cyfaill darllen

All posts tagged cyfaill darllen

Syniadau gwych ar gyfer Bl 1 a 2

Published Tachwedd 15, 2019 by gwanas

Mi ges i ddiwrnod prysur ond hynod ddifyr a phleserus ddoe. I ddechrau, ro’n i wedi cael gwahoddiad i Barti Hud Ysgol Bro Cinmeirch, fy ysgol ‘Cyfaill Darllen.’ Roedd plant Blwyddyn 1 a 2 wedi bod yn hynod brysur yn gwneud pob math o weithgareddau yn seiliedig ar Coeden Cadi

9781784612252

ac yn mynd i wisgo i fyny fel corachod a thylwyth teg ac wedi gofyn i minnau wneud yr un peth! Felly sbiwch be ddois i o hyd iddo fo mewn siop elusen yn Nolgellau:

EJQX4LaWwAY4Qad

A choron hefyd! Achos mae na frenhines y tylwyth teg yn y llyfr, felly fi oedd honno siwr iawn…

a dyma lun ohonon ni – a’r plant yn chwifio’r ffonau hud wnaethon nhw:

20191115_095758

Roedd y plant eu hunain a’r staff wedi meddwl am bob math o weithgareddau yn deillio o’r llyfr:

EF9iHYkWsAMikFP

Sgwennu a pherfformio eu rheolau eu hunain ar gyfer teithio ar yr enfys (achos mae ‘na reolau yn y llyfr)

20191115_123654

sgwennu o bob math a deud y gwir, a chliciwch ar y llun uchod i weld y bwyd hud wnaethon nhw, a cherbydau hud ar gyfer y corachod, a Byd yr Enfys mewn bocsiau esgidiau, a chelf arbennig o drigolion yr enfys. Dyma fwy i chi:

20191114_113243

Ac yn y parti ddoe, mi ges i weld dawns FFANTASTIG wnaethon nhw! A gweld triciau hud a chlywed jôcs:

20191114_112038

Heb sôn am y gân wirioneddol hyfryd wnaethon nhw ei chyfansoddi efo help Sam (oedd ddim yno ddoe, yn anffodus):

20191114_110150

Mi ges i flasu un o’r cacennau wnaethon nhw:
20191115_123808

a wir i chi, roedd arogl yr enfys arnyn nhw – a blas enfysaidd hefyd!

Ro’n i wir wedi mopio, gwirioni a rhyfeddu at yr holl syniadau a gweithgareddau oedd wedi deillio o fy llyfr bach i. A phan ofynnais i pam oedden nhw wedi dewis Coeden Cadi: am fod Miss Davies wedi cael llond bol ar wneud y Gryffalo! Ond roedd hi eisiau defnyddio coed fel thema (dwi’n meddwl), ac mi gofiodd rhywun bod ‘na goed (wel, coeden) yn Coeden Cadi…

5259-Y-Gruffalo

Felly dyna brofi nad oes angen troi at lyfrau Saesneg o hyd (hyd yn oed os ydyn nhw’n glasuron) a bod ‘na lyfrau Cymraeg allan fan’na sy’n gallu bod cystal. Dwi isio deud ‘os nad gwell’ ond mi fysa hynna’n rhy… wchi… yn bysa… (fi sgwennodd Coeden Cadi wedi’r cwbl).

Wedyn y noson honno es i yn fy mlaen (fy mol yn llawn cacen hud a fy llygaid yn llawn enfysau) i Fenllech, Ynys Môn i holi Marlyn Sanuel am ei 4edd nofel ar gyfer oedolion, Cicio’r Bwced. Os oes gynnoch chi rieni neu neiniau a theidiau sy’n mwynhau chwerthin, mae’r nofel hon yn wirioneddol ddigri! A thrist hefyd weithiau… ond noson hwyliog tu hwnt oedd hon, efo John ac Alun yn ei morio hi:

77352022_10156816542928511_8138111535768666112_n

y lle mor llawn, roedd rhaid chwilio am fwy o gadeiriau:

76263486_10156816542573511_993693632286425088_n

ac mi werthwyd pob un copi o’r llyfr!

