Gwobr Tir na Nog

All posts tagged Gwobr Tir na Nog

Cyfle i gael llyfr am ddim, a mwy o ‘Maes y Mes.’

Published Ebrill 18, 2018 by gwanas

Dyma i chi syniad gwych! Cyfle i blant ennill pecyn o lyfrau am ddim, a thynnu sylw at Wobr Tir na n-Og yr un pryd. Manylion yn y llun isod:

image

Does ‘na ddim dyddiad cau hyd y gwela i, ond nifer cyfyngedig o lyfrau am ddim sydd ar gael, felly brysiwch! Byddai sgwennu am bob un yn anodd, felly be am ddewis un a sgwennu am hwnnw? Does dim angen traethawd! Dwi’n siwr y byddai hanner tudalen yn ddigon – pargraff hyd yn oed! Ac mae modd gyrru clip fidio hefyd – be amdani?

A mwy o newyddion da: mae’r 2 lyfr nesaf yn y gyfres Maes y Mes yn y siopau rŵan. Cyfres i blant 5-8 oed ydi hi, gan yr awdures/llyfrgellyd Nia Gruffydd gyda lluniau gan Lisa Fox.

Rydan ni eisoes wedi gweld straeon am dylwyth teg yr hydref a’r gaeaf, a rŵan, dyma straeon y gwanwyn a’r haf.

Dwi’n meddwl mai Brwynwen a’r Aderyn Anferth ydi’r stori orau o’r 4, achos mi ges i fy nhwyllo – doedd gen i ddim syniad pam fod darnau arian yn ymddangos bob munud – ond efallai eich bod chi’n anghytuno? Rhowch wybod!

Dyma i chi flas o sori Brwynwen:

image

A blas o stori Briallen a brech y mêl:

image

Ydi, mae Briallen druan yn sal ar adeg anffodus iawn, bechod. Bydd raid i chi ddarllen y llyfr i weld be sy’n digwydd iddi…

Mae ‘na dipyn o sôn am fwyd a dillad yn y llyfrau hyn, felly os ydach chi’n nabod plentyn 5-8 oed sy’n hoffi bwyd a dillad a ffasiwn, be am roi copi o un o’r llyfrau hyn iddyn nhw? Neu gwell fyth, becyn o’r 4 llyfr.

£3.99 yr un, gan Y Lolfa.

Ond dwi’n siŵr y byddai Nia yn hapus i weld y 4 llyfr yn cael eu benthyca o’r llyfrgell hefyd – gan mai llyfrgellydd ydi hi. Dwi’n siŵr ei bod hi wedi cofrestru efo PLR, siawns! PLR (public lending right) sy’n talu 8c i’r awdur am bob tro mae llyfr yn cael ei fenthyca. Felly prynwch a benthycwch o lyfrgell – cefnogwch ein hawduron!

Advertisements

Rhestr Fer Gwobrau Tir na n-Og 2018

Published Mawrth 26, 2018 by gwanas

Funny-Smiling-Baby-Picture-min-300x200

Gwên fawr ar fy wyneb i a sawl awdur arall oherwydd hyn:

http://www.llyfrau.cymru/news/news-detail?diablo.lang=cym&id=13216

– neu os ydach chi’n rhy ddiog i glicio ar y linc, mae na grynodeb o’r datganiad i’r wasg isod.

Cyhoeddi Rhestr Fer Gwobrau Tir na n-Og 2018

26 Maw 2018

Cyhoeddodd Cyngor Llyfrau Cymru y teitlau sydd ar restr fer Gwobrau Tir na n-Og 2018, sef y gwobrau a roddir yn flynyddol gan y Cyngor i anrhydeddu gwaith gwreiddiol gan awduron ac arlunwyr llyfrau plant yn y Gymraeg a’r Saesneg.

Dywedodd Llinos Davies, Cadeirydd y Panel Llyfrau Cymraeg, “Roedd yn flwyddyn arbennig o gref heb yr un gyfrol wan, felly rhaid llongyfarch y gweisg am gynnyrch amrywiol o safon uchel.” Ychwanegodd, “Braf yw gweld nifer dda o nofelau grymus wedi eu hanelu at yr arddegau.”

