Manon Steffan Ros

All posts tagged Manon Steffan Ros

Gwobrau Tir na n-Og 2019

Published Mai 30, 2019 by gwanas

61828734_2180286615426017_4690271425884323840_o

Llongyfarchiadau i bawb! A ddeudis i bod Fi a Joe Allen yn lyfr arbennig, arbennig o dda nôl ym mis Mai 2018 yndo?

Mae Manon Steffan Ros wedi ei gwneud hi eto! Dyma i chi nofel ar gyfer darllenwyr 11-14 oed (yn ôl y cyhoeddwyr) (10-94 oed yn fy marn i) ddylai fod yn hynod o boblogaidd, yn bendant gyda phlant a phobl sy’n hoffi pêl-droed, ond hefyd gydag unrhyw un sy’n hoffi stori dda wedi ei dweud yn grefftus.

Penderfyniad gwych gan y beirniaid, a dwi’n gwybod bod Manon yn falch iawn bod yr hen Joe wedi curo Llyfr Glas Nebo. Difyr fydd gweld pa lyfr fydd yn ennill LLyfr y Flwyddyn rŵan ynde… pob lwc, feirniaid!

Llongyfarchiadau hefyd i’r 18 criw (ia, 18!) lwyddodd i gyrraedd Eisteddfod Caerdydd efo’u hymgomau BL 7,8,9, sef detholiad o fy llyfr i, Gwylliaid:

51xLV3OPoLL._SX322_BO1,204,203,200_

Ond llongyfarchiadau mwy i’r 3 gyrhaeddodd llwyfan y Brifwyl, o Ynys Môn, Plas Mawr (Caerdydd) a Chaernarfon.

Criw dawnus a hollol boncyrs o Gaernarfon enillodd y wobr gyntaf:

D70XPiGXsAEA_pw

Ac ro’n i’n cytuno’n llwyr efo’r beirniaid – roedden nhw i gyd yn ardderchog, ond roedd y Cofis wedi creu detholiad clyfar iawn, ac wedi actio’n gwbl wych. Ro’n i’n eitha nerfus cyn gwylio’r gystadleuaeth – be os na fyddai fy llyfr i’n ‘gweithio’ fel ymgom ar lwyfan? Ond diolch i’r nefoedd, ro’n i’n hynod falch o’r canlyniad.

O, a dwi wedi deall mai meibion y gwleidydd Guto Bebb ydi’r ddau hogyn oedd yn actio’r ‘gwylliaid’. Nefi!

Advertisements

Mis yr Ŷd a Wrecsam

Published Ebrill 19, 2019 by gwanas

Mae hi wedi ei wneud o eto.

20190418_095032

Nofel hyfryd arall ar gyfer yr arddegau (12-14 yn ôl y blyrb, ond darllenwyr da o 10 oed i fyny, ddeuda i) gan Manon Steffan Ros. Sut mae hi’n llwyddo i sgwennu cymaint o lyfrau da mor gyson, mor gyflym?

Dyma’r broliant i chi:

20190418_095250

“Stori gref am ragfarnau, cyfeillgarwch a brawdoliaeth rhwng dynion ifanc.” Ia, ac am sylweddoli nad yw eich rhieni’n iawn bob tro, ac am iselder a’r hyn sy’n gallu creu iselder, a ffrindiau sydd ddim wir yn ffrindiau, a bod modd dod o hyd i gyfeillgarwch yn y mannau mwya annisgwyl, a llawer, llawer mwy.

Dyma’r dudalen gyntaf:

20190418_095119

A dyma’r ffordd berffaith o orffen pennod gyntaf:

20190418_095213

“…roedd gen i deimlad yn fy mol fod pethau ofnadwy’n mynd i ddigwydd.” Gwneud i chi fod isio darllen ymlaen i’r bennod nesa yn syth tydi?

Mi ges i drafferth rhoi hon i lawr, er bod gen i gantamil o bethau eraill i’w gwneud. Mae’r stori a’r cymeriadau yn eich bachu, does dim gwastraffu geiriau ac mi fydd bechgyn 12+ yn ei mwynhau hi, dim bwys gen i faint o gwyno gwirion – “Dwi’m isio darllen blincin llyfr!” – wnawn nhw o flaen eu ffrindiau!