76249344_10156816542853511_4857577496033361920_n

Roedd hud Bro Cinmeirch wedi cyrraedd Ynys Môn yn amlwg…

Cyfaill darllen a Nadolig Gwyntog Rwdolff

Published Rhagfyr 19, 2017 by gwanas

Mi fues i ar fy ymweliad un-bob-tymor i Ysgol Bro Cinmeirch bore ma. Dwi’n ‘Gyfaill Darllen’ iddyn nhw ers blynyddoedd rŵan, ers i gynllun ‘Patron of Reading’ ddechrau. Hynny yw, dwi’n mynd yno i ddarllen ac i drafod llyfrau yn rheolaidd, a dwi wrth fy modd efo’r ffaith fy mod i’n nabod y plant a’r plant yn fy nabod i. Iawn, dwi’m yn cofio enwau pawb – dwi’m yn eu gweld nhw mor aml â hynna! Ond dwi’n cofio be maen nhw’n hoffi ei ddarllen…
Dyma ni bore ma, efo’r rhai oedd wedi cael sticeri Sêr Darllen a Darllenwyr Da yn Blwyddyn 5 a 6:

image

Roedd yr athrawon yn enwebu darllenwyr o bob blwyddyn; maen nhw’n gneud hynny bob tymor, a dwi’n siŵr bod hynny yn eu hannog i ddal ati i ddarllen ac i drio cael eu henwebu y tro nesa. Ond hyd y gwn i, fi ydi’r unig awdur sydd wedi ei mabwysiadu fel cyfaill darllen Cymraeg. Mae na gannoedd o rai Saesneg yn Lloegr a’r Alban! Dowch ysgolion Cymraeg, y cwbl sydd ei angen ydi dewis awdur, a thalu am eu hamser am fore neu bnawn. Gwell dewis un gweddol leol i osgoi costau teithio mawr. Rhowch gynnig arni yn 2018. Rhowch ‘Patron of reading’ yn Google am fwy o wybodaeth.

Dwi’m yn gwybod os ydi hyrwyddo darllen wedi cyfrannu at lwyddiant sgwennu creadigol y criw ond daeth 2 o blant Ysgol Cinmeirch i’r brig yn Nghystadleuaeth Straeon Nadolig Aled Huws. Un yn agos iawn iawn, sef Alex a dyma hi – efo fi yn darllen ei stori hyfryd o flaen gweddill yr ysgol:

image

A dyma’r bachgen gafodd ei ddewis fel un o’r 5 awdur gorau yn darllen ei stori yntau:

image

Gewch chi wybod ei enw o bore fory, ar Radio Cymru, achos ei stori o fydd yn cael ei darlledu y tro yma! Sgwn i os fydd yr actor go iawn yn ei darllen cystal ag y gwnaeth yr awdur bore ma…

Un stori wnes i ei darllen i’r criw iau oedd hwn:

image

Nadolig Gwyntog Rwdolff. Ia, addasiad, a dwi’n trio osgoi rhoi sylw i addasiadau ar draul llyfrau gwreiddiol Cymraeg, ond mae hwn yn addasiad mor dda, alla i ddim peidio.

image

Dewi Pws a’i wraig hyfryd, Rhiannon sydd wedi ei addasu, a gan fod y stori ar ffurf mydr ac odl, doedd hynny ddim yn hawdd.

image

Ond maen nhw wedi llwyddo’n wych efo’r stori hon am Rwdolff druan yn pwmpian/cnecu dragwyddol oherwydd ei fod wedi bwyta gormod o sbrowts!

imageimage

Gwych. Da iawn Dewi a Rhiannon. Roedd y plant yn eu dyblau! Yn bendant, does na ddim digon o lyfrau Cymraeg yn sôn am bwmpian a chnecu ac ati. Felly dwi’n gobeithio llenwi’r bwlch fymryn efo antur nesa Cadi…

