Huw Aaron

All posts tagged Huw Aaron

Y Ddinas Uchel a The Secret Dragon

Published Gorffennaf 24, 2020 by gwanas

IMG_2916

O’r diwedd, dwi wedi darllen ‘Y Ddinas Uchel’ gan Huw Aaron. Wnaeth y gyfrol ddim ennill Gwobr Tir Na n-Og eleni, ond roedd hi ar y rhestr fer (roedd Huw wedi gwirioni!) ac yn llawn haeddu bod arni.

Dywedodd Huw fod y stori wedi bod yn ffrwtian yng nghefn ei feddwl ers blynyddoedd, ac mae ôl gwaith meddwl arni. Dydi sgwennu llyfr llun a stori i blant ddim yn digwydd dros nos, wyddoch chi!

Mae llyfr fel hyn fel arfer ar gyfer plant dan 5 oed, ond mae ‘na neges fan hyn sy’n addas i blant hŷn hefyd. Dwi’n siŵr y byddai brawd neu chwaer hŷn wrth eu bodd yn darllen hon i frawd neu chwaer iau. Ond byddai rhieni a neiniau a theidiau – unrhyw un a deud y gwir – yn hapus iawn hefyd.

Stori ydi hi am ferch fach o’r enw Petra sy’n byw mewn dinas yn llawn pobl ofnadwy o brysur. Drwy’r dydd, bob dydd maen nhw wrthi fel morgrug yn adeiladu tyrau uchel.

IMG_1810

Dyna’r cwbl sy’n bwysig iddyn nhw – adeiladu. Dim bwys o ble mae’r cerrig yn dod na be fydd yn digwydd os fydd y tyrrau’n disgyn – adeiladu ydi PWRPAS BYWYD.

Ond mae Petra’n wahanol…

IMG_1811

Ac wrth astudio’r byd a phethau ‘bychain’ bywyd, mae hi’n dechrau holi ei hun – a’r oedolion – ai dim ond adeiladu sy’n bwysig mewn bywyd?

IMG_1812

Un diwrnod, mae Petra’n gweld balŵn aer poeth yn yr awyr uwch ben y ddinas – a dynes fach yn y fasged oddi tani…

IMG_1813

Be fydd yn digwydd? Gaiff Petra fynd yn y balŵn gyda hi? A be welith hi o’r balŵn? Bydd raid i chi gael gafael yn y llyfr i weld drosoch chi’ch hun. Ar gael o’ch siopau llyfrau lleol, ond hefyd, drwy’r wefan hon:

https://www.huwaaron.com/shop/yabds8cboecfm76iboq1hag685iu31

Bydd pob llyfr gaiff ei brynu drwy’r wefan yn cael ei arwyddo gan Huw. Gadewch iddo wybod os hoffech chi gael neges bersonol.

Mae hon yn stori hyfryd, annwyl gyda neges glir – does dim angen dilyn pawb arall fel dafad! Ac oes, mae ‘na fwy i fywyd na gwneud pres/adeiladu/ gweithio drwy’r dydd, ac oes, mae angen jest ymlacio a sbio a syllu weithiau. Rhywbeth mae llawer iawn wedi ei sylweddoli dros gyfnod Covid-19.

Dyma fideo difyr am sut aeth Huw ati i greu’r llyfr:

A dyma adolygiad Morgan Dafydd:
https://www.sonamlyfra.cymru/post/y-ddinas-uchel-huw-aaron

Llyfr Saesneg wedi ei osod yng Nghymru

IMG_1815

Ar ochr Saesneg Gwobr Tir na n-Og, wnaeth ‘The Secret Dragon’ gan Ed Clarke ddim ennill chwaith, ond roedd y nofel hyfryd hon wir yn haeddu bod ar y rhestr fer hefyd. I blant tua 7/8 oed a hŷn (mae ‘na eiriau reit anodd weithiau).

Mi wnes i ddotio oherwydd:
1. Y draig fach annwyl o’r enw Gweeb (er mod i jest â drysu isio iddi fod yn Gwib);
2. Mari, y ferch fach glyfar, styfnig sydd isio bod yn wyddonydd, ond sydd angen dysgu gwersi pwysig am bethau symlach bywyd;
3. Dylan: hogyn clen sy’n llawer gwell efo anifeiliaid na Mari;
4. Yr hwyl a’r hiwmor a’r darnau “O na, plis, naaa!”
5. Yr enwau a’r lleoedd Cymraeg.
6. O, ac mae ‘na ‘bobl ddrwg’ da yma hefyd!

