Uncategorized

All posts in the Uncategorized category

Llun o gymeriadau Cadi! A chyfres am wrach o Gymru – Grace Ella.

Published Rhagfyr 11, 2019 by gwanas

Cadi'n darllen

Wel, dwi wedi archebu anrheg Nadolig i mi fy hun. Roedd Janet Samuel, yr arlunydd o Bontarddulais wedi rhoi’r llun uchod at ei gilydd a’i roi ar Instagram. Mi wnes i wirioni’n bot wrth gwrs – cymeriadau Cadi i gyd efo’i gilydd? Gwych! Felly dwi wedi archebu print maint A3 ganddi.

Mae’r lliwiau’n wych, ac mi fydd yn edrych yn hyfryd mewn ffrâm ar y wal. Dwi ddim yn gwybod pa stafell eto. Ond dwi isio prynu cadair freichiau i ddarllen ynddi, ac mae’n eitha posib mai mynd am un goch wna i rŵan!

O, ac mae ‘na si y bydd llyfr lliwio Cadi yn ymddangos flwyddyn nesa – wnai adael i chi wybod yr eiliad gai gadarnhad. Ond dwi’n rhyw deimlo efallai bod gynnon ni glawr yn barod…

CADI CELTIAID P37 copy

Diolch i bawb brynodd gopiau o Cadi a’r Celtiaid yn nosweithiau Siopa Hwyr y Bala a Dolgellau, gyda llaw. Ges i andros o hwyl yn darllen chydig o’r llyfr i blant boncyrs y Bala, a modd i fyw yn rhannu stondin yn Nhŷ Siamas efo Sharon Marie Jones.

20191206_231207

Mae Sharon wedi sgwennu dwy nofel am wrach o Gymru – yn Saesneg, a dyma nhw:

EGloAN-XUAAqwLd

A dyma Sharon, sy’n dod o Ddolgellau yn wreiddiol, fel fi!

Sharon Marie Jones

Mi wnes i brynu ‘Grace- Ella, Spells for Beginners’ ganddi, sef y gyntaf yn y gyfres. A mwynhau! Mae hi wedi ei hanelu at blant 7-9 oed, a dyma i chi’r dudalen gynta:

20191211_182619

A dyma dudalen sy’n dangos yr elfen gymreig gref sydd ynddi – ac ia, dyna pam dwi’n rhoi sylw i lyfr Saesneg yn y blog yma, am mai awdures o Gymru sydd dan sylw, ac mae’n rhoi sylw i’n iaith ni!

20191209_082448

Mi faswn i wedi bod wrth fy modd yn darllen am anturiaethau Grace-Ella a’i chath, Mr Whiskins a’i ffrindiau pan ro’n i’n 7-9 oed. Mi faswn i wedi bod wrth fy modd gyda darluniau Adriana J Puglisi o’r Ariannin a Sbaen hefyd.

20191211_182537

Ond dwi’m yn siŵr pam ei bod hi’n ‘Adribel’ yng nghefn y llyfr – efallai mai dyna be mae ei theulu yn ei galw hi? Beth bynnag, dyma lun o’r ail lyfr, ‘Grace-ella, Witch Camp’ – edrych yn ddifyr!

wc3

Mae’r ddau lyfr yn £5.99 yr un ac yn cael eu cyhoeddi gan Firefly Press o Gaerdydd. Plîs cefnogwch Sharon a gwasg o Gymru!

Llyfr adar i blant

Published Rhagfyr 4, 2019 by gwanas

Mae Onwy Gower wedi cyhoeddi llyfr hyfryd am adar i blant, a dim ond disgybl Blwyddyn 6 ydi hi!