Llyfrau i wneud i chi chwerthin

Published Mawrth 12, 2015 by gwanas

Dyna’r dasg ro’n i wedi ei gosod i ddisgyblion Bl 3, 4, 5 a 6 Ysgol Bro Cinmeirch, lle dwi’n Gyfaill Darllen: dod o hyd i, darllen a rhannu llyfrau oedd yn gwneud iddyn nhw chwerthin.
Roedd ‘na lawer o rai Saesneg wrth gwrs, a nifer fawr o Henri Helynts, Tudur Budurs ac ati, ond addasiadau ydi’r rheiny, drapia!
Doedd neb wedi dod o hyd i lyfr Cymraeg, wedi ei sgwennu gan awdur Cymraeg, oedd wedi gwneud iddyn nhw chwerthin?
Oedd, diolch byth!
photo1

Hwre am Yr Wmp o Blwmp! A Llongyfarchiadau i’r awdures, Dwynwen Lloyd Llywelyn! Dyma i chi’r adolygiad ar wefan gwales.com :

Adolygiad Gwales
Ond dyw hi’n braf cael llyfrau gwreiddiol Cymraeg? Mae yna groeso mawr, felly, i gyfres Lolipop gan Gomer. Dyma stori gan awdures newydd – Dwynwen Lloyd Llywelyn – ond un sydd â phrofiad helaeth mewn ysgrifennu ar gyfer y theatr ac y mae dawn Dwynwen i ysgrfennu deialog yn amlwg yn y gyfrol hon.

Hanes efeilliaid a geir yn y stori hon, efeilliaid tawel iawn ar ddechrau’r gyfrol ond os oes rhywun yn achosi iddynt siarad – wel, yr Wmp o Blwmp yw hwnnw. Dyma greadur glas, blewog a chrwn a ddarganfuwyd yn ystafell wely Defi a Dewi. Ers iddo gyrraedd, mae popeth rywsut yn llwyddo. Mae’r efeilliaid yn siarad, ac yn fwy na hynny mae’r ddau yn llwyddo i roi taw ar fwli mawr Blwyddyn 6 a’i antics. Mae yna ddigon o gyffro yn y stori hon, a phob canmoliaeth hefyd i Helen Flook am y lluniau.

Dyma lyfr addas i’w ddarllen i unrhyw blentyn ond fe fydden ni’n tybio ei fod yn bennaf addas ar gyfer oed darllen Blynyddoedd 2 a 3. Edrychwn ymlaen at straeon eraill yn y gyfres Lolipop.

Sarah Down-Roberts

Iawn, felly prynwch o (£4.99) neu ei fenthyg o’r llyfrgell. Wedyn bydd yr awdures yn cael rhywfaint o £ fydd yn ei galluogi a’i hysbrydoli i sgwennu mwy o lyfrau gwreiddiol, Cymraeg i wneud i chi chwerthin. Dydi David Walliams ddim yn brin o bres, felly mi allwch chi fenthyca llyfrau hwnnw i’ch gilydd heb deimlo’n euog. A fydd Gruffudd Antur, sydd wedi addasu un o’i lyfrau i’r Gymraeg ddim yn cael ceiniog yn sgîl gwerthiant y llyfr. Yr awdur gwreiddiol sy’n cael y breindal dach chi’n gweld.

Chwarae teg, roedd un disgybl wedi dewis hwn hefyd, llyfr am neiniau oedd wedi ei sgwennu ymhell cyn y llyfr Saesneg am nain, ac sy’n llawer gwell hefyd, yn fy marn i! Nain! Nain! Nain! gan Sian Eirian Rees Davies – darllenwch o i weld os ydach chi’n cytuno.

image

Roedd un o Bl 6 wedi dewis Pen Dafad hefyd, diolch byth!

