendant ar gael yng Nghaerdydd ddiwedd y mis! Bellach yn ei 6ed blwyddyn, mae Gŵyl Llên Plant Caerdydd yn para dros ddau benwythnos ym mis Ebrill ac yn cynnwys mwy na 40 o ddigwyddiadau. Ewch draw i (link: http://www.gwylllenplantcaerdydd.com) gwylllenplantcaerdydd.com i archebu’ch tocynnau heddiw!

A dyma i chi un digwyddiad:

DafDzw1W0AAfUbz

Plis dowch draw. Dowch â rhiant/nain/taid/modryb/ewyrth/brawd/chwaer efo chi!

Published Ionawr 4, 2018 by gwanas

Dyma lun ddaeth y bardd a’r awdur Sian Northey o hyd iddi ar dudalen Facebook British Medieval History. Ia, llun Nadolig, ond un o’r 15fed ganrif, a sbiwch pwy sy’n darllen yn y gwely tra mae Joseff yn magu’r baban!

26113774_10155773214466839_3461916812306690953_n

Da! Neis won Mair (a’r artist).

Yn y gwely fydda i’n darllen fel arfer hefyd, a llyfr i blant ddarllenais i dros y Nadolig ydi hwn:

pax-book-movie

Pax gan Sara Pennypacker, awdures o America. Mae’n nofel brydferth, wahanol, fachodd fi o’r dechrau hyd y diwedd. Llwynog ydi Pax, wedi ei fagu gan Peter ers yn ifanc, ond un diwrnod, maen nhw’n cael eu gwahanu. Ond mae Peter yn benderfynol o achub Pax yn ac yn cychwyn cerdded i chwilio amdano. Yn y cyfamser, rydan ni’n dilyn hanes Pax ei hun yn ceisio deall be sydd wedi digwydd a sut i ymdopi mewn coedwig ar ei ben ei hun. Mae ‘na ryfel yn digwydd, neb yn ymddiried yn neb, ac mae’r byd yn le peryglus, ac ro’n i’n gweddio y byddai’r ddau yn dod drwyddi ac yn dod o hyd i’w gilydd eto. Mae hi am gariad, ffyddlondeb, ffydd – a llwynogod. Hollol, gwbl hyfryd – a lluniau gwych hefyd.

0214-BKS-Rundell-facebookJumbo-v2

Roedd un adolygydd ar Amazon yn meddwl ei bod hi’n stori rhy drist a thywyll i blant. Dibynnu ar y plentyn wrth gwrs, ond dwi – a miloedd o ddarllenwyr eraill yn anghytuno’n llwyr. Dwi’n mynd i drysori’r copi clawr caled sydd gen i o’r llyfr yma. Fydd hwn ddim yn mynd i siop elusen!

Ond dwi wedi bod yn trio cael gwared â rhai o’r llyfrau sy’n meddiannu fy nhŷ i ers blynyddoedd. Roedd y sefyllfa wedi mynd yn hurt – doedd gen i ddim lle ar ôl ar y silffoedd ac mae gen i lond tŷ o silffoedd! Roedden nhw o dan y gwely, yn fynydd ar fy soffa, yn beryg o ddisgyn ar fy mhen i neu Del. Ac ydi, mae hi’n debyg iawn i lwynog…

DSC_0233 2

Ond ar ôl mynd drwyddyn nhw yn fras, roedd cymaint ohonyn nhw yn lyfrau nad ydw i wedi cael amser i’w darllen eto – felly maen nhw’n ôl o dan y gwely ac yn erbyn y waliau – ond mae ‘na lai ohonyn nhw!

