Cyfres y Melanai

All posts tagged Cyfres y Melanai

Llyfrau Steddfod Dyffryn Conwy

Published Awst 14, 2019 by gwanas

Dyma’r llyfrau brynais i ar y maes yn Llanrwst:

20190807_093802

Dwi hanner ffordd drwy Carafanio ac yn mwynhau’n arw! Ond roedd gen i fwy o lyfrau ar fy nesg cyn mynd i’r Steddfod, yn cynnwys Treheli gan Mared Lewis:

9781784617158

a Mudferwi gan Rebecca Roberts:

Mudferwi-clawr

Llwyth o ddarllen o mlaen i felly! A dwi’n meddwl mai ar gyfer oedolion mae’r rheina i gyd – heblaw Horwth efallai? Ond dydi hwnnw ddim yn edrych fel un ar gyfer plant, chwaith. Mi wnai adael i chi wybod wedi i mi eu darllen i gyd, a chan mod i angen gorffen sgwennu fy nofel fy hun yn y cyfamser, mi allai fod yn sbel go lew, iawn?

Roedd hi’n Steddfod hyfryd, er ei bod hi wedi bod yn amhosib gweld a chlywed bob dim. Doedd darllen stori Sali Mali ynghanol y sŵn a’r miri yn y Pentre Plant ddim yn hawdd (diolch i bawb wnaeth aros!) ac mi ges i fodd i fyw yn cyfarfod ffans Cyfres y Melanai ar stondin y Cyngor Llyfrau:


Diolch arbennig i Courtney o Lundain am ddod i chwilio amdana i ar ol y sesiwn arwyddo (roedd ei nain yn canu ar y llwyfan yr un pryd â’r sesiwn arwyddo swyddogol…).

Gyda llaw, mi fues i’n sbecian rownd y cefnau a dyma sut mae staff y CLLC yn llwyddo i lenwi’r silffoedd drwy’r wythnos:
20190805_144234

Sgwrs ro’n i wir am fod yn ran ohoni oedd yr un am amrywiaeth mewn llyfrau plant, ond ro’n i’n brysur yn cynnal gweithdy sgwennu ar y pryd…

20190806_112329

Ond mae ‘na erthygl am y drafodaeth ar BBC Cymry Fyw fan hyn:

https://www.bbc.co.uk/cymrufyw/49255371?fbclid=IwAR3OHkG5mH2NqdCVRLUerNntqFvT2hjZLCGtj-gjCJabW6rPywno2ehQP4E

A dwi’n cytuno 100% efo Elin Haf Gruffudd Jones y dylai cyhoeddwyr llyfrau o Gymru edrych ar gyfresi o dramor er mwyn cael gwell amrywiaeth. Pam troi at lyfrau Saesneg o hyd? A deud y gwir, dwi newydd gytuno i gyfieithu llyfr plant oedd yn Almaeneg yn wreiddiol… mwy am hynny eto – ond DWI WRTH FY MODD!

A newyddion gwych o lawenydd mawr: mae Cyfeillion y Cyngor Llyfrau wedi lansio cystadleuaeth er mwyn cael mwy o nofelau ar gyfer oedolion ifanc. Gwobr o £1,000 ar gyfer y penodau cyntaf & synopsis! Mae gynnoch chi tan Chwefror 20fed 2020, a dyma fwy o fanylion:

Cystadlaeuaeth llunio Nofel 2019

Brysiwch i feddwl am syniad – a SGWENNWCH!

Advertisements

Beth i’w brynu yn y Steddfod?