Unknown-1

Be amdanoch chi? Oes ‘na lyfrau Cymraeg wedi gwneud i chi/eich brodyr/chwiorydd/rhieni/ffrindiau chwerthin?
Mi wnes i ofyn y cwestiwn ar Facebook, a dyna sut ges i wybod am hwn, Straeon Bobli Blaidd gan Catherine Jones:
getimg

A hei, ydi, mae o’n ddigri! 4 stori am deulu o fleiddiaid sy’n llawn cymeriad a dawn deud. Mae o allan ers 2010, ond chafodd o fawr o sylw felly does neb yn gwybod amdano. Grrrr… wel, dach chi’n gwybod rwan!
Addas i oed 7-9 neu Cyfnod Allweddol 2 yn ôl Gwales. A dwi wedi ychwanegu adolygiad cwsmer a 5 seren:
“Gwych! Straeon wirioneddol ddoniol. Iaith eitha gogleddol ond ddylai hynny ddim cadw’r deheuwyr draw. Dawn dweud a straeon wnaeth i mi chwerthin. Lluniau gwych hefyd.”

Be am i chi wneud yr un peth? Neu rhowch wybod i mi ar hwn, ac mi wnai roi sylw i’r llyfrau hynny.
A dyma i chi fwy o lyfrau digri:
Unknowngetimg.phpimage

A hwn:
getimg.php
Llyfr llawn hwyl sy’n cynnwys posau, jôcs, gêmau a storïau am gymeriadau fel Capten Clonc a’r Prif Cop. Oriau o chwerthin i blant o bob oed.

Roedd yr awdur, Huw Aaron yn un o’r criw oedd yn cymryd rhan yn Sioe Lyfrau Fwya’r Byd yng Nghaernarfon wythnos yma. Sbiwch ciw oedd ar ei gyfer o wedyn:
ciw

A dim ond un neu ddau oedd i fi a Gruffudd:
photo2 Hoffi’r ffoto-bomiwr?!
A dydi hwn ddim yn lun gwych, ond mae’n dangos y gwahaniaeth mewn maint ciwiau…
photo ciw
Does dim pwynt trio cystadlu efo cartwnydd…

Gyda llaw, yn Ysgol Cinmeirch, rydan ni’n rhoi bathodynnau arbennig i’r sêr darllen, a dyma i chi lun neu ddau:
gwobrauphoto3
Da iawn pawb! Daliwch ati.

O, a dyma fy hoff lun o Ddiwrnod y Llyfr: Awen o Ysgol Treganna efo’i hoff lyfr! Ieee! Gwylliaid!
Awen
Diolch Awen… ti’n grêt. xx

Ysgol Bro Cinmeirch

Published Rhagfyr 17, 2014 by gwanas

Dim ond isio dymuno Nadolig Llawen i holl blant a staff Ysgol Bro Cinmeirch gan eu Cyfaill Darllen. Ia, fi ydi honno, rhag ofn eich bod wedi anghofio!

image

Gobeithio y bydd ‘na lond gwlad o lyfrau difyr yn eich sannau Dolig wythnos nesa, a chofiwch ddeud wrtha i amdanyn nhw fis Mawrth. Mi fydda i isio gwybod am lyfrau sy’n gwneud i chi chwerthin y tro yma!

Fel hwn o bosib?

Unknown

Neu hwn tybed?

getimg.php

A be am hwn?

getimg-1.php

Ydach chi wedi eu darllen nhw sgwn i? Be oeddech chi’n ei feddwl? Wnaethoch chi chwerthin?

Os oes ‘na rywun yn gallu argymell llyfr doniol, digri, da ar gyfer plant cynradd, rhowch wybod ar y blog yma os gwelwch yn dda. Diolch!

Cyfaill Darllen a Llyfrau am Anifeiliaid

Published Hydref 10, 2014 by gwanas

Photo on 10-10-2014 at 13.52

Fues i yn Ysgol Bro Cinmeirch eto, ar fy ymweliad rheolaidd fel Cyfaill Darllen ( Patron of Reading). Pleser bob amser!
A’r tro yma, ro’n i wedi gosod cystadleuaeth, i bawb yn Bl 3,4,5 a 6 wneud lluniau o Rhys a Mari, prif gymeriadau Gwylliaid
image

A dyma i chi’r lluniau ro’n i’n eu hoffi fwya.