Dau lyfr sydd wedi fy ngwneud yn hapus.

Awduron ar-lein

Published Ebrill 9, 2020 by gwanas

Gan nad ydan ni’n gallu mynd i ysgolion neu lyfrgelloedd i gyfarfod ein darllenwyr am sbel, mae nifer o awduron wedi addasu eu gwaith ar gyfer y we.

th-2

Mae’r gantores, Gwawr Edwards, sydd bellach yn awdures hefyd wrth gwrs, wedi recordio clipiau ohoni ei hun yn darllen rhai o anturiaethau Mali, efo’i merch fach, Nel wrth ei hochr yn gwrando’n astud. Os dach chi am eu clywed, ewch i’w thudalen facebook hi, Gwawr Edwards-Phillips, ac mae ‘na glip ohoni hi’n canu’r caneuon hefyd, efo’i chwaer, Meinir, yn cyfeilio. Mwynhewch!

9781784617240_300x400

Cystadleuaeth!

Mae Cwmni Atebol wedi dechrau cystadleuaeth, gyda gwobr o werth £25 o lyfrau Atebol a chyfle i lansio un o’u llyfrau yn eich hysgol chi pan fydd pob dim yn ôl i drefn:

Y cwbl sydd raid ei wneud ydi gyrru llun, neges neu fidio atyn nhw am rai o’u llyfrau nhw cyn y cyntaf o Fai. Un o’u llyfrau ydi hwn gan Huw Aaron, sydd ar restr fer Tir Na n’Og eleni, ac mae ‘na adolygiad ar wefan https://www.sonamlyfra.cymru/:

IMG_0620

Ac hefyd, llyfr newydd sbon gan Sioned Wyn Roberts, a lluniau gan Bethan Mai:

ffwlbart_ffred_-_drewi_fel_ffwrbart_newydd

Dim ond ar werth drwy http://atebol-siop.com ar hyn o bryd. Does ‘na ddim byd ar y wefan yn deud ar gyfer pa oed mae o, ond tua 4-7 oed dybiwn i? Dyma’r disgrifiad:

Mae Ffred a’i ffwlbart yn ffrindiau gorau
ond digwyddodd rhywbeth od un bore
wnaeth newid lliw trwyn Anti Gyrti –
ar fy ngwir! Dyma’r stori …

Dewch i gwrdd â Ffred a’i ffwlbart yn y llyfr cyntaf mewn cyfres newydd o lyfrau stori-a-llun am ffrindiau bach direidus.

Stori llawn hwyl gyda thestun sy’n odli yn seiliedig ar un o’n dywediadau Cymraeg mwyaf od!

A dyma lun o’r awdures efo’r llyfr:

EUwHK_nXYAE4t4a-1

Cofiwch hefyd am gystadleuaeth lliwio Cadi! Mae gynnoch chi tan ddiwedd y mis:

EUbvKQvXsAAUmtq

A dyma syniadau am bethau i’w gwneud tra dach chi adre:

EU_iWWoWAAANGA7

AR GYFER YR OEDOLION

Dwi newydd orffen Wal gan Mari Emlyn, sydd ddim yn nofel i blant er ei bod hi’n edrych felly i gychwyn!

9781784618452

Nofel glyfar, gynnil, hyfryd fydd yn bendant yn taro pob math o dannau efo pobl tua fy oed i a Mari, ond yn gweithio i bawb o tua 15 i fyny, ac mi fydd yn arbennig o dda ar gyfer dysgwyr hefyd.

Dywedodd Mereid Hopwood yn ei beirniadaeth ar y nofel hon yng nghystadleuaeth Y Fedal Ryddiaith, Eisteddfod Genedlaethol Sir Conwy 2019, fod yma waith ‘cynnil, meistrolgar a chwbl wreiddiol’. Cytuno’n llwyr.

A difyr oedd gwylio Mererid Hopwood yn holi Mari yn y lansiad digidol. Dyma’r sgwrs fan hyn:
http://www.amam.cymru/ylolfa/693

Ar yr un wefan, mae Heiddwen Tomos (efo papur wal ffynci iawn y tu ôl iddi) yn trafod ei chasgliad o straeon byrion, O’r Cysgodion,

ETYqNKoXgAAzHBX

a gyhoeddwyd fis Mawrth eleni ac yn darllen ‘Brodyr’, sef un o’r straeon o’r gyfrol. Dwi ddim wedi cael fy machau ar gopi eto ond dwi’n edrych ymlaen yn arw:

http://www.amam.cymru/ylolfa/820

Cyfrannwch!

