Cyfres Clec

All posts tagged Cyfres Clec

Llyfrau i blant 5-8 oed

Published Tachwedd 3, 2017 by gwanas

image

Hwre! Mi ges i ddau becyn hyfryd o lyfrau plant yn y post heddiw, digon o ddeunydd darllen a blogio am wythnosau! Lle i gychwyn?! Wel, dwi wedi penderfynu mai’r ddau lyfr yma fydd yn cael fy sylw i gynta, dau arall sy’n perthyn i ‘Cyfres Clec’, cyfres wreiddiol o ‘straeon denu darllen’:
Dyn Bach y Cloc a Deiniol y Dylwythen Deg Drwsgl gan Leusa Fflur Llewelyn a Ar Goll ac Alwena Breichia Tena gan Anni Llŷn.
Oes, mae ‘na ddwy stori ym mhob llyfr, ac maen nhw wedi eu hanelu at blant 6+ ond mi fydd plant 5 oed yn mwynhau clywed oedolyn neu chwaer/brawd hŷn yn eu darllen yn uchel iddyn nhw hefyd.
Maen nhw am blant y gall plant heddiw uniaethu â nhw, ac mae pob stori yn llawn hwyl a dychymyg hyfryd.

Dyma dudalen gyntaf Dyn Bach y Cloc:

image

Ia, stori ydi hon am ddyn bach od sy’n byw yn y Cloc Taid yng nghartref hogyn bach o’r enw Guto Alun. Stori hyfryd sy’n dangos dychymyg gwych a boncyrs Leusa Fflur

n7bIRU48_400x400

(sy’n ferch i’r awdures Haf Llewelyn ac sy’n gweithio yng nghanol beirdd ac awduron o bob man yng Nghanolfan Ysgrifennu Tŷ Newydd, felly be dach chi’n ddisgwyl?)

Mae’r syniad yn un digri a’r deud yn hyfryd:

“Siŵr iawn mai Taid ydi fy enw! Pam goblyn arall fyddech chi’n galw cloc yn Cloc Taid?’

Mae’r ddau yn gallu teithio’n ôl a mlaen drwy amser drwy droi bysedd y cloc – wrth gwrs, sy’n syniad mor amlwg (rŵan!) a gwych, mae’n bechod mewn ffordd na chawson ni fwy o anturiaethau Guto Alun a’r dyn bach od o’r enw Taid. Deunydd cyfres ddeudwn i.

A dyma ddechrau’r ail stori:

image

Na, nid tylwyth teg bach ciwt mewn ffrils pinc fan hyn, ond dyn bach bler efo barf mor hir, mae’n mynd yn sownd yn ei adenydd! Ac mae o’n gallu rhoi dymuniadau i Sandra – unrhyw beth mae hi ei isio yn y byd i gyd. Be fyddech chi wedi ei ddymuno tybed? Syniadau gwreiddiol, gwahanol yn hon eto a dawn deud bendigedig:

image

Mae’r diweddglo yn un annisgwyl (ond efallai mai fi sy’n farus…) ac yn siŵr o fod yn destun trafod amser gwely: pa ddymuniad fyddech chi wedi mynd amdano ar y diwedd tybed? Da iawn – llyfr gwreiddiol arall i’r silffoedd o lyfrau Cymraeg gan awduron o Gymru.

Gyda llaw, Hannah Doyle, merch yr awdur gwych Malachy Doyle sydd wedi gwneud y lluniau ar gyfer y gyfres i gyd ( 6 llyfr rŵan).

IMG_20131024_133528

Mae hi’n byw yn Ysbyty Ystwyth ger Aberystwyth. Does ‘na lwyth o arlunwyr lluniau plant yn byw yn yr ardal yna? Jest lle creadigol sy’n ysbrydoli, mae’n rhaid.