Photo on 10-10-2014 at 13.52

Mi wnes i anghofio sgwennu’r manylion i lawr, ond dwi’n 99% siwr mai Cari enillodd, yr un ieuenga ohonyn nhw i gyd – yn Bl 3! Dwi’n arbennig o hoff o’r ci, a gwallt Mari. Do, mi gafodd wobr gen i – copi o Gwylliaid. Ro’n i wedi bwriadu sgwennu neges y tu mewn, ond aeth amser yn drech na ni am ryw reswm, felly os wnei di ddod a’r llyfr i’r ysgol efo ti y tro nesa, mi wnai sgwennu neges bryd hynny, Cari!

Trafod llyfrau am anifeiliaid fuon ni efo’r rhai h^yn, ac roedd sawl un wedi dod â llyfrau Michael Morpurgo efo nhw, oedd ddim yn sioc o gwbl; mae o’n sgwennu’n wych am anifeiliaid. Ond mi ges i sioc bod cymaint o lyfrau am ddreigiau! Roedd eu Cyfaill Darllen Saesneg, Shoo Rayner, newydd fod draw hefyd,ac roedd pawb yn canmol hwn:

Unknown-1

Roedd Efa wedi mwynhau “One dog and his boy” gan Eva Ibbotson ( yr un wnes i ei argymell)

Unknown-3

ond roedd hi’n canmol “Sky Hawk” gan Gill Lewis i’r cymylau.

Unknown-2

Felly dwi’n bendant am ddarllen hwnna rwan. Ac mae ‘na fersiwn Gymraeg:

getimg-2

Addasiad gan Elin Meek. Ond mynd am y gwreiddiol fydda i, a bod yn gwbl onest. Ydw, dwi’n un styfnig!

Barn y plant

Published Mehefin 5, 2014 by gwanas

Mi fues i yn Ysgol Bro Cinmeirch eto ddydd Mercher, fy ysgol Cyfaill Darllen. Os nad ydach chi’n gwybod be mae hynna’n ei feddwl, sbiwch ar wefan patronofreading.com
Dwi bron yn siwr mai fi ydi’r unig un Cymraeg hyd yma a dwi methu dallt pam na fyddai mwy o ysgolion yn bachu ar y syniad, achos mae’n wych!
Dyma lun ohona i a’r criw gafodd sticeri arbennig Seren Darllen (aur) a Darllenwr Da (arian). Un plentyn o bob blwyddyn, a bydd hyn yn digwydd bob tymor, sef bob tro y bydda i yno. Da de? image

Un o’r darllenwyr brwd yn yr ysgol ydi Efa, ac mae hi wedi rhoi rhestr o’i hoff lyfrau i mi! Diolch yn FAWR Efa, mae hyn yn ddiddorol ofnadwy, ac yn siwr o roi syniadau i ddarllenwyr eraill, o bob oed!

Helo Bethan Gwanas,
Efa sydd yma o Ysgol Bro Cinmeirch. Rydw i am argymell rhai o lyfrau i chi roi yn eich blog, sef ‘Pants are Everything’ gan Mark Loweryimage
oherwydd mae’n ddoniol. ‘Tom Gates’ gan L.Pichon oherwydd mae’n ddoniol hefyd ac oherwydd mae’r lluniau yn dda.image
‘Cyfrinach Ifan Hopcyn’ gan Eiry Miles cyfrinach_ifan_hopcyn_mawr

a ‘Jelygaid’ gan Sonia Edwards
image am fod y straeon yn wreiddiol ac yn wahanol.
Dau o fy hoff lyfrau yn y byd yw
image ‘The Treasure House’ gan Linda Newbery oherwydd mae y stori yn anturis iawn a ‘Sky Hawk’ gan Gill Lewis
image oherwydd ei bod yn stori deimladwy a thrist.
Efa

Diolch eto, Efa. Ond ges i dipyn o sioc pan ddangosaist ti y llyfr Pants na i mi! Nid ar gyfer plant bach diniwed! Ond ydi, mae o’n ddoniol…
Be am i fwy o blant rannu eu hoff lyfrau efo fi? Dim gwobrau am wneud, dim ond y clod a’r anrhydedd!