Dyma’r llyfr:

9781784617776

A dyma lun o Onwy efo’i thad yn y lansiad:

EKoIILeXsAAJYgD

Mae’r ddau yn mynd i wylio adar yn rheolaidd, yn enwedig i Benclacwydd ger Llanelli. Dyma linc i wefan y lle: https://www.wwt.org.uk/wetland-centres/llanelli/experience/

er mai Llanelli Wetland Centre ydi’r enw yn ôl fanno. Dim sôn am Benclacwydd a hwnnw’n enw mor wych ar gyfer ardal sy’n llawn adar. Mr Gwydd ydi clacwydd neu glagwydd, rhag ofn nag oeddech chi’n gwybod. Arddelwch yr enw os gwelwch yn dda, WWT!

Gyda llaw, dyma i chi ddywediad sy’n ddiarth i mi, ond dwi wrth fy modd efo fo: ‘Trot hwch a galap clacwy’ – sef rhedeg heb frysio llawer… ‘a leisurely trot.’
51556375_10156417235217415_3539919969577861120_o
22da52950037d2bbad53f45559a88d91

Gwych ynde! Pobl ardal Dyfed oedd – neu sydd – yn ei ddeud o, ond weithiau, mae angen i weddill Cymru fabwysiadu dywediadau fel’na.

Yn ôl at Llyfr Adar Mawr y Plant: Mae o’n hawdd i’w ddarllen, gydag ambell air allai fod yn ddiarth i blant mewn bold ac yna mewn rhestr eirfa yn y cefn; efo ffeithiau difyr am bob aderyn ac unai gerdd fach gan feirdd enwog, neu gan Onwy ei hun (a’i thad wedi ei helpu mae’n debyg – ond ddim llawer, dwi’n siŵr!).

IMG_4470

Mae’r lluniau gan Ffion Gwyn yn hyfryd:

73407439_576201779875876_2479043330882251281_n

IMG_4469IMG_4468

O, a hoff ffaith Onwy ydi’r un am y robin goch. A be ydi hwnnw? Bydd raid i chi brynu’r llyfr yn bydd… £7.99 Y Lolfa.

Mi wnaiff anrheg arbennig i unrhyw blentyn sydd â diddordeb mewn adar neu natur. Da iawn ti, Onwy!

Llyfrau llafar/sain

Published Rhagfyr 2, 2019 by gwanas

Dwi wedi clywed sawl person yn cwyno bod dim llyfrau llafar/sain ar gael yn Gymraeg. Wel, oes!

Ar CD ers tro ac erbyn hyn hefyd – fel e-lyfrau llafar y gallwch chi wrando arnyn nhw ar eich ffôn/ipad/cyfrifiadur – fel leciwch chi (ond dim ond os ydach chi’n byw yng Nghymru hyd y gwela i – ond efallai bod modd holi?)

36946942_1719034208217146_2389703057416912896_n

Does dim ond rhaid i chi ymaelodi efo’ch llyfrgell leol, cael cerdyn a rhif pin, ac wedyn cliciwch ar y linc isod a chwilio am y categori Welsh language.
Llwyth o ddewis da yno!

Bethan Dwyfor yn darllen Saith Oes Efa, Lleucu Roberts; Leah Owen ei hun yn darllen ei hunangofiant; Tudur Owen yn darllen ei nofel Y Sŵ

71J4ITRl9aL

– ond dwi’n gallu gweld y bydd raid i chi aros i gael benthyg hwnnw am ei fod gan rywun arall, fel mae Edau Bywyd Elen Wyn ac I Botany Bay gen i… ond mae na lwyth o rai eraill ar gael!

Dim ar gyfer plant neu bobl ifanc eto hyd y gwela i, ond os ydach chi’n gwybod yn well na fi, rhowch wybod.

https://llyfrgelloedd.cymru/my-digital-library/borrowbox/

Llyfr am barchu pobl wahanol i ni

Published Tachwedd 28, 2019 by gwanas

EHeOqcAWsAAbUAI

Perl arall gan Manon a Jac. Llyfr gyda’r mymryn lleia o eiriau, sy’n gadael i blentyn ‘ddarllen’ y lluniau. Felly mi allwch chi orffen hwn yn hawdd mewn un eisteddiad, a dwi’n siŵr y bydd y plant (a’r oedolion) yn sylwi ar rywbeth newydd yn y lluniau gyda phob darlleniad.