Dwi’n sylwi nad oes llawer wedi mentro rhoi sylwadau ar y llyfrau sydd ar wefan https://www.sonamlyfra.cymru/ eto. Plîs gwnewch! Mae’n ddifyr gweld barn gwahanol bobl, a phlant yn enwedig. Does dim angen sgwennu traethawd, dwi’n meddwl bod brawddeg neu ddwy yn gallu deud cymaint mwy weithiau. ee: y cwbl dwi wedi’i ddeud am Hwdi, Gareth F Williams ydi hyn…

Nofel wych ar gyfer unrhyw un sy’n mwynhau cael eu dychryn. Roedd yn rhaid i mi ei rhoi i lawr ar un adeg, i mi gael dechrau anadlu eto. A dydw i ddim yn dychryn yn hawdd!

Ond os dach chi isio syniadau am sgwennu adolygiadau, mae ‘na ganllawiau fan hyn:

https://www.booktrust.org.uk/books-and-reading/tips-and-advice/writing-tips/writing-tips-for-teens/how-to-write-a-book-review/

Gwefan am lyfrau Cymraeg: sonamlyfra.cymru

Published Mawrth 29, 2020 by gwanas

O’r diwedd! Mae ‘na ddau berson sy’n caru llyfrau wedi sefydlu gwefan fywiog, liwgar sy’n llawn o adolygiadau dwyieithog o lyfrau Cymraeg i blant a phobl ifanc.

Dyma nhw’r ddau:

Morgan Dafydd a Dr Llio Mai Hughes, ac mae ‘na fwy amdanyn nhw ar y wefan.

Dwi wedi tynnu’r lluniau oddi ar fy ffôn lôn, felly mae’r fformat fymryn yn wahanol i be gwch chi ar eich cyfrifiadur.

Cliciwch ar y linc isod i weld y wefan gyfan:

https://www.sonamlyfra.cymru/

Dwi wedi cyfri 74 o adolygiadau (ond fues i rioed yn dda efo syms, cofiwch), o lyfrau i blant bach i Llyfr Glas Nebo.

A dyma rai o’r tudalennau:

IMG_0619

Dyma lyfr nad ydw i wedi ei weld eto (sut wnes i ei fethu o? Mae o ar restr fer Gwobr Tir naN-og rŵan!) -Y Ddinas Uchel gan Huw Aaron:

IMG_0620

A dwi wrth fy modd efo’r rhestr glir, hawdd yma ar ddechrau pob adolygiad:

IMG_0621

Dydyn nhw ddim yn adolygiadau siwgrllyd chwaith – maen nhw’n onest iawn. Dyna i chi hwn am Edenia, y drydedd yn fy nhrioleg Cyfres y Melanai.

Adolygiadau Sonamlyfra

Cytuno’n llwyr! Ro’n i’n gwybod yn iawn fod y diwedd yn digwydd ar ras, ond mae gen i esgus: ro’n i’n trio cadw at y nifer geiriau ofynwyd amdano, ac ro’n i angen sgwennu pethau eraill er mwyn talu biliau! Dyna broblem oesol yr awdur Cymraeg (yn enwedig efo llyfrau plant/OI ar y pryd): onibai eich bod wedi ymddeol neu â swydd arall sy’n talu’n dda, dim ond hyn a hyn o amser sydd gynnoch chi i’w roi i bob llyfr. Ac yn anffodus, dwi’n cymryd OES i sgwennu nofelau.

Ond dwi’n derbyn y feirniadaeth yn llwyr. Teg iawn, a chwa o awyr iach!

Mae ‘na amrywiaeth o bobl wedi sgwennu’r adolygiadau, ond be fyddai’n braf fyddai i chi, ddarllenwyr Cymru, yn blant, yn rieni – unrhyw un, nodi eich sylwadau chitha. Gewch chi hyd yn oed yrru fidios!

Jest y peth tra dach chi’n sownd adre. Dwi am neud un neu ddau sylw fy hun rŵan – ond gorau po fwya fydd yn rhoi eu barn.

Da iawn Morgan a Llio – diolch o galon am wefan oedd wir ei hangen!

images

Seren a Sbarc a Hunllef o Anrheg

Published Tachwedd 4, 2019 by gwanas

Dwi’n berson lwcus iawn – dwi’n un o 10,000 sydd wedi derbyn hwn drwy’r post!