Llyfrau gwych i’w darllen yn uchel

Published Chwefror 11, 2014 by gwanas

Dwi’n edrych mlaen yn arw at fy ymweliad nesa â Ysgol Bro Cinmeirch, yr ysgol lle dwi’n Gyfaill Darllen. Fi ydi’r unig Gyfaill Darllen sy’n siarad Cymraeg o hyd – hyd y gwn i! Brysiwch, ysgolion ac awduron Cymraeg eraill – lle dach chi? Mae hwn yn gynllun hyfryd.
Sbiwch ar wefan patronofreading a sbiwch ar y llun yma o’r tro cynta es i i’r ysgol:

image

Dwi wedi bod yn paratoi ar gyfer dechrau Mawrth yn barod, ac wedi dewis hwn image
fel un o’r llyfrau fydda i’n eu darllen a’u trafod efo Blwyddyn 3 a 4. Yr awdures Haf Llewelyn roddodd y syniad i mi ( dyma hi)Unknown-5
a rhai o’i llyfrau plant hi:images-1images

O, a sbiwch be ddois i o hyd iddo fo ar y we – llun ohoni hi a fi!images-2
Chwiliwch yn ofalus – mi rydan ni yna, wir yr.

Beth bynnag, mwy am lyfrau Haf ryw dro eto; ‘Y Dywysoges Fach datws’ sy’n cael sylw tro ma, llyfr sy’n chwalu stereoteips. Un o hoff lyfrau Haf – a finnau rwan!
Mae’n dechrau fel hyn:image
Ond nid tywysoges fach ffrili, binc, gwynfanllyd mo Rhiannon. Pan fydd draig yn cipio’r Tywysog Rheinallt a malu’r castell a llosgi dillad prydferth, drudfawr Rhiannon, mae ei gwir gymeriad yn dod allan! Mae’n gwisgo sach datws ( dim dewis – dim dillad eraill ar ôl) ac yn mynd i geisio achub Rheinallt. Ond dwi’m yn mynd i ddeud mwy. Darllenwch o drosoch chi eich hun. Ond nid plant Bro Cynmeirch! Mi wna i ei ddarllen o i chi cyn bo hir, iawn? Wel, Blwyddyn 3 a 4. Ac efallai pawb arall hefyd. Gawn ni weld.

Stori gan Robert Munsch ydi hi, wedi ei chyfaddasu gan y diweddar Iwan Llwyd. Dwi’n siwr bod Iwan wir wedi mwynhau addasu’r llyfrau yma. Efallai y byddwch chi’n gyfarwydd â hon, un arall gan yr un awdur:image
Mae honna’n wych hefyd tydi? Hynod, hynod ddigri.

Maen nhw i gyd yn rai gwych i’w darllen yn uchel i blant iau, ond yn addas i blant Blwyddyn 3/4 ac i fyny eu darllen drostyn nhw eu hunain hefyd.
Rhowch wybod os oes gynnoch chi ffefrynnau ar gyfer eu darllen yn uchel.

Mae’r ddau lyfr yma yn rai da hefyd:image
image

Oes, digwydd bod, mae gen i stori yn y ddau – ond nifer o awduron eraill hefyd, o bob rhan o Gymru. Dwi’n bwriadu darllen stori gafodd ei hysbrydoli gan fy nith, Meg sy’n 12 erbyn hynIMG_2581
yn Ysgol Bro Cynmeirch hefyd. Camp i chi weithio allan pa un, ond mae ganddi wallt hir, eitha gwyllt…
Byddaf, mi fydda i’n cael llawer o syniadau am straeon drwy fy nheulu.

Cofiwch, rhannwch eich syniadau am lyfrau da i’w darllen yn uchel; mi fyswn i, a phawb arall sy’n dilyn y blog yma yn hynod ddiolchgar. Rhai gwreiddiol os yn bosib wrth gwrs, ond mae’r Dywysoges fach datws yn un mor dda, allwn i ddim peidio a rhoi sylw iddo fo.

Mae angen gwneud rhestr o lyfrau sy’n chwalu stereoteipio hefyd yn does? Dyma un!

Unknown