Un llyfr ar gyfer oedolion ro’n i wedi bwriadu ei ddarllen ers tro oedd hwn:

26195807_10155284888388511_4055794732788981731_n

Miwsig Moss Morgan gan Siân Lewis. Hon daeth yn ail agos ar gyfer y Daniel Owen yn 2013, pan enillodd Craciau gan Bet Jones. Roedd hi’n amlwg yn flwyddyn dda, ddiddorol! Yn bendant, mae ‘llinyn storiol’ Craciau yn gryfach yn yr ystyr ‘bestseller’ ond ew… roedd hi’n hynod o agos. Mi wnes i fwynhau hon yn arw. Ydi, mae hi’n fwy hamddenol o lawer, ond mae’n stori ddifyr, wahanol iawn, gyda chymeriadau hyfryd sy’n aros yn y cof. Ac am yr arddull – wel, mae’n canu. Iechyd, mae Siân Lewis yn gallu sgwennu. Do, mae hi wedi ennill gwobrau lu am ei llyfrau i blant ond hon oedd yr un gyntaf iddi ei sgwennu ar gyfer oedolion.

Dydi hi ddim yn berffaith: fymryn bach yn rhy hir efallai? Fymryn bach gormod o dindroi? Ond er hynny, mae’n hyfryd ac yn un o’r nofelau hynny na chafodd ddigon o sylw ar y pryd, er i Wasg y Bwthyn wneud ffilm fer er mwyn ei hyrwyddo. A dyma hi’r ffilm honno. Mae’n bendant yn rhoi blas o’r nofel i chi, ond eto, dwn i’m, mae ei darllen yn brofiad mor wahanol.

Difyr ydi darllen sylwadau beirniaid Daniel Owen 2013 amdani hefyd.

Os dach chi’n nabod oedolyn sy’n hoff o jazz, o sgwennu clyfar sy’n canu, neu o gymeriadau sy’n hanner atgoffa rhywun o Dan y Wenallt modern (mae ‘na rai ecsentrig iawn yma – a Daf yn wirioneddol ddigri) rhowch gopi o hwn iddyn nhw. Ac yn sicr, mi wneith lyfr difyr ar gyfer grŵp darllen.

Hoff Lyfrau Sian Northey

Published Tachwedd 15, 2016 by gwanas

Mi ges i ymateb da iawn i hoff lyfrau Manon Steffan, felly dyma i chi wledd arall, gan awdures arall, Sian Northey.

Mae hi’n sgwennu a barddoni ar gyfer oedolion a phlant – yn llwyddiannus iawn, a dyma rai o’i llyfrau ei hun ar gyfer plant:

images-2chwaer_fawr_blodeuwedd_llyfr

A dyma rai o’i hoff lyfrau gan awduron eraill:

1. Pa lyfrau oeddet ti’n eu hoffi yn blentyn?
a) Ysgol Gynradd  – Cymraeg a Saesneg

Mi oeddwn I wrth fy modd efo comic yr Hebog (roedd Gerallt Lloyd Owen yn athro arna i)

_89798757_hebog_collage

ac mae gen i hefyd atgofion da o athro arall, Goronwy Williams, yn darllen straeon i ni ddiwedd y pnawn a hynny pan oeddan ni y dosbarth uchaf ond un, felly tua 10 oed, a hen ddigon hen i ddarllen ar ein pen ein hunain. Dw i’n ei gofio’n darllen Y March Coch a Bandit yr Andes.

Yn Saesneg mi oeddwn I’n darllen llyfrau am ferlod – Jill and the Perfect Pony, Jill’s Gymkhana a phethau felly,

wp6c73663e_05_06

a’u darllen sawl gwaith. Yr unig un dw i wedi’i gadw ydi Ponies Plot gan C. Northcote Parkinson.

md20201643571Roedd o chydig yn wahanol – yn cael ei adrodd o safbwynt y merlod ac yn ddoniol. Llyfr arall dw i wedi’i gadw am fy mod yn hoff ohono ydi The Day the Guinea Pig Talked gan Paul Gallico.