EFzBYXdUcAMMGtD

Dyma fwy o’r 10,000:

EFzEVJ8UEAAICFXEGSJV5BWwAAXB06

Babi Huw Aaron ac Elidir Jones ydi Seren a Sbarc, llyfr gafodd ei ariannu gan Lywodraeth Cymru mewn cydweithrediad ag Undeb Rygbi Cymru. Pam? Am ei fod yn hybu dysgu a defnyddio’r Gymraeg drwy rygbi! Ieee! Syniad gwych.

Mae ‘na wefan, ond dydi o ddim yn gweithio i mi (gremlins?) ond mae’n ddigon hawdd dilyn y cyfrif twitter:@LlyfrauBroga

Dyma i chi flas o’r llyfr:
EFzA-3pWkAAG3ja

Cyfuniad o hiwmor boncyrs Huw ac Elidir yn gweithio i’r dim. Mae’n deud ar y cefn ei fod yn “Llyfr comic addas i blant 7+ ac oedolion cŵl.” Yhy. Felly dwi’n oedolyn cŵl achos dwi wedi ei fwynhau o’n arw.

Mae’r stori am yr arwyr Seren a Sbarc yn dilyn tîm rygbi Cymru i Siapan a cheisio dod o hyd i Cwpan y Bydysawd (mae rhyw grinc wedi ei ddwyn) gan orfod brwydro yn erbyn Ninjas, Robots a Robo-ninjas! Heb sôn am y Robo-anghenfil sy’n ymosod ar ddinas Tokyo.

Dyma i chi ran o ddechrau’r llyfr, ac mi wnes i biffian chwerthin efo’r llinell am y tocyn llyfr… ha!

20191104_171747

Gwnaeth hwn i mi biffian hefyd:
20191104_172039

Hiwmor oedolyn mae’n siŵr… ond mae ‘na bethau yma i apelio at hiwmor plant ac oedolion. Dwi ddim am ddifetha’r hwyl i gyd i chi, gwell i chi ei ddarllen drosoch chi’ch hun, ac os na chewch chi afael ar gopi caled, mae’r e-lyfr ar gael i’w lawrlwytho AM DDIM yma:
👉
http://bit.ly/2mp01mw

Llongyfarchiadau Huw ac Elidir – gwych!
A llongyfarchiadau hefyd i dîm Cymru am wneud mor dda yn Siapan.

A llongyfarchiadau i dîm De Affrica am ennill y cwpan! Haeddiannol iawn.

191102_ps_rugby_world_cup_final_0732_8c705a3f1cb3f012537368355532a5f4.fit-760w

Llyfr arall, cwbl wahanol sydd newydd ei gyhoeddi ydi hwn:

9781785623165

Mae lluniau Graham Howells yn wych, sbiwch:

20191029_10104920191029_102945

Ac mae o’n arbennig o dda am wneud angenfilod!

20191029_103026

Dilyniant i Y Bwbach Bach Unig

Graham-Howells-Y_Bwbach_Bach

ydi hwn, ond does dim angen bod wedi darllen hwnnw er mwyn mwynhau hwn. Ac ia, fi sydd wedi addasu hwn, ac ydi, mae cymeriad Aled yn ddeheuol (gan mai yn ne-orllewin Cymru mae’r cyfan yn digwydd) ond gog ydi’r Bwbach. Felly dwi’n gobeithio y bydd yn apelio at blant dros Gymru.

20191029_103157

Mi wnes i weithio’n galed i symleiddio’r arddull, ond gawn ni weld be fydd eich barn chi!

Pam mod i wedi cytuno i’w addasu, a finna’n tantro cymaint yn erbyn gormod o addasiadau? Oherwydd mai llyfr o Gymru, gan Gymro ydi hwn! Ac mae llyfrau gwreiddiol o Gymru angen sylw. Felly nyyyy!

Os dach chi isio gwybod mwy am gymeriadau o fyd y tylwyth teg yng Nghymru, mae ‘na wrach o’r enw Ceridwen yma, a’r Ladi Wen, Gwyn ap Nudd – Y Brenin Gwyrdd, Mallt y Nos, Yr Hwch Ddu, Cŵn Annwn – maen nhw i gyd yma! A gwers am fwlis a bwlio… llyfr bach hyfryd yn fy marn i. Llongyfarchiadau, Graham Howells!

graham-howells-22afd642-4c2c-4111-bcc0-7895b3bac39-resize-750

Yr Horwth – nofel ffantasi

Published Medi 20, 2019 by gwanas

20190920_094329

Dwi newydd orffen darllen Yr Horwth, y nofel gyntaf mewn cyfres ffantasi newydd i bobl ifanc gan Elidir Jones. Mi wnai gyfaddef yn syth i mi gael trafferth efo hi ar y dechrau, ond efallai mai arna i oedd y bai am hynny, nid y llyfr. Mae rhywun wedi blino ddiwedd nos tydi? A doedd fy mhen i ddim yn gallu delio efo’r holl gymeriadau ar y dechrau; ro’n i’n gorfod ail-ddarllen yr un tudalennau yr ail a’r trydydd noson.