Published Gorffennaf 26, 2019 by gwanas

Mi fydd ‘na lwyth o lyfrau hen a newydd o bob math ar faes yr Eisteddfod yn Llanrwst, a llwyth o ddigwyddiadau a chyfleon i gyfarfod awduron hefyd. Fel hwn, er enghraifft:

EAJzBwLXsAIbevT

A dwi wedi addo darllen stori yn y Pentre Plant am 3.00 ar y pnawn Llun, sef fy stori yn Straeon Nos Da Sali Mali.

image001

Roedd un arall o’r awduron yn darllen a llofnodi yn y Sioe yn Llanelwedd, sbiwch:

EAKEM6VXUAAGLS5

Ia, Elen Pencwm, efo plentyn mawr iawn ar ei glin – brawd un arall o’r awduron, fel mae’n digwydd! Llyr Ifans yr actor ydi hwnna, a Rhys (actor arall…) sydd wedi bod yn sgwennu.
A dyma’r llun bach sydd ar ddiwedd stori Elen:

20190726_162534

Mae’r llyfr yn un hyfryd, clawr caled, efo tudalennau a lluniau sgleiniog, a dyna pam ei fod yn £12.99. Ond mae’n drysor bach o lyfr, efo 12 o straeon gwahanol. Mi wnes i fwynhau pob un ond mae’n siŵr y bydd rhai gwahanol yn apelio at wahanol ddarllenwyr ifanc.

Mae’n deud ar y cefn y bydd yn apelio at blant o bob oed. Hm, dwi’m yn siwr am hynna, chwaith! Ar gyfer plant iau mae Sali Mali a’i ffrindiau wedi’r cwbl.

Dyma flas i chi o stori Tudur Owen, i chi gael syniad (mae’n un dda!), ac mae ‘na lun mawr fel’na efo pob stori:

20190726_162458

A dyma ddechrau un Rhys Ifans, sydd, fel y byddech chi’n ei ddisgwyl, yn ddigri:
20190726_162445

Mae hyd yn oed Eigra – ia, yr anhygoel Eigra Lewis Roberts (bydd sesiwn amdani hi yn y Babell Lên gyda llaw) wedi cyfrannu stori, ac un dda ydi hi hefyd:

20190726_162523

Mae ‘na fwy nag un Prifardd wedi cyfrannu. Mae Mererid Hopwood yn un arall, ac mae diweddglo ei stori hi’n dangos i chi sut gymeriad sydd gan Mererid. Ydi, mae hi’n un glên ac annwyl, ac yn fardd:

20190726_162604

Mae’n siŵr bod fy stori innau’n deud llawer am fy nghymeriad innau, a dewis sgwennu am Y Pry Bach Tew drwg wnes i…

20190726_163420

Bydd raid i chi brynu/benthyca copi o’r llyfr i weld sut lun mawr ges i! Ac i ddarllen gweddill y straeon.
Llongyfarchiadau i Simon Bradbury am wneud lluniau mor hyfryd.

Gyda llaw, os wnewch chi brynu copi o Barn y mis yma, mae ‘na lawer o sylw i lyfrau plant ynddo, yn cynnwys Straeon Nos Da Sali Mali a nifer o’r llyfrau dwi eisoes wedi eu hadolygu ar y blog yma.

A dwi’n wirioneddol chyffd a diolchgar bod Edenia wedi cael ei chanmol:

20190725_094903

Ieee! Diolch byth. Ar ôl y slepjan gafodd Y Diffeithwch Du ar Radio Cymru, roedd darllen hynna’n ryddhad mawr. Ffiw. A diolch Gwenan Mared am fod mor glen. Plîs wnei di adael i mi brynu diod/cacen i ti yn y Steddfod?

Llyfr dwi wir yn edrych ymlaen at ei ddarllen ydi hwn gan Ifan Morgan Jones:

EAOeJAaXUAAFYY9

Dwi’n meddwl mai ar gyfer oedolion mae o, ond mae’r clawr yn gwneud i mi feddwl efallai fod Babel ar gyfer Oedolion Ifanc (OI) hefyd. Efallai mod i’n anghywir, cofiwch. Ond tydi o’n chwip o glawr?

A sôn am gloriau, mae Gomer wrthi’n ail-gyhoeddi llyfrau Blodwen Jones, fy llyfrau i ar gyfer dysgwyr, ac wedi comisiynu Brett Breckon i wneud cloriau newydd. Ssh, peidiwch a deud, ond dyma fraslun o glawr newydd Bywyd Blodwen Jones. Dwi wedi gwirioni!