Iawn, yr ail gyfrol rŵan, gan Anni Llŷn:

annillyn01

Dyma dudalen gyntaf y stori gyntaf:

image

Stori Gymreig iawn! A hyfryd os gai ddeud, am wahanol bethau sydd wedi mynd ar goll ar y maes dros wythnos yr Eisteddfod ac yn hel llwch mewn bocs yn y swyddfa am fod staff y Steddfod i gyd yn mynd ar eu gwyliau yn syth ar ôl y lladdfa eisteddfodol. Syniad gwych de?

image

Llyfr llofnodion ydi seren y stori, ac mae llofnod Elin Fflur a George North ynddo fo! Cymreig a pherthnasol iawn eto. Mae’r ddau yn siŵr o fod yn sêr am sbel eto felly ddylen nhw ddim dyddio’r llyfr yn arw, chwarae teg. Mi ges i fy nghynghori i dynnu enw band Eden allan o un o fy llyfrau i oherwydd y byddai’n dyddio’r llyfr – oedd yn wir. Ond maen nhw wedi gneud ‘cymbac’ yndo!

eden-llun-cwmni-sain

Mae ‘na ddiwedd hapus i’r stori, diolch byth. Iawn, be am yr ail stori am Alwena Breichia Tena, sy’n ysu i chwarae rygbi? Mae hi’n eiddil a gwan a phawb yn meddwl ei bod hi’n rhy wan i chwarae gêm mor ryff – ond o, nacdi, dydi hi ddim! Fel un sydd wedi chwarae rygbi fy hun, ro’n i wrth fy modd efo’r stori hon ond mae gen i un gwyn fach yn ymwneud â’r dudalen yma:

image

Yn hytrach na llun o Mam yn chwerthin, ro’n i isio gweld pam roedd hi’n chwerthin! Roedd y darn yma’n sgrechian am lun o Alwena’n edrych yn hurt mewn dillad a sgidiau rygbi rhy fawr! Mi fyddai lluniau ‘cyn’ ac ‘wedyn’ wedi bod yn grêt. O wel. Ond dwi ddim yn cwyno go iawn. A bosib mai jest fi ydi o.

Dau lyfr hyfryd, llawn hiwmor gan ddwy awdures arbennig. Diolch yn fawr Gwasg Carreg Gwalch! £4.99 yr un – anrhegion Nadolig ardderchog.

Hoff Lyfrau Anni Llŷn

Published Rhagfyr 16, 2016 by gwanas

Yr awdur diweddaraf i ateb fy nghwestiynau am ei hoff lyfrau plant ydi Anni Llŷn, sef Bardd Plant Cymru 2015-17, cyflwynydd pob math o raglenni plant a rhywun hynod dalentog sy’n gallu troi ei llaw at bob math o bethau!

annillyn01

p03c4ngn

Fel mae ei henw yn awgrymu, mae’n dod o Ben Llŷn ( Sarn Mellteyrn) ond yn byw yng Nghaerdydd ers tro. Mae newydd briodi Tudur Phillips ( rhywun arall hynod dalentog)

co2gdktwcaa8sgs

Ro’n i yn y parti priodas fel mae’n digwydd – noson dda!

A dyma rai o’i llyfrau hi:

9781847718402

A dyma atebion Anni:

Pa lyfrau oeddet ti’n eu hoffi yn blentyn?

Ysgol Gynradd:

Cymraeg – wrth fy modd pan o’dd Mam yn darllan cyfrola’r Mabinogion gan Gwyn Thomas efo lluniau hudolus Margaret Jones.

51ynd89s4l-_sx356_bo1204203200_

Saesneg – dwi’n cofio cael cyfnod o ddarllen Jaqueline Wilson ond does ’na ddim un llyfr penodol yn aros yn y cof.

Ysgol Uwchradd:

Llinyn Trôns, Bethan Gwanas!!  ( Diolch Anni – Bethan)

51m-rbd55hl

Luned Bengoch, Elisabeth Watkin-Jones.

c09999636887293596f79706741434f414f4141

Dwi ddim yn cofio llawer o lyfra Saesneg ond dwi yn cofio darllen llyfra Roald Dahl – dim clem pa oed!

  1. Wyt ti’n dal i ddarllen llyfrau plant? Pa rai wyt ti wedi eu hoffi’n ddiweddar?

Nes i ddarllen ‘Gwalia’, Llyr Titus (gwych!)

getimg

a ‘Pedair Cainc y Mabinogi’, Sian Lewis ddechra’r flwyddyn

9781849672276_1024x1024

ynghyd ac addasiadau Cymraeg o lyfra Roald Dahl.