Dyma un o luniau Huw Aaron o rai o’r cymeriadau cyntaf i ni ddod ar eu traws:

20190920_095523

OND – a sylwer ar y llythrennau breision yn fan’na – pan wnes i fachu amser call i roi mwy o sylw iddi yn yr haul yn yr ardd, mi ges i fy machu go iawn! Roedd y stori’n cydio a’r cymeriadau’n glir, a nefi, mi wnes i fwynhau.

Felly, os fyddwch chi, fel fi, wedi drysu ar y dechrau, daliwch ati – mi fydd o werth o.

Dyma’r dudalen gyntaf i chi gael blas o’r arddull:

20190920_094348

A dyma dudalen arall, sy’n dangos peth o’r ddeialog, ac yn cyflwyno Heti, un o fy hoff gymeriadau:

20190920_094834

A dyma lun o chwip o gymeriad arall, Sara o’r Coed (gafodd ei magu yn y coed) ac sy’n gogydd gwbl anobeithiol:

20190920_094445

Mae ‘na gymeriadau gwrywaidd wrth gwrs, ac mae’r rheiny’n cydio hefyd, fel Pietro y mynach a Nad y consuriwr – hiwmor gwych gan hwnnw.

Do’n i ddim yn siŵr am y lluniau i ddechrau. Oes eu hangen? A fyddai’n well gadael i ni eu dychymygu ein hunain? Roedd y map cyntaf un o Diroedd Gwyllt y De braidd yn rhy ffidli i mi; ro’n i angen mwy o ofod gwyn i fedru ei “ddarllen.” Ond ar y llaw arall, ro’n i wrth fy modd efo lluniau fel hwn:

20190920_094926

Roedd y lluniau o’r gwahanol greaduriaid peryglus/od mae’r criw yn eu cyfarfod yn ddifyr hefyd. A wnes i rioed feddwl y byddwn i’n syrthio mewn cariad efo mwydyn neu bry genwair anferthol a hynod ddiolwg, sy’n gallu cnoi drwy graig, ac sydd ddim hyd yn oed yn dweud gair o’i ben. Ond wir i chi, rhywsut, mae Elidir Jones wedi llwyddo i greu cymeriad arbennig, a rhoi enw cwbl annisgwyl ond perffaith iddo fo hefyd. Bydd raid i chi ddarllen Yr Horwth eich hun i weld be ydi’r enw a pham mod i wedi dotio cymaint at fwydyn.

Ro’n i wrth fy modd efo’r stori a dychymyg a hiwmor yr awdur, a dwi wir yn edrych ymlaen at weld be fydd yn digwydd nesa yng nghyfres Chwedlau’r Copa Coch. Ond fydd hi’n gwerthu? Dyna’r broblem efo llyfrau ffantasi yn Gymraeg erioed am ryw reswm, ac yn bendant, mae angen mwy o farchnata ar hon. Does fawr neb wedi clywed amdani, ac yn sicr nid y bobl ifanc. Ond os dach chi’n berson ifanc sy’n mwynhau darllen – rhowch gynnig arni da chi. Mi wnaeth yr oedolyn yma ei mwynhau hi, felly does dim angen i chi fod yn ifanc chwaith! Ond dwi’n deud y bregeth honno o hyd tydw?

Athrawon, rieni, lyfrgellwyr, darllenwch hon er mwyn gallu ei hargymell i ddarllenwyr ifanc sy’n chwilio am rywbeth gwahanol. Hoffi Lord of The Rings? Wel, triwch yr Horwth. Dwi wedi sylwi bod y rhan fwyaf o nofelau ffantasi Saesneg ar gyfer pobl ifanc wedi eu sgwennu gan – a’u hanelu at – ferched, y dyddiau yma. Dyn sgwennodd hon, dyn sy’n amlwg wedi gwirioni efo’r genre ffantasi, ac mae ‘na flas cwbl wahanol iddi.