guineapigtalked_us

b) Ysgol Uwchradd – Cymraeg a Saesneg

Mi ges i a fy ffrindiau gyfnod hir o ddarllen nofelau Agatha Christie a’u ffeirio ymysg ein gilydd. Ac mi oeddwn i, efallai am bod fy nhad yn dod a thunelli ohonynt o’r llyfrgell, yn darllen llawer iawn o sci-fi, gan gynnwys y clasur Y Dydd Olaf.

owain-owain-y-dydd-olaf

Awdur arall mae gen i atofion braf o ddarllen ei gwaith yn fy arddegau hŷn yw Oriana Fallacci – dw i’n credu mod i’n meddwl mod i’n soffistigedig yn darllen llyfrau am wleidyddiaeth a rhyfel a hawliau merched a ballu a rheini wedi eu cyfieithu o’r Eidaleg!

51ccj48zywl-_sx372_bo1204203200_

2. Wyt ti’n dal i ddarllen llyfrau plant? Pa rai wyt ti wedi eu hoffi’n ddiweddar?

Yndw siŵr! Dw i wedi bod yn darllen nofelau mewn cerddi fatha One gan Sarah Crossan gan fy mod i’n trio gwneud rhywbeth tebyg;

ac mi wnes i fwynhau Gwalia gan Llyr Titus yn arw.

getimg

Y llyfr plant diweddaraf i mi ei brynu oedd Mog y Gath Anghofus gan Judith Kerr (awdur Y Teigr a ddaeth i De). Mi oeddwn i a Cira, fy wyres 5 oed, wedi mynd i Gaerdydd ar y trên ac wedi anghofio rhoi llyfr stori yn y bag! Felly roedd rhaid prynu rhywbeth, ac mi wnaethon ni ei fwynhau’n arw.

3. Pwy ydi dy hoff ddylunydd/arlunydd llyfrau? Pam?

Shirley Hughes (llyfrau Alfie a llyfrau eraill)

91blt7IRZkL.jpgac Angharad Tomos – y ddwy ohonynt yn sgwennwyr sy’n creu lluniau, neu’n artistiaid sy’n sgwennu eu straeon eu hunain.

0862430658

Efallai mai cenfigenus ydw i! Ac mi ydw i’n hoff o lyfrau fel pethau ac yn credu bod pob rhan o’r dylunio yn bwysig – dewis ffont, pwysau papur, siap a maint y llyfr, popeth…

4. Be nath i ti ddechrau sgwennu?

Dw i ddim yn cofio dechrau, mae o mhell bell yn ôl erbyn hyn. Mi wnes i beidio sgwennu am gyfnod hir iawn, tua 15 mlynedd, a dw i ddim hyd yn oed yn cofio pam nes i ailddechrau. Ond fuoedd yna ddim cyfnod pan nad oeddwn i’n darllen.

5. Be wyt ti’n ei fwynhau fwya am sgwennu?

Dau beth – ar y pryd, y diflannu i mewn i stori. Mae o fatha darllen ond yn well. Ac wedyn, os ydi rhywbeth yn cael ei gyhoeddi, dw i’n mwynhau ymateb pobl, yn enwedig rhywun na fyswn i wedi’i ddisgwyl iddyn nhw ddarllen un o fy llyfrau i.

6. Dwed chydig am dy nofel ddiweddara i blant.

y_gwaith_powdr_mawr

Y Gwaith Powdr. Hen ffatri ffrwydron sydd bellach yn warchodfa natur ydi’r gwaith powdr. Mae o wrth ymyl fy nhŷ a phan wnes i symyd i Benrhyndeudraeth a mynd a’r ci am dro yna mi oeddwn i’n gwbod yn syth mod i isio sgwennu amdano. Ac mi oedd fy nhad yn wael yn yr ysbyty pan oeddwn I’n ysgrifennu’r llyfr felly efallai mai dyna pam fod yna hen ddyn, taid y prif gymeriad, yn wael yn y llyfr. Gyda llaw, Cira ydi enw’r prif gymeriad, fel fy wyres. Felly fe ddylwn greu cymeriadau o’r enw Jac a Cerys a Joey a Casi hefyd – dyna enwau fy wyrion eraill.