Ond cofiwch, “easy reading is damned hard writing” felly mi fedra i eich sicrhau chi bod Manon wedi pwyso a mesur bob gair, bob cymal, ac wedi torri a chwynnu er mwyn cael y cyfniad perffaith o eiriau a lluniau.

20191128_085402

Mae’n stori bwysig hefyd, yn enwedig yn yr oes sydd ohoni. Mae’n ein dysgu i beidio â beirniadu rhywun sy’n edrych ac yn ymddwyn yn wahanol i ni, a bod rhaid parchu pawb.

20191128_085436

Mae gan y cymdogion eu iaith eu hunain, ond maen nhw’n gallu siarad Cymraeg hefyd, a dwi wrth fy modd efo’r dudalen hon. Mi fydd plant wedi dotio.

20191128_085623

Fel mae’n digwydd, mae’r plentyn gwahanol (piws) yn hoffi chwarae pêl-droed hefyd…gêm sydd wedi dod â phobl wahanol at ei gilydd ers blynyddoedd; ond nid pawb sy’n ddigon lwcus i gael byw drws nesa i’r teulu newydd a dod i’w nabod, ac mae rhai o’r plant yn yr ysgol yn gas efo’r plentyn newydd piws, ond mae’n plentyn gwyrdd ni yn edrych ar ei ôl…

20191128_085602

Llyfr wirioneddol hyfryd. Bargen gan Y Lolfa am £3.99, ac yn eisin ar y gacen i mi, mae Manon wedi cyflwyno’r llyfr i’w chymdogion: “I Tomos Wyn a Huw Evans – y bobol drws nesaf ond un” sy’n digwydd perthyn i mi! Mi fydd y ddau wedi gwirioni.

Cadi a’r Celtiaid

Published Tachwedd 26, 2019 by gwanas

Wps! Dwi wedi bod mor brysur yn blogio am lyfrau pobl eraill, dwi wedi anghofio deud bod Cadi a’r Celtiaid bellach yn y siopau!

Dyma’r clawr:

3351_Untitled-1

A dyma rai o fy hoff luniau gan Janet Samuel:

A dyma luniau efo’r ysgrifen yn y darnau adawodd Janet ar gyfer yr ysgrifen:

20191126_154626

20191126_154742

A dyma ddarn efo tipyn golew o sgwennu. Oes, mae ‘na waith darllen ar lyfrau Cadi, ond ro’n i isio creu llyfrau oedd yn rhy hir i’w darllen mewn un eisteddiad, achos – yn fy marn i – mae’n gwneud i blant arfer efo’r syniad o stori hirach/hwy, a gobeithio eu bod yn edrych ymlaen at gael mwy o’r stori y noson wedyn – a’r un wedyn! O, ac os sylwch chi, mae’r gair ‘pwmpian’ yna eto. Achos dyna, yn bendant, fyddai’n digwydd pan fyddai pawb yn cysgu yn yr un lle, a dwi’n nabod llawer o blant sy’n mwynhau hiwmor ‘blas y pridd’… a rhieni hefyd!

20191126_154652

Mi fydd plant Ynys Môn yn nabod lle mae Cadi’n beicio ato fan hyn:

20191126_154555

Ia, stafell gladdu Bryn Celli Ddu. Yno, ar fore diwrnod hira’r flwyddyn, mae Cadi’n cael ei gyrru’n ôl mewn amser i Oes y Celtiaid, ac yn dysgu ambell wers – ac yn cael ambell antur! Mae hi’n dysgu pa mor bwysig ydi dal ati a pheidio â rhoi’r ffidil yn y to, ac nad oes angen poeni os fydd hi’n gwneud camgymeriadau, achos fel’na mae rhywun yn dysgu.

Mae hi hefyd yn dysgu agor ei llygaid a’i chlustiau a chanolbwyntio go iawn.