BlodwenJ_finalA-W_300Flat

Abertawe ac Aberystwyth

Published Mehefin 15, 2019 by gwanas

Mi fydda i’n gweithio yn Nant Gwrtheyrn drwy’r wythnos nesaf,

news_from_the_nant
ar Gwrs Awduron, sef cwrs am wahanol awduron cyfredol Cymru ar gyfer dysgwyr da. Dyma’r drydedd flwyddyn a dwi’n edrych ymlaen yn arw!

Mae’n gyfnod prysur: es i lawr i Ysgol Tirdeunaw, Abertawe ddydd Iau, i siarad efo plant Blwyddyn 1 a 2 am Cadi dan y Dŵr fel rhan o ŵyl Pop-up. Edrychwch croeso ges i!

D88aXeUWkAMaqZC-1

Nefi, gawson ni hwyl!

20190613_102418

Dyma ni ar ôl bod yn chwarae gêm y sbwriel.

A dyma ni yn dynwared pysgod pwff!

20190613_102514

Mi wnaethon nhw fidio hyfryd wedi i mi adael ond dwi’n rhy dwp i ddeall sut i gynnwys hwnnw fan hyn. Edrychwch ar wefan/llif Twitter Ysgol Tirdeunaw, ac mae o yno. Diolch i chi i gyd am y croeso – a’r lluniau!

20190613_12024120190613_120323

A diolch o galon hefyd i gylchgrawn Lysh, cylchgrawn ar gyfer merched 11-14 oed Cymru.
file

Cylchgrawn digidol newydd a chyfoes yw Lysh, arbennig i ferched ifanc Cymru! Mae Lysh yn rhoi llais i ferched rhwng 11 a 14 oed, ac yn llawn dop o gynnwys gwreiddiol, ffres a slic.

Ac mae’n wir! Ewch i weld drosoch chi eich hun: https://www.lysh.cymru/

Edrychwch ar y fidio yma wnaethon nhw gyda phlant Ysgol Penweddig, Aberystwyth (cliciwch ar y linc isod). Dwi wedi GWIRIONI! Dim ond oedolion sydd wedi rhoi eu barn am drioleg Cyfres y Melanai hyd yma (a doedd pawb ddim yn canmol…) felly mae hyn wir wedi codi fy nghalon i. Swsus mawr diolchgar i ferched Ysgol Penweddig a’u hathrawon, a phob lwc i Lysh!
https://www.lysh.cymru/edenia

Straeon Nos Da Sali Mali

Published Mai 3, 2019 by gwanas

Dwi wedi bod yn rhy brysur yn darllen nofelau oedolion ar gyfer cwrs dysgwyr yn Nant Gwrtheyrn fis nesaf i ddarllen llawer o lyfrau Cymraeg i blant, mae arna i ofn.

Ond dyma newyddion da i chi:

Bydd cyfrol o’r enw Straeon Nos Da Sali Mali yn cael ei chyhoeddi gan Gomer fis nesaf i ddathlu pen-blwydd Sali Mali yn 50 mlwydd oed. Pen-blwydd hapus Sali Mali!

th

Bydd y gyfrol yn cynnwys deuddeg stori gan yr awduron canlynol:-

Heledd Cynwal, Tudur Dylan, Bethan Gwanas (ia, dyna sut dwi’n gwybod am y gyfrol…), Mererid Hopwood, Rhys Ifans, Elis James, Aneirin Karadog, Tudur Owen, Gruffudd Owen, Elen Pencwm, Eigra Lewis Roberts, Ifana Savill.

image001

Roedd rhwydd hynt i’r awduron sgwennu am unrhyw gymeriad o blith ffrindiau Sali Mali, a dewis sgwennu am y Pry Bach Tew wnes i.

th

Ond bydd yr arlunydd Simon Bradbury wedi gwneud lluniau newydd sbon i fynd efo pob stori, yn ogystal â’r clawr hyfryd ‘na a dwi’n eitha siŵr mai un arall o’i luniau o ydi hwn:

th

Del ynde? Edrych ymlaen!