7. Pa lyfr(au) plant sydd ar y ffordd nesa gen ti?

Dw i wedi cael cais i sgwennu stori fer i blant ac mae gen i syniad da. Mi fydd hi wedi’i gosod yn y dyfodol ac yn sôn am symud o un wlad i’r llall ac am groesi ffiniau. Ond dw i’n amau mai pennod gyntaf nofel fydd hi go iawn. Ac mae hynna wedi fy atgoffa am lyfr gwych arall nes i ei ddarllen pan yn blentyn – I am David gan Anne Holm. A rŵan dw i isio darllen hwnnw eto!

515gdiohsvl

Diolch Sian!

Llyfrau plant Gwasg Carreg Gwalch

Published Rhagfyr 4, 2015 by gwanas

Mae ’na dri llyfr da iawn o stabal Gwasg Carreg Gwalch fyddai’n gwneud anrhegion Nadolig da:

I blant 9 + ( ac oedolion sy’n  ddysgwyr Canolradd + yn fy marn i) be am hwn?

getimg-1.php

Dim Gobaith Caneri, rhagor o idiomau hwyliog i blant wedi eu casglu gan Siân Northey a Myrddin ap Dafydd. Yr ail lyfr ydi hwn ganddyn nhw – Dros Ben Llestri oedd y cynta, ac roedd o mor boblogaidd, dyma nhw’n penderfynu gwneud un arall.

 

Gewch chi wybod pethau difyr fel: o ble mae’r dywediad ‘Dim gobaith caneri’ yn dod? Dwi’m yn deud, bydd raid i chi gael copi o’r llyfr.

 

Wedyn efo idiomau eraill, fel ‘canmol i’r cymylau’ a ‘cerdded ling-di-long’ mae Sian Northey wedi sgwennu straeon bach syml i ddangos be maen nhw’n ei feddwl a sut i’w defnyddio nhw.

FullSizeRender-7

FullSizeRender-8

Ac mae Myrddin ap ( sy’n Brifardd) wedi sgwennu cwpledi bychain i fynd efo bob un. Fel hon ar gyfer ‘tynnu coes’:

 

Does dim drygioni yn y meddwl –

Dim ond jôc fach ydi’r cwbwl.

 

A be am ddyfalu pa idiom sy’n ffitio’r cwpled yma:

 

Mae’r bwyd yn edrych mor hyfryd a blasus

Nes bod fy ngheg yn diferu’n awchus!

 

Llyfr difyr a defnyddiol tu hwnt – a be am neud addewid i ddefnyddio un idiom newydd ohono bob wythnos yn 2016? Ond gan fod ’na 72 yn y llyfr, bydd raid i chi neud yn 2017 hefyd…

 

Gwasg Carreg Gwalch £5.99 Lluniau syml, digri gan Siôn Morris.

 

getimg-3

Mae ‘na ddwy stori o fewn un llyfr yn y gyfrol nesa ’ma: Pedrig y Pysgodyn Pengaled ac Arthur yn achub y Byd, gan Casia Wiliam. Mae’n rhan o gyfres sydd wedi ei hanelu at blant 6+ a dwi wedi mwynhau’r straeon yn arw. Hoffi’r lluniau gan Hannah Doyle hefyd.FullSizeRenderFullSizeRender2

Mae ’na neges werdd yn y stori am Arthur, felly jest y peth ar gyfer athrawon sydd isio gwneud gwaith thema neu brosiect ar yr amgylchedd.

A neges fach handi sydd yn stori Pedrig hefyd – be sy’n digwydd pan na fydd plant yn gwrando ar eu rhieni neu eu hathrawon!

Wel, tasech chi’n bysgodyn.

Bargen am £4.99.