Gŵyl Llenyddiaeth Plant Caerdydd

Published Chwefror 21, 2019 by gwanas

Mae’r ŵyl yn mynd o nerth i nerth!

Cliciwch ar y ddolen isod i lawrlwytho’r rhaglen lawn ar gyfer Gŵyl Llenyddiaeth Plant Caerdydd eleni. 🙂

http://ow.ly/N0AC50lugQB

Dzh5S6dWkAE2knk

Mi fydda i yno bnawn Sadwrn, Ebrill 6ed, yn is-grofft Castell Caerdydd am 3.00.
A be fydda i’n neud?

9781784616403

Darllen darn o Cadi a’r Deinosoriaid, a sôn am yr un sydd ar y gweill: Cadi a’r Celtiaid! A bydd cyfle i chi dynnu lluniau deinosoriaid – neu dylwyth teg neu bysgod a mor-forynion – neu Geltiaid. Fyny i chi.

Bydd Caryl Lewis yn sôn am ‘Little Honey Bee’ yn y bore, ac os ydach chi’n ffans o Na! Nel! bydd Meleri Wyn James yno jest cyn cinio hefyd. A llwyth o awduron eraill o bob cwr.

Wedyn os dach chi am aros yn y ddinas tan y dydd Sul, be am sesiwn Deian a Loli, tynnu lluniau gyda Huw Aaron, sgwennu gyda Manon Steffan Ros a chlywed am ‘Fi a Joe Allen’?

Pob sesiwn yn £5 a’r manylion sut i archebu lle ar y linc uchod.

Welwn ni chi yno!

Anrhegion Nadolig munud olaf

Published Rhagfyr 18, 2018 by gwanas

9781784616625

Wel, mae’r llyfr yma’n hwyl! Dwi’n eitha siŵr y bydd y teulu i gyd yn cael modd i fyw yn chwilio am gymeriad Boc y ddraig fach goch yn y lluniau yma gan Huw Aaron:

IMG_4416

Bydd darllenwyr comic Mellten yn gyfarwydd â chwilio am Boc, ond dyma fo rŵan yn cael llyfr cyfan iddo fo’i hun!

Mae’n dipyn o fargen yn fy marn i: 10 llun tudalen ddwbl a phob un yn dangos golygfa eiconig Gymreig, fel yr Wyddfa, Castell Caerffili, fferm, gêm bêl-droed, Portmeirion ac ati.

Nabod fan hyn?

IMG_4418

A dyma’r fferm:
IMG_4415

Mae ‘na gyfle i chwilio am bethau eraill hefyd (250 i gyd!), a chyfle i drafod a holi cwestiynau rhwng plant â’i gilydd, neu rhwng rhiant/Nain/Taid/Modryb a phlentyn.

Dyma i chi anrheg delfrydol i blant ac oedolion, ac i deuluoedd di-Gymraeg hefyd.

Mae ‘na ddyfyniad da ar y cefn hefyd, ylwch:

IMG_4422

HuwAaron

Dywedodd Huw Aaron:

“Dwi wrth fy modd yn arlunio golygfeydd brysur llawn manylion bach doniol, felly roedd hi’n lot o hwyl creu’r llyfr yma…a lot o waith hefyd! Yn 2019, fydd Boc yn mentro eto wrth i ni gyhoeddi’r llyfr yn Saesneg hefyd. Pob hwyl gyda’r chwilio!”

Mae Ble Mae Boc? gan Huw Aaron (£4.99, Y Lolfa).

Llyfr arall sydd newydd gyraedd y siopau ydi un arall yn y gyfres Deian a Loli:

9781784616472

Dwi wrth fy modd efo’r lluniau ‘ma gan Nest Llwyd Owen:

IMG_4419IMG_4420

Mae’n stori fach hyfryd gan Angharad Elen hefyd, efo ymadroddion bach bywiog fydd yn cyfoethogi iaith plant ifanc: mae’r efeilliaid yn cael trafferth cysgu un noson, ac wrth edrych allan drwy’r ffenest tra’n stwffio’u boliau ganol nos, maen nhw’n sylwi bod y sêr wedi diflannu… felly ydyn, maen nhw’n neidio mewn llong ofod i ddatrys y dirgelwch – ac yn cael gweld y planedau – a llawer mwy.