Mae hon yn un o gyfres o nofelau newydd ar gyfer yr oedran 12-14 gan CAA (prosiect wedi ei ariannu gan y Llywodraeth, yr un fath â chyfresi Y Melanai ac Yr Ynys) a dyma ddwy o’r rhai eraill sydd ar gael:

20190418_095350

Dim clem sut lyfrau ydi’r rheiny, gan mod i’n cael llyfrau i’w hadolygu gan y gweisg fel arfer, ond mi wnes i brynu hon gan Manon am fod y syniad wedi apelio gymaint ata i. Ac roedd hi’n werth bob ceiniog o’r £5.99!

O, ac os ydach chi’n caru llyfrau ac yn byw yng nghyffiniau Wrecsam, neu isio esgus i bicio yno am chydig o siopa, cofiwch am y Fedwen Lyfrau yn Saith Seren ar yr 11eg o Fai, 10-5. Fel y gwelwch chi o’r poster, mae ‘na rywbeth i bob oed yno.

poster a4 bedwen v2

Gwobrau Tir na n-Og 2019

Published Ebrill 10, 2019 by gwanas

Tir-na-n-og-2019-dwy-iaith-698x400

Mi fyddan nhw’n cyhoeddi enillwyr Gwobrau Tir na n-Og 2019 cyn bo hir, yn Eisteddfod yr Urdd, a dyma i chi deitlau’r rhestr fer Gymraeg, yn ôl y drefn gyhoeddwyd gan y Cyngor Llyfrau:

(mae’n ddrwg gen i bod na ddim mwy o luniau ond mae wordpress yn chwarae triciau yn ddiweddar – isio mwy o bres gen i, beryg!)

1. Hadau – Lleucu Roberts (Y Lolfa)

Nofel anturus i’r arddegau wedi’i gosod mewn byd ôl-apocalyptaidd. Yr ail lyfr yng nghyfres YMA.

2. Cymru ar y Map – Elin Meek, Valériane Leblond (Rily)

Llyfr atlas arbennig iawn gyda darluniau godidog sy’n dangos Cymru ar ei gorau.

3. Llyfr Glas Nebo – Manon Steffan Ros (Y Lolfa)

Enillydd y Fedal Ryddiaith yn Eisteddfod Genedlaethol Cymru 2018.

4. Ble Mae Boc? – Huw Aaron (Y Lolfa)

Llyfr llawn hiwmor sy’n dangos golygfeydd Cymreig eiconig, a chyfle i ddod o hyd i Boc, y ddraig fach. (Llyfr oedd yn boblogaidd iawn efo’r plant yn y Steddfod Sir yn ôl be welais i – jest y peth ar gyfer aros oriau am eich tro chi i fynd ar y llwyfan)

5. Fi a Joe Allen – Manon Steffan Ros (Y Lolfa)

Stori hyfryd am gyffro’r Ewros yn 2016 sydd gymaint mwy na stori bêl-droed.

6. Gwenwyn a Gwasgod Felen – Haf Llewelyn (Gwasg Carreg Gwalch)

Nofel lawn cyffro am bobl gyffredin Sir Feirionnydd yn codi llais yn erbyn gorthrwm a thrais.

7. Lliwiau Byd Natur – Luned Aaron (Gwasg Carreg Gwalch)

Llyfr llun-a-gair sy’n tywys y darllenydd ifanc drwy fyd o liwiau hardd.

Os am wybod mwy am rhain, dwi eisoes wedi adolygu’r rhan fwya ar y blog ‘ma!

Yr hyn sy’n od eleni ydi nad ydyn nhw wedi eu rhannu yn 3 cyfrol cynradd a 3 uwchradd. Mae na 7 eleni! A hyd y gwela i, mae na 4 yn y categori uwchradd, sef 2 nofel Manon Steffan, un Lleucu ac un Haf.

20180519_151555_resizedth

th-1gwenwyn...-a-gwasgod-felen-2187-p

Hefyd, mae Llyfr Glas Nebo eisoes wedi ennill y brif wobr yn y Genedlaethol (a gwerthu miloedd o gopiau gan fod cymaint o oedolion sydd ddim fel arfer yn darllen llyfrau Cymraeg wedi gwirioni efo hi – croeso i fyd llyfrau OI – oedolion ifanc, gyfeillion!) felly onid ydi hi’n mynd i fod yn anodd i unrhyw lyfr arall ei guro? Hm. Ond mae ‘na rai da iawn yn ei herbyn hi, ac mi wnes i wirioni efo Fi a Joe Allen. Diddorol… be fydd penderfyniad y beirniaid sgwn i?