“Y mae’r amrywiaeth o lyfrau sydd ar y rhestr fer eleni yn galonogol dros ben,” meddai Helen Jones, Pennaeth Adran Llyfrau Plant a Hyrwyddo Darllen y Cyngor. “Ein prif nod yw gwobrwyo’r llyfrau gorau i blant a phobl ifanc, ac annog plant i brynu a darllen llyfrau er mwyn pleser.”

Bydd enwau enillwyr y gwobrau Cymraeg (cynradd ac uwchradd) yn cael eu cyhoeddi ar lwyfan Eisteddfod Genedlaethol yr Urdd Brycheiniog a Maesyfed yn Llanelwedd ar 31 Mai 2018.

Cyhoeddir enillydd y wobr Saesneg yng nghynhadledd CILIP Cymru yn Aberystwyth ddydd Mercher, 9 Mai.

Teitlau’r rhestr fer Gymraeg:

image

Cyfres Yma: Yr Ynys – Lleucu Roberts (Y Lolfa)

Y gyfrol gyntaf mewn trioleg o nofelau ôl-apocalyptaidd ar gyfer yr arddegau. Y flwyddyn 2140 yw hi a cheir hanes 49 o bobl a oroesodd ar ôl cuddio rhag bom niwclear mewn ogof ar ynys bellennig yn yr Arctig. Mae’r cenedlaethau wedi tyfu o darddiad Mam Un, ac mae ei dyddiadur hi yn allweddol ac yn ddylanwadol, yn arbennig yn hanes Gwawr, y ferch sydd yn ganolog i’r stori.

image

Merch y Mêl – Caryl Lewis (Y Lolfa)

Llyfr stori-a-llun hyfryd i blant 4–8 oed. Bydd cyfle i’r plant ddysgu enwau blodau ac am fyd natur trwy stori annwyl Caryl a lluniau bendigedig Valériane Leblond. Mae Elsi’n byw gyda’i mam-gu, sy’n cadw gwenyn. Trwy ddilyn y gwenyn, a sylwi ar bopeth sy’n digwydd yn yr ardd drwy gydol y flwyddyn, daw Elsi i garu pob tymor yn ei dro.

clawr

Gethin Nyth Brân – Gareth Evans (Carreg Gwalch)

Nofel ffantasi gyffrous sy’n plethu dau fyd. Mae bywyd yn boen i Gethin, 13 oed, ym Mhontypridd. Mae e’n ffraeo â’i fam o hyd, does gan Caitlin ddim diddordeb ynddo, ac mae’r Tri Trist yn mynnu ei blagio. Ond, yn dilyn parti yng nghartref Caitlin ar noswyl Calan Gaeaf, mae bywyd Gethin yn troi ben i waered, ac mae’n deffro mewn byd arall yn y flwyddyn 1713.

IMG_4319

Mae’r Lleuad yn Goch – Myrddin ap Dafydd (Carreg Gwalch)

Nofel sy’n clymu’r Tân yn Llŷn yn 1936 a’r ymosodiad ar Guernica yng Ngwlad y Basg yn 1937. Mae tân yn y cartref henoed yn gorfodi Megan, sydd bellach yn nain, i ddewis un peth o’i llofft wrth i’r adeilad gael ei wagio gan y timau diogelwch. Pam mae hi wedi dewis hen faner denau goch, gwyrdd a gwyn?

EFA6

Y Melanai: Efa – Bethan Gwanas (Y Lolfa)

Y nofel gyntaf mewn trioleg ar gyfer yr arddegau. Mae Efa yn ddarpar frenhines gwlad Melania ond mae hi’n gyndyn i ddilyn yr hen draddodiadau, gan gynnwys lladd ei mam, y frenhines, ar ei phen-blwydd yn 16 oed. Yn y stori, dilynwn Efa wrth iddi frwydro yn erbyn ei thynged ei hun.

s-l400

Dosbarth Miss Prydderch a’r Carped Hud – Mererid Hopwood ( Gomer)

Mentrwch gyda Miss Prydderch a’i disgyblion o Ysgol y Garn ar y carped hud i Goedwig y Tylluanod lle cewch weld rhyfeddodau, ond peidiwch, da chi, ag edrych i fyw llygaid Dr Wg ab Lin! Dyma’r teitl cyntaf mewn cyfres o lyfrau am yr athrawes anghyffredin a’i hanturiaethau.