Maen nhw’n cyfarfod cymeriad hyfryd gafodd ei hysbrydoli gan berson hyfryd go iawn o’r enw Madam Sera. Dydi hi ddim efo ni bellach yn anffodus, ond mae pobl fy oed i yn ei chofio’n iawn ar y teledu – mi sgwennodd ei llyfr ei hun, sbiwch:

61+DMcsVPCL._SX258_BO1,204,203,200_

“Mae gen i gof clir iawn o Madam Sera pan o’n i’n hogan fach,” meddai Angharad. “Roedd hi’n gweithio yn Llyfrgell Caernarfon ac roedd hi’n dotio at blant. I mi, roedd hi’n rhyw gymeriad arallfydol – gyda llais cryg a bynsan ddu ar dop ei phen. Roedd hi’n sêr-ddewines, wrth gwrs, ac mi wnaeth dipyn o argraff arna i mae’n rhaid! Rhyw gyfuniad o Madam Sera a’r Ddewines Hud yn Superted ydi’r Madam Zêra yma.”

Deian a Loli a’r Sêr sy’n Cysgu (£4.99, Y Lolfa).

IMG_4421

Llwyth o sêr i’r ddau lyfr!

Trio – cyfres i blant 7-11 oed

Published Hydref 16, 2018 by gwanas

DpKSrzaW4AEYTfA

Mae’n anodd credu, ond mae Manon Steffan Ros wedi cyhoeddi dau lyfr ARALL! Pryd mae’r hogan yn cysgu? Ydi hi’n cysgu o gwbl? Neu ai cysgu’n arbennig o dda mae hi, fel ei bod hi’n llawn egni a syniadau?

Beth bynnag, y ddau lyfr cynta mewn cyfres i blant 7-11 oed ydi’r rhain. Mae’n deud “i’r arddegau” ar Google, ond na, yn bendant ddim. Llyfrau plant cynradd ydi’r rhain. Neu blant hŷn (oedolion, hyd yn oed) sy’n hoffi hiwmor rhyfedd Manon a chymeriadau cwbl nyts, wrth gwrs…

Mae Manon wedi llwyddo unwaith eto i greu cymeriadau gwych, ac mi fydd y gyfres hon yn sicr o apelio.

Tri ffrind ydi Derec Dynamo, Dilys Ddyfeisgar a Clem Clyfar- “Maen nhw’n benderfynol o fod yn griw anturus a llwyddiannus fel clybiau mewn llyfrau hen ffasiwn.”

20181013_132753

A dwi’n rhyw amau mai llyfrau hen ffasiwn fel rhain sy ganddi mewn golwg:

Ond dydi’r trio yma ddim yn glyfar iawn a does ‘na ddim llawer o ‘ddynamo’ yn Derec druan. “Trio, ond byth yn llwyddo!” mae plant eraill yn yr ysgol yn ei ddeud amdanyn nhw, bechod.

Ond: mae pethau od a rhyfedd yn gallu digwydd, ac wrth gwrs, maen nhw. Fel Dilys yn meddwl y byddai’n gallu gweld yn well drwy wneud sbectol allan o foron…

20181013_132835

Haaa!

Mi wnes i wir fwynhau’r ddwy stori, yn bennaf oherwydd y pethau mae’r cymeriadau yn eu gwneud a’u deud (dwi’n siŵr bod o leia un o feibion Manon wedi cyfrannu at y jôcs) ond hefyd, mae hi wedi gosod y straeon yng Nghastell Caernarfon a Chanolfan y Mileniwm, llefydd go iawn.

20181013_132925

Syniad clyfar – sut i wneud y mannau hyn hyd yn oed yn fwy diddorol i blant Cymru. A lluniau gwych gan Huw Aaron ynde!

Diolch i gwmni Atebol am yrru’r copiau ata i, ac os oes ‘na weisg eraill isio i mi flogio am eu llyfrau nhw – dach chi’n gwybod lle dwi’n byw…

Mwynhewch y darllen!

Ac o ia, mae gen inna lyfr allan yr wythnos yma (ia, dim ond un, ac nid ar gyfer plant 7-11 ond rhai fymryn yn hŷn: 12-15 oed). Mae Y Diffeithwch Du wedi cyrraedd y siopau.

9781784616526

Sef dilyniant i Efa:

EFA6

A bydd y 3ydd llyfr yn y siopau yn 2019. Ydw, dwi’n cymryd chydig mwy o amser na Manon. Bydd raid i mi fynd i ngwely yn gynt…

Bedwen Lyfrau 2018

Published Ebrill 20, 2018 by gwanas

eng_1_post

Bydd Bedwen Lyfrau 2018 yng NGHAERFYRDDIN!