Dwi’n meddwl ei bod hi’n haws efo’r adran iau. Er cystal y ddau arall, mae gen i deimlad yn fy nŵr mai un Elin Meek aiff â hi. Ond gawn ni weld.

Pob lwc i bawb!

Gyda llaw, cliciwch ar y linc isod i weld pa mor wych ydyn nhw mewn gwledydd eraill am hyrwyddo darllen a Diwrnod y Llyfr. Da iawn, yr Iseldiroedd:

https://www.independent.co.uk/travel/news-and-advice/netherlands-free-train-national-book-day-tickets-travel-tickets-ns-a8849606.html?fbclid=IwAR3afgMwKNe7GlW37e4EmsYIqyV1HBZKnxeAIENVBPkFSEQfdFUd7RLDhbw

Gŵyl Llenyddiaeth Plant Caerdydd

Published Chwefror 21, 2019 by gwanas

Mae’r ŵyl yn mynd o nerth i nerth!

Cliciwch ar y ddolen isod i lawrlwytho’r rhaglen lawn ar gyfer Gŵyl Llenyddiaeth Plant Caerdydd eleni. 🙂

http://ow.ly/N0AC50lugQB

Dzh5S6dWkAE2knk

Mi fydda i yno bnawn Sadwrn, Ebrill 6ed, yn is-grofft Castell Caerdydd am 3.00.
A be fydda i’n neud?

9781784616403

Darllen darn o Cadi a’r Deinosoriaid, a sôn am yr un sydd ar y gweill: Cadi a’r Celtiaid! A bydd cyfle i chi dynnu lluniau deinosoriaid – neu dylwyth teg neu bysgod a mor-forynion – neu Geltiaid. Fyny i chi.

Bydd Caryl Lewis yn sôn am ‘Little Honey Bee’ yn y bore, ac os ydach chi’n ffans o Na! Nel! bydd Meleri Wyn James yno jest cyn cinio hefyd. A llwyth o awduron eraill o bob cwr.

Wedyn os dach chi am aros yn y ddinas tan y dydd Sul, be am sesiwn Deian a Loli, tynnu lluniau gyda Huw Aaron, sgwennu gyda Manon Steffan Ros a chlywed am ‘Fi a Joe Allen’?

Pob sesiwn yn £5 a’r manylion sut i archebu lle ar y linc uchod.

Welwn ni chi yno!

Trio – cyfres i blant 7-11 oed

Published Hydref 16, 2018 by gwanas

DpKSrzaW4AEYTfA

Mae’n anodd credu, ond mae Manon Steffan Ros wedi cyhoeddi dau lyfr ARALL! Pryd mae’r hogan yn cysgu? Ydi hi’n cysgu o gwbl? Neu ai cysgu’n arbennig o dda mae hi, fel ei bod hi’n llawn egni a syniadau?

Beth bynnag, y ddau lyfr cynta mewn cyfres i blant 7-11 oed ydi’r rhain. Mae’n deud “i’r arddegau” ar Google, ond na, yn bendant ddim. Llyfrau plant cynradd ydi’r rhain. Neu blant hŷn (oedolion, hyd yn oed) sy’n hoffi hiwmor rhyfedd Manon a chymeriadau cwbl nyts, wrth gwrs…

Mae Manon wedi llwyddo unwaith eto i greu cymeriadau gwych, ac mi fydd y gyfres hon yn sicr o apelio.

Tri ffrind ydi Derec Dynamo, Dilys Ddyfeisgar a Clem Clyfar- “Maen nhw’n benderfynol o fod yn griw anturus a llwyddiannus fel clybiau mewn llyfrau hen ffasiwn.”

20181013_132753

A dwi’n rhyw amau mai llyfrau hen ffasiwn fel rhain sy ganddi mewn golwg:

Ond dydi’r trio yma ddim yn glyfar iawn a does ‘na ddim llawer o ‘ddynamo’ yn Derec druan. “Trio, ond byth yn llwyddo!” mae plant eraill yn yr ysgol yn ei ddeud amdanyn nhw, bechod.