Dwi newydd brynu ‘Pluen’ Manon Steffan Ross,

getimg

edrych ymlaen i’w darllen a dwi wrthi’n darllen llyfrau Cyfres Clec, Gwasg Carreg Gwalch. Dwi’n darllen cyfrolau barddonol i blant yn weddol aml, ‘Agor Llenni’r Llygaid’, Aneirin Karadog yn dda!

agor_llennir_llygaidmawr

  1. Pwy ydi dy hoff ddylunydd/arlunydd llyfrau? Pam?

Wnaeth Valériane Leblond ddarluniau cwbl arbennig i fy nghyfrol farddoniaeth i ‘Dim Ond traed Brain’, wrth fy modd efo’i gwaith hi.

dim_ond_traed_brain

Dwi newydd fod yn gweithio ar gyfrol ddwyieithog fydd allan cyn bo hir gyda elusen BookTrust Cymru o’r enw ‘Pob un bwni’n dawnsio!’ – llyfr ‘Everybunny Dance!’ gan Ellie Sandall ac mae ei darlunia hi’n hyfryd hefyd.

everybunny-dance-9781481498227_hr

  1. Be nath i ti ddechrau sgwennu?

Dwi ddim yn gwybod be nath i mi ddechra sgwennu ond mwya’n byd dwi’n meddwl pam mod i’n gwneud dwi’n teimlo mai rhyw chwilfrydedd ydi o. Dwi’n rhyfeddu at allu awduron i fod yn bwerus gyda geiriau, i fedru creu bydoedd, i athronyddu, i gwmpasu teimladau a syniadau. Dwi’n hoffi’r syniad o fynd mewn i dy ben dy hun a herio dy hun i ddarganfod y plethiad mwyaf effeithiol o eiriau i gyfleu beth bynnag sy ’na. Ond dim ond pan dwi’n ystyried y peth go iawn dwi’n meddwl am hynny i gyd. Dwi’n meddwl mai’r ateb syml ydi mod i’n mwynhau gwneud a thrwy wneud, dwi’n gobeithio fy mod i’n annog plant i ddarllen ac ymddiddori mewn sgwennu eu hunain.

  1. Be wyt ti’n ei fwynhau fwya am sgwennu?

Y rhyddid, does dim rhaid cael ffiniau o gwbwl!

  1. Dwed chydig am dy nofel ddiweddara i blant.

Dwi heb gyhoeddi nofel ers ‘Asiant A’ –

9781847718402

nofel ysgafn am ferch ysgol sy’n ysbïwraig gudd. Ond yn y misoedd dwytha wedi cyhoeddi straeon i blant bach – ‘Cyw yn yr Ysbyty’ a ‘Fy llyfr Nadolig cyntaf’

sy’n lyfrau bach syml i blant meithrin, neu wrth gwrs, yn lyfrau da i blantos sy’n dechrau darllen!

  1. Pa lyfr(au) plant sydd ar y ffordd nesa gen ti?

Ar y ffordd, mae ’na gyfrol farddonol ar y cyd â beirdd eraill a nofel ddoniol i blantos cyfnod allweddol 2!

Diolch yn fawr Anni – edrych mlaen at weld y nofel ddoniol newydd!

Cyfres Clec i blant 6+

Published Tachwedd 4, 2016 by gwanas

Hwre! Mae ‘na ddau lyfr arall ar gael ar gyfer plant 6+ yn y gyfres Cyfres Clec gan Wasg Carreg Gwalch: Y Bws Hud/OMB a Gwely Haul/Pen-blwydd Hapus Anna a Hanna:fullsizerender

image

Mae’r gyfres gan wahanol awduron, felly bydd gwahanol lyfrau yn apelio at blant gwahanol. Dwy stori sydd ym mhob un hefyd, felly os na fyddwch chi’n hoffi un stori ryw lawer, efallai y byddwch chi’n hoffi’r llall! Neu, os ydach chi’n hoffi’r ddwy – pleser dwbwl amdani.

Dwi’m wedi cael cyfle i weld be ydi barn criw fy nheulu i am rhain eto, ond braf fyddai cael eich barn chi ( neu eich plant/disgyblion chi, os mai oedolion ydach chi) am y gyfres hon.

Ond yn bendant, os dach chi isio tynnu eu sylw at yr amgylchedd, llanast a sbwriel ac ati, mae stori cawr OMB – Orig Mwyn Benfawr, gan Eurgain Haf jest y peth.

imageOnd mae’n stori fach hyfryd am gawr sy’n wahanol i gewri eraill, hefyd. Hon oedd fy ffefryn i o’r pedair stori, yn bendant.

Mae’r Bws Hud yn llawn dychymyg hefyd, a lluniau Hannah Doyle yn siwr o godi gwên (sori, mae rhoi to bach ar ‘w’ yn boen ar y peiriant yma).