Mi fydda i’n darllen peth o’r stori ym Mhlas yn Rhiw ddydd Sadwrn a Sul Tachwedd 30/Rhagfyr 1af, ac hefyd yng Nghanolfan Henblas, Y Bala ar nos Iau Rhagfyr 5ed rhwng 6 a 7 (noson siopa hwyr y Bala), ac wedyn yn Nhŷ Siamas yn ystod noson siopa hwyr Dolgellau tua 5-6 o’r gloch. Gobeithio eich gweld yno a chofiwch atgoffa eich rhieni/nain/taid/modryb/ewyrth i ddod â £5.99 efo nhw i brynu copi!

Ty Siamas and Eldon Square 
Dolgellau
Gwynedd
Mid
Towns and Villages

Mi ges i wahoddiad i’r Sioe Aeaf yn Llanelwedd ond dwi’n dysgu Cymraeg i oedolion bob bore Llun a Mawrth, sori. A sôn am rheiny: mae fersiwn newydd o Bywyd Blodwen Jones hefyd yn y siopau, efo clawr newydd gan Brett Breckon!

9781785623059

Mwy o lyfrau i’r plant iau

Published Tachwedd 25, 2019 by gwanas

Dwi wedi cael pecyn hyfryd o lyfrau plant GWREIDDIOL gan Wasg Gomer, rhai gan hen lawiau a rhai gan enwau newydd. Dyma ddau sydd yr un maint (eitha mawr):

IMG_4453

Ac un fymryn llai gan Nia Parry:

EKOb8j8XYAcyfak-1

Yn union fel ‘Siôn Corn a’r Anrheg Gorau Un’, mae ‘Gwyn y Carw Claf’ yn gywaith prydferth rhwng (y Prifardd) Tudur Dylan Jones a Valériane Leblond.

FullSizeRender

Yn hon, mae merch fach o’r enw Greta yn darganfod carw bach cloff yn y goedwig. Mae’n helpu’r carw bach drwy glymu ei sgarff am ei goes. Fisoedd yn ddiweddarach mae Gwyn, y carw bach, yn rhoi cnoc ar ffenest Greta ar Noswyl Nadolig ac yn mynd â hi ar antur gyda Siôn Corn.

IMG_4455

Yn anffodus, fel uchod, mae’r ysgrifen weithiau’n anodd ei weld, ond efallai mai fi a fy llygaid sy’n mynd yn hen. Ond y rhan fwya o’r amser, mae’r stori’n berffaith glir – ffiw!

FullSizeRender-1

FullSizeRender-3

Mae hi’n stori Nadoligaidd wirioneddol hyfryd, efo tro yn y gynffon fydd yn codi gwên, ac mae’r cwpledi’n llifo’n hawdd (wel, mae o’n brifardd, be dach chi’n ddisgwyl?) a dwi’n edrych mlaen yn arw i’w darllen hi ym Mhlas yn Rhiw Tachwedd 30 a Rhagfyr 1af (dwi wedi cael gwahoddiad i ddarllen yno yn eu dathliadau Nadolig eto eleni).

Partneriaeth newydd sbon ydi’r awdur Llio Maddocks a’r arlunydd Aled Roberts. Mae’r lluniau yn ‘Y Môr-leidr a fi’ yn fwy cartwnaidd, fel y gwelwch chi:

FullSizeRender-2

Mae Llio hefyd wedi mynd am gerddi bach sy’n odli, a hynny mewn ffordd llawer mwy boncyrs nag arddull dawel, hamddenol Tudur Dylan. Dwi wrth fy modd efo’r syniad a’r stori: mae’n llawn dychymyg, ac mi fydd unrhyw Nain yn hapus iawn yn darllen hon efo’i hwyrion. Mae’r plentyn yn hoffi dydd Gwener oherwydd mai Nain “sy’n fy nghasglu o’r ysgol, nid Mam.” Ha!