Ond: mae pethau od a rhyfedd yn gallu digwydd, ac wrth gwrs, maen nhw. Fel Dilys yn meddwl y byddai’n gallu gweld yn well drwy wneud sbectol allan o foron…

20181013_132835

Haaa!

Mi wnes i wir fwynhau’r ddwy stori, yn bennaf oherwydd y pethau mae’r cymeriadau yn eu gwneud a’u deud (dwi’n siŵr bod o leia un o feibion Manon wedi cyfrannu at y jôcs) ond hefyd, mae hi wedi gosod y straeon yng Nghastell Caernarfon a Chanolfan y Mileniwm, llefydd go iawn.

20181013_132925

Syniad clyfar – sut i wneud y mannau hyn hyd yn oed yn fwy diddorol i blant Cymru. A lluniau gwych gan Huw Aaron ynde!

Diolch i gwmni Atebol am yrru’r copiau ata i, ac os oes ‘na weisg eraill isio i mi flogio am eu llyfrau nhw – dach chi’n gwybod lle dwi’n byw…

Mwynhewch y darllen!

Ac o ia, mae gen inna lyfr allan yr wythnos yma (ia, dim ond un, ac nid ar gyfer plant 7-11 ond rhai fymryn yn hŷn: 12-15 oed). Mae Y Diffeithwch Du wedi cyrraedd y siopau.

9781784616526

Sef dilyniant i Efa:

EFA6

A bydd y 3ydd llyfr yn y siopau yn 2019. Ydw, dwi’n cymryd chydig mwy o amser na Manon. Bydd raid i mi fynd i ngwely yn gynt…

Isio sgwennu/darlunio llyfrau plant?

Published Hydref 10, 2018 by gwanas

Dyma newyddion difyr:

“Mewn ymdrech i lenwi silffoedd siopau llyfrau â chyhoeddiadau lliwgar Cymraeg i blant, mae Llenyddiaeth Cymru a Chyngor Llyfrau Cymru wedi dod ynghyd i drefnu cwrs arloesol i awduron a darlunwyr plant 3-7 oed”

Felly, os ydi sgwennu ar gyfer plant yn freuddwyd gynnoch chi, tybed ydach chi’n rhydd yn ystod hanner tymor mis Chwefror 2019 (dydd Llun 25 Chwefor – dydd Gwener 1 Mawrth)?

Manon Steffan Ros a Jac Jones fydd yn tiwtora yn Nhŷ Newydd, Llanystumdwy –

dau sy’n feistri ar eu crefft, ac os fyddwch chi’n gneud cais llwyddiannus, mi gewch chi’r tiwtora (a’r bwyd hyfryd – a llety!) am ddim. Cyfle gwych i rywun!

56e822097a1df_56e822097a21e

Y dyddiad cau i ymgeisio yw 5.00 pm brynhawn Mercher 31 Hydref. Bydd angen:

Llenwi ffurflen gais fer, a’i gyrru ynghyd ag
Unai amlinelliad o syniad ar gyfer stori blant 3-7 oed; neu ddarlun addas i dudalen o lyfr plant 3-7 oed; neu rhwng 100-200 gair o stori.

Am ffurflen gais neu am ragor o wybodaeth ebostiwch: tynewydd@llenyddiaethcymru.org

Mwy o wybodaeth fan hyn:

http://www.llenyddiaethcymru.org/lw-news/cyhoeddi-cynllun-feithrin-cenhedlaeth-newydd-o-awduron-darlunwyr-plant/

Pob lwc!

Llyfrau i godi’r galon

Published Awst 22, 2018 by gwanas

Dkul90iXgAEQeS3-1

Syniad gwych arall gan The Reading Agency (diolch am ei drydar, Bethan Hughes). Gawn ni rywbeth tebyg yn Gymraeg os gwelwch yn dda? Mwy o wybodaeth ar y linc isod:

https://reading-well.org.uk/books/mood-boosting-books

Be am roi cychwyn arni fan hyn? Pa lyfrau Cymraeg sydd wedi rhoi gŵen ar eich wyneb chi a/neu godi’r cymylau?

top-10-books-2017

Mi wnai roi cyfle i chi bendroni…

O ran y teitl, mae’n siwr y gellid bathu rhyw derm efo ‘llyfrau’ a ‘llawen’ ond nid mater o fod yn llawen ydi o naci? Ac mae na rywbeth twee iawn am y gair ‘llawen’ yn fy marn i. A pham fod raid cyflythrennu dragwyddol? Weithiau mae’n well ei gadw’n syml.