 

Syniad ardderchog ydi cynnwys dwy stori o fewn un gyfrol os gai ddeud. Mi wnaethon ni hyn sbel yn ôl yng Ngwasg Gwynedd gyda Dwy Stori Hurt Bost,

getimg-1

ond roedd gen i un stori oedd yn defnyddio mwy o iaith y de ac un yn fwy o iaith y gogledd.

Adolygiad fan hyn:

http://www.gwales.com/bibliographic/?isbn=9780860742593&tsid=4#top

A chafodd y llyfr fawr o sylw ar y pryd – doedd o ddim yn ran o gyfres (clyfar iawn, bobol Carreg Gwalch…) a doedd ’na neb yn blogio fel hyn ar y pryd chwaith!

A’r 3ydd llyfr o stabal Gwasg Carreg Gwalch oedd Straeon Nadolig y Plant ond dwi wedi sôn am hwnnw yn y blog dwytha yndo.

getimg.php

Addas i blant 8-12 oed yn ôl y wasg, ond mae ’na straeon fysa’n plesio rhai 6 a 7 oed hefyd – ac iau, dim ond i rywun fel rhiant neu fodryb neu daid neu rywun eu darllen yn uchel iddyn nhw.

 

Mwynhewch!

 

O ia, ac i’r oedolion – mae gen i ryw lansiad bach heno – nofel hanesyddol sydd â stori drist ynddi mae arna i ofn. Ond doedd gen i ddim dewis o ran y plot – mae’r prif elfennau yn y stori yn wir – wedi digwydd go iawn nôl yn 1833. Dwi’n falch nad o’n i’n byw yn y cyfnod hwnnw, dwi’n deud wrthach chi rwan…

getimg

 

 

 

Darllena. Datblyga

Published Tachwedd 4, 2014 by gwanas

Ymgyrch ydi Darllena. Datblyga i gael pob plentyn 11 oed yn darllen yn dda erbyn 2025.

Os ydach chi’n darllen y blog yma, mae’n siwr eich bod chi’n hoffi darllen yn barod, ond nid pawb sydd mor lwcus!
Yn ôl Estyn, mae pedwar o bob deg (40%) o blant 11 oed yng Nghymru yn darllen yn sal iawn, yn iau na’u hoed, ac mae’r plant hyn yn tueddu i fyw mewn ardaloedd tlawd, lle lle dyw eu rhieni ddim yn darllen efo nhw.
Unknown-2
Does dim digon o blant yn darllen y tu allan i’r ysgol, a does dim digon o dadau yn darllen efo’u plant. Wel? Ydi eich tad chi’n darllen efo chi? Neu Taid/Tad-cu? Neu ewyrth?

Unknown-1

Ffaith i chi: roedd plant 5 oed oedd yn cael darllen stori efo’u tadau bob dydd, 6 mis o flaen ( hynny yw, o ran darllen a sgwennu) plant eraill 5 oed oedd ddim ond yn darllen unwaith yr wythnos.

Mae Darllena.Datblyga am i Gymru fod yn genedl o ddarllenwyr cryf, ac maen nhw am drio cyflawni hynny drwy wneud pethau fel:

* cefnogi rhieni i ddarllen gyda phlant ifanc am ddeng munud y dydd

* annog y cyhoedd i wirfoddoli ( h.y. gweithio heb gael eu talu) i helpu plant dan anfantais i wella eu darllen

Weithiau, mae llyfrau yn rhy hir, felly mae straeon byrion yn help i fachu diddordeb plant. Mae ‘na straeon byrion newydd sbon, tua 10 munud o hyd ( neu lai) ar y wefan yma: http://www.y-cymro.com/darllenadatblyga/
Mae rhai ar gyfer plant bach a rhai ar gyfer plant 7-11, a dewis sgwennu ar gyfer y plant 7+ wnes i. Gweld y ferch hon,

_61040414_carlin_celeb_get
Jazz Carlin yn ennill medal aur i Gymru roddodd y syniad i mi, ac mae’r stori honno fan hyn:
http://www.y-cymro.com/darllenadatblyga/i/2236/desc/stori-4–mynd-amdani/