O, ac mae’n rhaid i mi sôn am y blog sgwennais i fis Mawrth am ‘Sut i hybu darllen.’ Dwi wedi darllen 4 o’r llyfrau oedd ar y silff hon bellach, ac wedi mwynhau pob un yn arw!

D19kY0iW0AEoGqs

Mae Splash, Boy in the Tower, Survivors a The Wizards of Once yn arbennig. A faswn i ddim yn gwybod hynny onibai am y silff o lyfrau gafodd ei dewis gan ferch ysgol Blwyddyn 6. Oes gan rywun arall silff debyg i’w dangos i ni?

Un peth arall:
Bu Lleucu Roberts a minnau yn Ysgol Penweddig ddydd Mercher i ddathlu bod ein triolegau ar gyfer yr arddegau wedi eu cyhoeddi – yn swyddogol!

D5etayHW4AEtxDH

Gawson ni dipyn o hwyl efo’r criwiau – Blwyddyn 7 a 9. Croesi bysedd y byddan nhw’n mwynhau darllen y tair – neu’r chwech – nofel rŵan. A tydi clawr Afallon yn wych? Mi wnes i fachu un o’r posteri… peidiwch â deud.

D5Tph07WkAEOXHw

D2qFnVSX0AESyGE

Awydd sgwennu ar gyfer pobl ifanc?

Published Ionawr 29, 2019 by gwanas

71a83a70-33b2-4e9c-89be-b9a98cf8220e

Wps, bosib mod i’n rhy hwyr yn deud hyn ond roedd Tŷ Newydd yn cynnig Sêl Santes Dwynwen am dridiau. Dwi’n siŵr y bydden nhw’n ystyried chydig o lastig o ddiwrnod os wnewch chi gysylltu rŵan neu bore fory, ond mae/roedden nhw’n cynnig gostyngiad o 15% o bris holl gyrsiau Tŷ Newydd yn 2019, yn cynnwys cwrs efo fi, Mawrth 9fed – bargen! Manylion ar y linc isod:

https://www.tynewydd.cymru/cwrs/ysgrifennu-ar-gyfer-plant-phobl-ifanc/
https://www.tynewydd.cymru/blog/cynnig-arbennig-15-i-ffwrdd/

quote-when-i-turned-to-writing-fantasy-and-writing-for-young-people-it-was-joyous-it-was-like-laini-taylor-101-25-68

A sbiwch da ydi’r Tweet yma hefyd. Deud y cwbwl yn fy marn i!

screenshot_20190129-195616_facebook

Gyda llaw, mae ‘Edenia’, y gyfrol olaf yng Nghyfres Y Melanai (i bobl fanc 12+ yn fras) wedi cael ei golygu (diolch, Meinir a Nia Peris) ac mi fydda i’n cael y proflenni cyn bo hir!
Mae hynny’n golygu y dylai hi fod yn y siopau ymhen rhyw ddeufis, dri. Does dim clawr eto, cofiwch, ond mae’n bosib y bydd rhywbeth tebyg i hwn ynddo fo:

d5d8cbbd1a86f021d7bdd6b5d28861f3

Edrych mlaen yn arw i weld y drioleg yn orffenedig!

Trio – cyfres i blant 7-11 oed

Published Hydref 16, 2018 by gwanas

DpKSrzaW4AEYTfA

Mae’n anodd credu, ond mae Manon Steffan Ros wedi cyhoeddi dau lyfr ARALL! Pryd mae’r hogan yn cysgu? Ydi hi’n cysgu o gwbl? Neu ai cysgu’n arbennig o dda mae hi, fel ei bod hi’n llawn egni a syniadau?