Teitlau’r rhestr fer Saesneg:

Santa’s Greatest Gift – Tudur Dylan Jones (Gomer)

King of the Sky – Nicola Davies (Walker)

St. David’s Day is Cancelled! – Wendy White (Gomer)

Gaslight – Eloise Williams (Firefly)

The Jewelled Jaguar – Sharon Tregenza (Firefly)

The Nearest Faraway Place – Hayley Long (Hot Key)

Dwi wedi canmol nifer o’r llyfrau uchod ar y blog yma eisoes ac mae gen i syniad go lew pwy gaiff y wobr… (naci, nid fi!) ond mae hi’n hyfryd cael bod ar y rhestr fer. Pob lwc i bawb!

Gyda llaw, llongyfarchiadau i’r awdures Anni Llyn a Tudur y gŵr ar enedigaeth hogan fach o’r enw Martha Crug!

annillyn01

O, a gyda llaw, dyma ddau lyfr Saesneg ardderchog i blant dwi newydd eu darllen:
The Call, Peadar O’ Guilin ( Nofel OI/YA – tua 13+? Mae hi reit frawychus mewn mannau! Do’n i methu ei rhoi i lawr.)
The Road to ever after, Moira Young (tua 9+) Hyfryd, hyfryd. Darllenwch hi, dim bwys os ydach chi’n 9, 29, 49 neu 79.

Sweet Pizza a Mellten

Published Mehefin 8, 2017 by gwanas

Sweet Pizza-70785-3

Llyfr Saesneg? Ia, ond un gan Gymro, wedi ei gosod yn ne Cymru, a hon ydi’r nofel enillodd Wobr Tir na n-Og 2017 am y llyfr Saesneg gorau. Roedd yr awdur, Giancarlo Gemin o Gaerdydd

CE_Ny4jWMAAD7AI

wedi ennill y wobr unwaith o’r blaen, am Cowgirl yn 2015

CE_NgXzW0AAGXrk

– a dwi newydd archebu copi o’r llyfrgell – 10 munud ar ôl gorffen Sweet Pizza, sy’n rhoi syniad i chi faint wnes i fwynhau hon. Mae’n stori hyfryd, ddifyr, sy’n cynhesu’r galon. Mi lwyddodd i wneud i mi chwerthin ac i deimlo dagrau yn cronni yn fy llygaid. Mae hi wedi ei hanelu at blant 8-12 oed, ond yn fy marn i, mi fyddai’n apelio at blant hŷn hefyd. Does ‘na ddim byd plentynaidd amdani, ac mae’n delio efo bwyd a choginio, hiliaeth, ymwneud â phobl o dras gwahanol i chi, yr Ail Ryfel Byd, opera, hanes go iawn yr Eidalwyr yng Nghymru – pob math o bethau. Ond dydi hi ddim yn lobsgows o ormod o themau o gwbl – mae’r cyfan wedi ei saernio mor gelfydd, ac efo hiwmor hyfryd.

Pob pennod yn fyr, dim gwastraff geiriau, a phob cymal yn haeddu ei le. Dyma i chi enghraifft o’r arddull:

FullSizeRender

Mae’r cymeriadau i gyd yn taro deuddeg hefyd – dwi’n meddwl mod i wedi syrthio mewn cariad efo bron pob un. Bellissimo. Ac mi fyddai’n gneud chwip o ffilm/cyfres deledu/cyfres radio/sioe lwyfan.

A llongyfarchiadau i Mellten!

IMG_2404

Mae’r comic yn flwydd oedd yr wythnos yma, ac yn dathlu drwy gyhoeddi rhifyn rhif 5 – a dyna’r clawr.