A sôn am straeon byrion, mae’r Lolfa newydd gyhoeddi dwy gyfrol o straeon ar gyfer plant cynradd. Am Stori ar gyfer plant 7-9 oed a Beth am Stori ar gyfer plant 9-11.

getimg.php
getimg-1.php

Dwi wedi cael copiau ond heb gael cyfle i ddarllen yr un stori eto. Be amdanoch chi? Rhowch wybod be roeddech chi’n ei feddwl ohonyn nhw. Mae’r amrywiaeth o awduron yn ddifyr, o rai profiadol fel Sian Northey, Mared Lewis, Haf Llewelyn a Gwenno Hughes i ferch 11 oed o Sir Fôn!

Hwyl Clwb Darllen

Published Mai 20, 2014 by gwanas

Roedd cyfarfod diwetha ein clwb darllen ni ( yr un efo criw o genod, nid un Tudur) yn un hynod ddiddorol. Rydan ni wedi anghytuno am lyfrau o’r blaen, ond tueddu i fod o’r un farn fyddwn ni ar y cyfan. Nid tro ‘ma!
Profodd Awst yn Anogia i fod yn llyfr all hollti barn yn arw!
Unknown-10
Roedd ein hanner ni wedi ei fwynhau’n ofnadwy, wedi gwirioni a deud y gwir. Ond roedd un wedi mynd ar goll yn rhacs a hyd yn oed wedi gorfod mynd nôl i’r dechrau i roi cynnig arall arni. Ond wedyn, mae hi’n feichiog… Ydi hynny’n esgus?!
Roedd un arall wedi gwylltio cymaint efo’r nofel, roedd ei ‘rant’ hi yn ddeunydd stand-up o safon uchel! Roedd hithau wedi rhoi i fyny ymhell cyn hanner ffordd.
Dyna brofi felly na fydd hon yn plesio pawb! Mi fydd y rhestr cymeriadau ar y blog yma yn help, yn sicr. Ond pasiwyd hefyd nad nofel i’w darllen am ryw 10-20 munud bob nos mohoni. Mae angen diwrnod glawog, neu bnawn Sul hamddenol neu ddyddiau ar draeth i werthfawrogi llyfr fel hwn.
Roedd rhai yn dweud bod y dechrau wedi eu drysu, a bod y Cymro sy’n ymddangos ar y dechrau wedi eu drysu hefyd. Roedden nhw wedi disgwyl ei weld eto at y diwedd, neu rhyw gyfeiriad ato o leia. Pwynt teg.
Ond roedd yr olygfa efo’r awyren ar y mynydd wedi eu bachu, ac o fanno mlaen, roedd y stori wedi cydio ynddyn nhw o ddifri. Ac roedden nhw’n canmol safon y sgwennu yn arw.

Tro nesa, rydan ni am fynd am farddoniaeth am y tro cynta rioed. Un o gyfrolau rhestr fer Llyfr y Flwyddyn – Trwy Ddyddiau Gwydr, Sian Northey.image
A hwn gan Martin Davis:image

Gyda llaw, mi fydd fy nofel i, ‘Gwylliaid’ allan wythnos nesa.image
Lansiad ar lwyfan Steddfod yr Urdd ddydd Llun (oherwydd mai Gwobr Goffa T Llew Jones ydi o). Jest cyn dau, am ryw 5 munud. Dwi’n edrych ymlaen ond yn eitha nerfus hefyd.
O, ac mae ‘na gamgymeriad yn y broliant yn y llun uchod. Mi gafodd ei gywiro cyn ei gyhoeddi, diolch byth, ond welais i mono fo. Allwch chi ei weld o? Beryg ei bod hi’n haws ei weld o wybod bod camgymeriad ynddo, wrth gwrs. Ac mi rydw i angen sbectol i ddarllen bellach, dim ond mod i’n anghofio lle dwi wedi ei rhoi hi dragwyddol.