Nofel sy’n dy godi.
Llyfrau i godi’r galon.
Llyfrau i godi’r ysbryd. (Mae’n debyg bod Bethan Mair wedi trafod yr union bwnc dan y pennawd yma ar raglen Shan Cothi yn weddol ddiweddar ond chlywes i mohoni)
Nofel i godi hwyliau.
Cyfrolau sy’n codi hwyliau.
??
Dwi’n siŵr y gallai ryw gynganeddwr roi enw call i’r fath lyfrau.

Wel? Dach chi wedi gallu meddwl am lyfrau Cymraeg sy’n codi gwên? Dwi’n siŵr bod y rhan fwya o’n llyfrau plant ni’n codi gwên ond dwi’n cael trafferth meddwl am rai sy’n codi’r hwyliau go iawn.
Mi wnaeth Merch y Mêl gan Caryl Lewis roi ryw deimlad cynnes, bodlon i mi, ond dwi ddim yn siŵr os ydi hi’n codi’r hwyliau chwaith.

image

Ddim fel ‘Wonder’ gan RJ Palacio

81TdKijWwWL

Maen nhw’n brin ar gyfer oedolion tydyn? Mae Omlet gan Nia Medi yn dod i’r cof yn syth o’m rhan i.

41UG2GiZijL._SX336_BO1,204,203,200_

Roedd – ac mae – honna’n ddigri iawn, iawn, ac yn gorffen yn gadarnhaol.

Llyfrau Sioned Wiliam – yn enwedig y cyntaf?

images

Mae Inc, Manon Steffan Ros yn sicr yn ffitio.

9781847716330_300x400

Dwi’m yn siwr am Blasu. Oedd y darnau trist yn aros yn y cof ormod i orffen y llyfr gyda gwên? Dwedwch chi.

9781847713827_300x400

A tra dwi’n sôn am Manon, mae Llyfr Glas Nebo yn ffenomenon yn barod!

getimg

Oes angen bathu gair newydd: ‘Ffenomanon’? Llongyfarchiadau mawr iddi – nofel sgwennwyd ar gyfer pobl ifanc ydi hi gyda llaw – un wych, a dwi’n siwr y bydd hi ar y cwricwlwm TGAU o fewn dim. Byddai hynny’n beth da o ran rhoi nofel wirioneddol ysgytwol i’n bobl ifanc ei hastudio, ond ar y llaw arall, mae astudio nofel yn aml yn lladd y pleser o ddarllen. Hm. Dw’n i ddim.

Ond at bwnc y blog penodol hwn, er fod na obaith ar ddiwedd y nofel, efallai bod sefyllfa’r cymeriadau tan hynny wedi bod yn rhy frawychus i’w ddisgrifio fel llyfr sy’n codi’r galon? Mae’r malwod a’r sgwarnog wedi aros yn fy meddwl i o leia!

Be am ‘Cyfres Dymuniadau Da: I Godi’r Galon’ – cerddi ac ati wedi eu golygu gan Tegwyn Jones (allan o stoc ar hyn o bryd yn ôl gwefan Gwales.com)

getimg

Mae hyn wedi gwneud i mi sylweddoli mai chydig iawn o lyfrau Cymraeg sy’n codi hwyliau. Tueddu i fynd am y tywyllwch mae’n hawduron ni ynde? Neu ydw i’n anghywir?

Dyma i chi nofel Saesneg y gwnes i wirioni efo hi pan ro’n i’n ifanc: Dandelion Wine gan Ray Bradbury. Dwi’m wedi ei darllen ers blynyddoedd ond dwi’n dal i gofio’r wên roddodd hi ar fy wyneb.

51dfAXNdszL

O, a dwi newydd gofio – llyfr wirioneddol dda gan Tudur Owen: Y Sŵ.

41YkBvtl7fL._SX314_BO1,204,203,200_

Cafodd hon ei henwi ar Twitter fel llyfr i godi’r galon – a diolch am f’atgoffa.

Ydi hyn wedi eich hatgoffa chi o lyfrau (gwreiddiol) gododd eich calon ryw dro? Rhowch wybod!