‘Un o’r ffefrynau gyda’r plant dwi wedi cwrdd â nhw ydy Bloben, y bwystfil barus borffor, felly, pa ffordd well i ddathlu na tywallt biliwn o Blobens dros y comic?’ meddai’r golygydd, Huw Aaron.

Be arall sydd yn y rhifyn yma? Mwy o anturiaethau gyda Gwil Garw a’r crisial hud, ras criw Rali’r Gofod, a mwy o ddirgelwch Yr Allwedd Amser. Ceir hefyd stori ryfedd am ddraig penhesgyn gan Jac Jones ac mae gan Gari Pêl ffrind newydd o’r enw Llionel Methi. ha!

Mae hefyd cyfle arbennig i ennill llyfr newydd ‘Stori Brenin Arthur’ gan wasg Rily.

Diddordeb? Mi allwch chi brynu copïau unigol o Mellten yn eich siopau llyfrau lleol (dim ond £2! Llai na llawer iawn o gardiau pen-blwydd!) neu  gellir tanysgrifio am £8 y flwyddyn ( cost 1 llyfr…) drwy’r wefan ( http://www.mellten.com ), ysgolion, siopau llyfrau lleol neu yn uniongyrchol gan wasg y Lolfa.

Pen-blwydd hapus Mellten!

 

Gwobrau Tir-na nOg 2017

Published Mehefin 2, 2017 by gwanas

Tir-na-Nog-2017

Mor falch fy mod i wedi cael fy mhrofi’n gywir! Pluen wedi ennill y categori uwchradd! Ac mae ABC Byd Natur yn lyfr hynod ddeniadol – dysgu’r wyddor mewn steil. Llongyfarchiadau mawr i’r ddwy! Mae Luned yn gyn-ddisgybl i mi gyda llaw. Ahem. Wel, Ffrangeg oedd fy mhwnc i ond roedd angen dysgu hwnnw en francais hefyd, wrth gwrs.

Neis ydi’r tlysau ‘na hefyd. Dwi’m yn cofio cael tlysau… os ges i rai, dwi’m yn cofio lle maen nhw.

A dyma lyfr newydd sydd allan wsnos yma, a do’n i’n gwybod dim. Deri Dan y daliwr dreigiau gan Haf Llewelyn. Addas i blant 6-9 oed meddan nhw.

18813196_459666257704815_7956651887291893722_n

Edrych mlaen at ei ddarllen. Methu mynd yn anghywir efo dreigiau…

Ond eto, sbiwch ar lun o hen, hen lyfr fan hyn. Pwy sydd angen dreigiau pan mae gynnoch chi falwod?

DBUUBljXUAAb1fN

Trwy’r Darlun

Published Mai 17, 2017 by gwanas

Dw i newydd orffen hon, ac yn methu credu nad o’n i wedi ei darllen cyn hyn, na chwaith bod neb WEDI DEUD WRTHA I Y BYDDWN I’N EI MWYNHAU HI GYMAINT! Felly dw i’n deud wrthach chi, rwan, iawn?

image

Os ydach chi, fel fi, yn hoffi straeon ffantasi am fydoedd eraill od, llawn hud a lledrith a chreaduriaid annisgwyl (fel y Cnorc – caru fo!) sy’n dangos chwip o ddychymyg ar ran yr awdur, mae hon yn WYCH!

image

Nofel gyntaf erioed Manon Steffan Ros oedd hon, nôl yn 2008. Sbiwch ifanc ydi hi yn y llun! Nid ei bod hi’n edrych yn hen rwan, wrth gwrs…

Mae’r nofel wedi ei hanelu at blant 9-13 oed fel rhan o Gyfres yr Onnen. Bachgen ydi’r prif gymeriad – Cledwyn, sydd ar fin mynd i Ysgol Uwchradd Tywyn, ond mae ei chwaer fawr o, Siân yn bwysig iawn i’r stori hefyd. Be wnes i ei fwynhau ydi’r ffaith nad oes yr un o’r ddau gymeriad yn berffaith, ond rydan ni’n dal i’w hoffi nhw – efallai oherwydd hynny. Dan ni’n gallu credu eu bod nhw’n wir, ac o’r herwydd, mae’r byd trwy’r darlun yn teimlo’n wir hefyd.