Haf Roberts ydi awdur y gyfrol arall, a bydd hanes Gwil Gwylan (gwylan glên sydd byth yn “plymio’n ddirybudd o’r awyr a dwyn sglodion a sos coch plentyn bach llwglyd”) yn handi iawn ar gyfer dysgu plant am ddaearyddiaeth Cymru, yn ogystal â rhoi gwers wyddoniaeth am yr haul.

image

Stori am efeilliaid cwbl wahanol i’w gilydd ydi’r ail stori ganddi. Mi fydd plant sydd unai’n hoffi neu’n casau pethau pinc yn chwerthin wrth ddarllen hon, dybiwn i.

£4.99 yr un – bargen am lyfrau gwreiddiol, Cymraeg!

O, a dyma restr gwerthwyr gorau llyfrau plant ar gyfer mis Hydref:

http://www.gwales.com/ecat/?sf_ecat_id=1104&tsid=3

6 llyfr gwreiddiol yn y 10 uchaf – da iawn!  Ac mae Pluen, nofel newydd Manon Steffan Ros ar gyfer plant 9-11 oed yn eu mysg.

getimg

Dwi’m wedi cael fy nwylo ar hon eto ond dwi’n ysu am wneud!

Awdur newydd Cymraeg!

Published Mawrth 26, 2016 by gwanas

Wel  gofynnwch a chwi a gewch! Y diwrnod ar ôl sgwennu yn fan hyn nad ydw i wedi gweld llyfr plant newydd ers tro, daeth pecyn yn y post gan Wasg Carreg Gwalch, oedd yn cynnwys hwn!

image

Dyma’r ail yng nghyfres newydd ‘Cyfres Clec’, cyfrolau sy’n cynnwys dwy stori fer ‘Straeon denu darllen’ wedi eu hanelu at blant 6+, efo lluniau bach digri gan Hannah Doyle.image

A phwy ydi’r awdur tro ‘ma? Rhywun dwi’n digwydd ei nabod: Dafydd Llewelyn o Abergele’n wreiddiol, ond sy’n byw yng Nghaerdydd ers blynyddoedd bellach.

A boi swil achos er i mi googlo am sbel, ddois i ddim o hyd i lun ohono fo! Ac ynta efo mop o wallt coch del…

Dyma’r llyfr plant cyntaf iddo ei sgwennu, ond gan fod gan y boi ddawn deud a hiwmor sy’n gallu ymylu ar y boncyrs, dwi’n gobeithio y bydd o’n sgwennu llawer mwy ar gyfer plant rwan.

Ar ôl gwneud gwaith ymchwil a dysgu am chydig, mi gafodd swydd fel  Golygydd Sgriptiau ‘Pobol y Cwm’ – a fanno fuodd o am flynyddoedd, gan sgwennu ambell ddrama bob hyn a hyn. Mae o wedi ennill llwyth o wobrau am ei ddramau dros y blynyddoedd, a siawns na chaiff o rai am lyfrau yn y dyfodol!

Dyma i chi dudalen gynta’r llyfr:

image

Gwahanol tydi? Ac mi fyddwch chi’n siwr o fwynhau hanes Morgan a’i gariad at gerddoriaeth a’r ffordd mae’r morgrug eraill yn flin efo fo am beidio gweithio, gweithio, gweithio fel pawb arall.

Honna ydi fy ffefryn i. Mae’r ail stori am y melysion yn ddigri hefyd, ond ddim yn gorffen cweit cystal – yn fy marn i – a dim ond fy marn i ydi hynny – a dwi’n hen ddynes.

Be fydd eich barn chi sgwn i? Darllenwch a rhowch wybod – yn enwedig os dach chi isio canmol achos dwi wir yn meddwl bod angen annog Mr Dafydd Llewelyn i sgwennu mwy ar gyfer yr oedran yma, a llyfrau mwy o faint hefyd, ar gyfer plant sydd wir yn mwynhau darllen ac isio rhywbeth i gael eu dannedd i mewn iddo. Nid i mewn i’r awdur – i’r llyfr. Dyyyh…

Be amdani? Rhowch gomisiwn iddo fo Wasg Carreg Gwalch. Llyfr tewach tro nesa, nofel. Ar gyfer plant tua 9-11? Dyna fyswn i’n ei neud taswn i’n chi/fo.