Beth bynnag, y ddau lyfr cynta mewn cyfres i blant 7-11 oed ydi’r rhain. Mae’n deud “i’r arddegau” ar Google, ond na, yn bendant ddim. Llyfrau plant cynradd ydi’r rhain. Neu blant hŷn (oedolion, hyd yn oed) sy’n hoffi hiwmor rhyfedd Manon a chymeriadau cwbl nyts, wrth gwrs…

Mae Manon wedi llwyddo unwaith eto i greu cymeriadau gwych, ac mi fydd y gyfres hon yn sicr o apelio.

Tri ffrind ydi Derec Dynamo, Dilys Ddyfeisgar a Clem Clyfar- “Maen nhw’n benderfynol o fod yn griw anturus a llwyddiannus fel clybiau mewn llyfrau hen ffasiwn.”

20181013_132753

A dwi’n rhyw amau mai llyfrau hen ffasiwn fel rhain sy ganddi mewn golwg:

Ond dydi’r trio yma ddim yn glyfar iawn a does ‘na ddim llawer o ‘ddynamo’ yn Derec druan. “Trio, ond byth yn llwyddo!” mae plant eraill yn yr ysgol yn ei ddeud amdanyn nhw, bechod.

Ond: mae pethau od a rhyfedd yn gallu digwydd, ac wrth gwrs, maen nhw. Fel Dilys yn meddwl y byddai’n gallu gweld yn well drwy wneud sbectol allan o foron…

20181013_132835

Haaa!

Mi wnes i wir fwynhau’r ddwy stori, yn bennaf oherwydd y pethau mae’r cymeriadau yn eu gwneud a’u deud (dwi’n siŵr bod o leia un o feibion Manon wedi cyfrannu at y jôcs) ond hefyd, mae hi wedi gosod y straeon yng Nghastell Caernarfon a Chanolfan y Mileniwm, llefydd go iawn.

20181013_132925

Syniad clyfar – sut i wneud y mannau hyn hyd yn oed yn fwy diddorol i blant Cymru. A lluniau gwych gan Huw Aaron ynde!

Diolch i gwmni Atebol am yrru’r copiau ata i, ac os oes ‘na weisg eraill isio i mi flogio am eu llyfrau nhw – dach chi’n gwybod lle dwi’n byw…

Mwynhewch y darllen!

Ac o ia, mae gen inna lyfr allan yr wythnos yma (ia, dim ond un, ac nid ar gyfer plant 7-11 ond rhai fymryn yn hŷn: 12-15 oed). Mae Y Diffeithwch Du wedi cyrraedd y siopau.

9781784616526

Sef dilyniant i Efa:

EFA6

A bydd y 3ydd llyfr yn y siopau yn 2019. Ydw, dwi’n cymryd chydig mwy o amser na Manon. Bydd raid i mi fynd i ngwely yn gynt…

Clawr y Diffeithwch Du

Published Medi 26, 2018 by gwanas

Dyma fo – y clawr terfynol, wedi ei ddylunio gan Tanwen Haf, diolch Tanwen!

20180926_175004

Ydi, mae’r llun bach ohona i yn hen, ond tyff, dwi’n ei licio fo! Iolo Penri dynnodd hwnna – a diolch Iolo. xx

Yn ôl Meinir, y golygydd, mae’r testun ar fin mynd i brint. Weihei! O ia, hon ydi’r ail nofel yng nghyfres y Melanai, rhag ofn eich bod chi wedi drysu.

Efa oedd y nofel gyntaf:

EFA6

A do, dwi wedi hen orffen sgwennu Llyfr 3 ond bydd raid aros am ymateb y PWYLLGOR PWYSIG cyn i honno ddechrau cael ei golygu. Rhywfaint o ail-sgwennu efallai – gawn ni weld. A gawn ni weld be fydd clawr honno yn 2019.

Do, dwi wedi ecseitio’n lân/cynhyrfu’n rhacs!

Gyda llaw – ydach chi’n meddwl y dylid cynnwys brawddeg yn Saesneg am lyfrau gwreiddiol Cymraeg? Rhywbeth ar gyfer rhieni di-Gymraeg, fel “This is a fantasy novel for young people”? Oes angen nodi oedran?