MERCHER 9 – SADWRN 12 MAI

Digwyddiadau Ddydd a Nos mewn lleoliadau amrywiol ac i gyd yn rhad ac am ddim – nifer cyfyngedig ar gyfer rhai sesiynau plant. Popeth i blant yn y bore, a sesiynau oedolion ar ôl cinio.

Bydd llyfrau ar werth ymhob digwyddiad gan Siop y Pentan.

getimg

Bydd Na Nel, Sali Mali ayyb yno. Mae’r manylion i gyd fan hyn:

http://bedwen.com/

Animal-Wall_Literature-Wales_A1-700x400

A chofiwch bod Gwyl Llên Plant Caerdydd yn dechrau y penwythnos yma:

https://www.cardiffkidslitfest.com/cy/

ac yn para tan Ebrill 29ain. Gweithgareddau Cymraeg a Saesneg efo awduron o bob man, yn trafod llyfrau a chomics o bob math, fel rhain:

51h4LO6grPL

A llawer, llawer mwy!

Sweet Pizza a Mellten

Published Mehefin 8, 2017 by gwanas

Sweet Pizza-70785-3

Llyfr Saesneg? Ia, ond un gan Gymro, wedi ei gosod yn ne Cymru, a hon ydi’r nofel enillodd Wobr Tir na n-Og 2017 am y llyfr Saesneg gorau. Roedd yr awdur, Giancarlo Gemin o Gaerdydd

CE_Ny4jWMAAD7AI

wedi ennill y wobr unwaith o’r blaen, am Cowgirl yn 2015

CE_NgXzW0AAGXrk

– a dwi newydd archebu copi o’r llyfrgell – 10 munud ar ôl gorffen Sweet Pizza, sy’n rhoi syniad i chi faint wnes i fwynhau hon. Mae’n stori hyfryd, ddifyr, sy’n cynhesu’r galon. Mi lwyddodd i wneud i mi chwerthin ac i deimlo dagrau yn cronni yn fy llygaid. Mae hi wedi ei hanelu at blant 8-12 oed, ond yn fy marn i, mi fyddai’n apelio at blant hŷn hefyd. Does ‘na ddim byd plentynaidd amdani, ac mae’n delio efo bwyd a choginio, hiliaeth, ymwneud â phobl o dras gwahanol i chi, yr Ail Ryfel Byd, opera, hanes go iawn yr Eidalwyr yng Nghymru – pob math o bethau. Ond dydi hi ddim yn lobsgows o ormod o themau o gwbl – mae’r cyfan wedi ei saernio mor gelfydd, ac efo hiwmor hyfryd.

Pob pennod yn fyr, dim gwastraff geiriau, a phob cymal yn haeddu ei le. Dyma i chi enghraifft o’r arddull:

FullSizeRender

Mae’r cymeriadau i gyd yn taro deuddeg hefyd – dwi’n meddwl mod i wedi syrthio mewn cariad efo bron pob un. Bellissimo. Ac mi fyddai’n gneud chwip o ffilm/cyfres deledu/cyfres radio/sioe lwyfan.

A llongyfarchiadau i Mellten!

IMG_2404

Mae’r comic yn flwydd oedd yr wythnos yma, ac yn dathlu drwy gyhoeddi rhifyn rhif 5 – a dyna’r clawr.

‘Un o’r ffefrynau gyda’r plant dwi wedi cwrdd â nhw ydy Bloben, y bwystfil barus borffor, felly, pa ffordd well i ddathlu na tywallt biliwn o Blobens dros y comic?’ meddai’r golygydd, Huw Aaron.

Be arall sydd yn y rhifyn yma? Mwy o anturiaethau gyda Gwil Garw a’r crisial hud, ras criw Rali’r Gofod, a mwy o ddirgelwch Yr Allwedd Amser. Ceir hefyd stori ryfedd am ddraig penhesgyn gan Jac Jones ac mae gan Gari Pêl ffrind newydd o’r enw Llionel Methi. ha!

Mae hefyd cyfle arbennig i ennill llyfr newydd ‘Stori Brenin Arthur’ gan wasg Rily.

Diddordeb? Mi allwch chi brynu copïau unigol o Mellten yn eich siopau llyfrau lleol (dim ond £2! Llai na llawer iawn o gardiau pen-blwydd!) neu  gellir tanysgrifio am £8 y flwyddyn ( cost 1 llyfr…) drwy’r wefan ( http://www.mellten.com ), ysgolion, siopau llyfrau lleol neu yn uniongyrchol gan wasg y Lolfa.

Pen-blwydd hapus Mellten!