Mi wnes i hefyd fwynhau’r ffaith ei bod wedi ei gosod yn gadarn yn ardal Tywyn ac Aberdyfi. Mae ‘Clychau Aberdyfi’ yn bwysig ynddi er enghraifft – cân ro’n i wedi credu oedd yn un draddodiadol Gymreig, ond na, mae’n debyg mai ymddangos yn Saesneg wnaeth hi gynta, yn 1785! Hm…be nesa?

Ta waeth, mi wnes i syrthio mewn cariad efo cymeriad Gili Dŵ, sy’n methu deud ‘r’, ac mi wnewch chithau hefyd. Mi fydd y Marach a’r Abarimon yn aros yn y cof hefyd, a’r hen Gnorc bach druan. O, a gesiwch ble mae Gili Dŵ yn byw? Yn ‘Pendramwnwgl’! Sef enw fy hoff gân erioed gan dad Manon, Steve Eaves.

Dyma i chi dudalen yn agos at ddechrau’r stori i roi blas i chi:

image

Ia, eich gadael ar ymyl y dibyn yn fanna – neu ar ‘glo crog’ fel y cafodd ei benderfynu gan Elgan o Ysgol Cerrig-y-drudion ar raglen radio Aled Hughes bore ma – dyna fydd y term swyddogol am ‘cliffhanger’ o hyn ymlaen. Diolch am siarad cystal am lyfrau a dy lyfrgell, Elgan! Hen bryd cael barn plant am lyfrau plant, yn hytrach nac oedolion dragwyddol!

Gyda llaw, dyma ddarn gafodd ei gyhoeddi ar gwales.com pan gafodd Trwy’r Darlun ei gyhoeddi gyntaf:

Cafodd Manon y syniad am y stori ar ôl genedigaeth ei mab, Efan, yn 2005. Teimlodd dristwch na fyddai ei mab byth yn dod i adnabod ei Nain, oherwydd collodd Manon ei mam i gancr yn 2003. Yn hytrach na gweld ei Nain mewn hen luniau’n unig, penderfynodd Manon lunio stori’n cynnwys ei mam fel un o’r prif gymeriadau, gan obeithio y byddai Efan yn adnabod ychydig mwy arni drwy’r stori yn y dyfodol.
Mae sawl elfen arall o fywyd yr awdures ifanc yn cael eu hadlewyrchu yn y nofel. Gwlad hudol Crug yn y stori yw ardal enedigol ei mam ym Mryncrug; mae cymeriad Cledwyn yn y nofel wedi deillio o lun o hen berthynas iddi; ac mae Manon bellach yn byw yn ardal Aberdyfi, lle mae’r prif gymeriadau’n byw.

Meddai Meinir Edwards, Golygydd Y Lolfa, “Dyma nofel ffres, llawn dychymyg. Mae Manon Steffan Ros yn awdures ifanc, newydd, gyffrous. Rwy’n siwr y clywn ni dipyn mwy amdani hi, a’i nofelau, yn y dyfodol.”

Roeddet ti’n iawn, Meinir! Mi enillodd y dilyniant, Trwy’r Tonnau, wobr Tir naN-og a dwi’n ysu i ddarllen honno rwan.

Gareth F Williams (a Phenwythnos Anferthol Caernarfon)

Published Hydref 2, 2016 by gwanas

garethfwilliams

Fel y llun uchod dwi’n cofio Gareth F – y wên a’r llygaid direidus, llawn sglein. Ond mae’r wên a’r sglein wedi’n gadael, gan adael anferth o dwll yn y byd llyfrau Cymraeg ac ym mywydau pawb oedd yn ei nabod.

Roedd o’n gariad o foi ac yn awdur gwych, fel mae’r ffaith ei fod wedi ennill Gwobr Tir na-nOg chwe gwaith yn ei brofi. Roedd ei lyfrau ar gyfer oedolion yn rai arbennig – yn enwedig Awst yn Anogia, y llyfr Cymraeg gorau i mi ei ddarllen erioed.

image

Ond blog am lyfrau plant a phobl ifanc ydi hwn i fod, ac roedd Gareth wrth ei fodd yn sgwennu ar gyfer yr oedran yna – am ei fod o’n dal mor ifanc ei hun yn ei ffordd o feddwl a’i agwedd at fywyd, am wn i.

Mae ‘na nifer ddarllenodd ‘O ddawns i Ddawns’ ac ‘Adref heb Elin’ 220px-o_ddawns_i_ddawns_llyfr

1843236818_2_13  yn ystod eu dyddiau ysgol yn y 1990au yn dal i’w cofio’n glir, flynyddoedd yn ddiweddarach.

Mae ‘Anji’ ( ar gyfer yr arddegau) hefyd yn gampwaith,

41s52hsimil-_ac_us160_   a’r darn am y fam yn poenydio ei merch drwy actio bod yn fochyn ymysg y pethau mwya pwerus i mi eu darllen erioed.

images-1 Roedd ‘Hwdi’ mor frawychus, mi fu’n rhaid i mi ei rhoi i lawr i gael fy ngwynt ataf cyn medru dal ati. Roedd o’n wych am greu tensiwn: Jara, Y dyn gwyrdd, Tacsi i’r tywyllwch, y ddwy nofel am y Ddwy Lisa, Eira Mân, Eira Mawr…

220px-jara_llyfrimages-210378692

Roedden nhw i gyd yn dywyll a chelfydd a hynod, hynod gyffrous.

Roedd y ddwy ddiweddar: Y Gêm a Cwmwl Dros Y Cwm yn gampweithiau oedd yn dod â hanes yn fyw i bobl ifanc – ac oedolion.

 

Roedd ganddo ddychymyg ffantastic, hynod weledol ac roedd Ifor ap Glyn isio gwneud ffilm o Mei ling a Meirion,

images-3  nofel fer ( ar gyfer oedolion) wedi ei gosod yn ardal Porthmadog, oedd mor annwyl iddo fo. Ond roedd y rhan fwya o’i nofelau â photensial ffilm ynddyn nhw.

images-5415uvk7v8l-_ac_us160_

Mi fydda i wastad yn annog bechgyn sydd ddim yn hoffi ffuglen i ddarllen hwn:

images-4

Rhyfedd o Fyd – Llyfr am y creaduriaid (neu’r bwystfilod) rhyfedd mae rhai yn dweud sy’n bod go iawn, fel Bigfoot, anghenfil Loch Ness ac ati. Gwnaeth Gareth gryn dipyn o ymchwil i mewn i’r pwnc ar gyfer hon, ond roedd o’n gwybod gryn dipyn beth bynnag gan fod creaduriaid o’r fath wedi bachu ei ddychymyg ers ei blentyndod.

Os nad ydach chi wedi darllen un o lyfrau Gareth eto, gwnewch. Mae ‘na ddigonedd yn y siopau ( ar wahân i Awst yn Anogia – sydd allan o brint ond falle y caiff ei ailgyhoeddi rwan?) neu ewch i’ch llyfrgell leol. Un ffordd o gadw’r atgof am rywun yn fyw ydi drwy ddarllen eu geiriau nhw.

A thrwy ddathlu eu gwaith a’u bywyd nhw, fel y digwyddodd efo Roald Dahl eleni. Braf fysa cael diwrnod i ddathlu Gareth F ryw dro.

Roedd Penwythnos Anferthol Caernarfon mor llwyddiannus, dwi’n siwr y gwelwn ni rywbeth tebyg eto. Mi ges i’r fraint o roi gweithdy creu cewri yng ngardd gefn siop Palas Print, a dyma rai lluniau i chi dynnwyd gan Iolo Penri. Dwi wedi eu dwyn o dudalen FB Palas Print, ond dwi’n siwr y byddan nhw’n fodlon i mi wneud hynny!

Mi ges i goblyn o hwyl efo’r criw, a gwirioni efo’u doniau a’u syniadau nhw – rhai yn hollol boncyrs! Mi fysa Roald Dahl –  a Gareth F wedi gwirioni hefyd.