IMG_4460

Dan ni’n cael gweld wedyn pam fod cwnmi Nain yn gymaint o hwyl. Mae hi’n un dda am fwydo ei ddychymyg a dan ni’n cael gweld be mae hi’n ei guddio yn y cwpwrdd dan staer a be’n union yw ei chyfrinach. Cawn gwrdd â’r giang ar fwrdd y llong, parot, dolffiniaid a theigr!

Fy hoff ddarn i ydi hwn am gyrtens/llenni’r llofft. Iawn, hwyliau’r llong ta:

IMG_4458IMG_4459

Mae’r Carw yn £6.99 a’r Mor-leidr yn £5.99.

Llyfr cwbl wahanol ydi ‘Cwmwl Cai.’ Llyfr pwysig, allai fod o help mawr i blant bach fel Cai: bachgen bach sy’n cael ambell i bwl tywyll di-obaith lle mae o dan straen. Weithiau, mae bob dim yn iawn:

IMG_4462

Ond weithiau, mae o’n drist ac yn poeni:

IMG_4463
IMG_4465

Mae llawer o blant bach fel Cai yn y byd. Mae’r llyfr hwn yn normaleiddio’r teimladau dwys yma ac yn cynnig syniadau ymarferol i blant a’u gofalwyr am ffyrdd i godi’r cwmwl a chodi ysbryd.

IMG_4466FullSizeRender

Mae Nia, efo help arbenigwyr yn y maes, a lluniau Gwen Millward, wedi creu llyfr hyfryd am y technegau o lonyddu ac ymdawelu sy’n seiliedig ar ‘ymwybyddiaeth ofalgar’ neu ‘mindfulness’. Dwi’n siŵr y bydd o o gymorth mawr i blant fel Cai a’u teuluoedd. Mae ‘na lawer mwy o syniadau a thechnegau yn y llyfr, yn cynnwys rhoi dy hoff degan ar dy fol a’i wylio’n mynd i fyny ac i lawr wrth i ti anadlu. A dychmygu Mam yn diffodd y cyfrifiadur am dipyn.

Dwi’n siŵr y byddai’n talu i oedolion sy’n byw dan gymylau gael copi o hwn hefyd.

Ond dull arall o godi’r galon ydi mynd ar gwrs sgwennu creadigol i Ganolfan Tŷ Newydd, fel y gwnes i a chriw (arbennig) o ddysgwyr dros y penwythnos. Dyma fi a Sarah Reynolds, fy nghyd-diwtor – ar y dydd Sul, cofiwch!

EKKkmTVXYAEn3Oc

Mae hi wedi cyhoeddi 2 gyfrol yn Gymraeg ers dysgu Cymraeg yn rhugl:

Llyfrau hwyliog, ysgafn, sy’n donic – ond yn llawn gwirioneddau… ac mae hi’n gweithio ar nofel Saesneg ar hyn o bryd. Dwi’n edrych mlaen yn barod!

2 lyfr bach Nadolig

Published Tachwedd 17, 2019 by gwanas

Mae Gwasg Carreg Gwalch wedi cyhoeddi dau lyfr bach i blant sy’n addas ar gyfer y Nadolig:

Mae ‘Nadolig yn y Cartref’ gan Luned Aaron ar gyfer plant iau, ond yn iawn ar gyfer rhai tua 7 oed hefyd. Math o lyfr adfent ydi o, gyda 24 llun o bethau Nadoligaidd a chwpled i fynd efo pob llun, fel hyn:

20191117_152111
20191117_152133

Roedd fy nosbarth dysgwyr (oedolion!) i yn hoffi’r llyfr hefyd am ei fod yn hawdd iddyn nhw ei ddeall ac yn dysgu ambell air newydd iddyn nhw. Ond roedd yr ysgrifen ar y dudalen hon (gwyn ar gefndir melyn) fymryn bach yn anodd ei weld. Mwy am bethau felly yn y blog nesaf…

20191117_152123

Llyfr bach tlws, clawr caled sy’n gyflwyniad hyfryd i rai o agweddau traddodiadol y Nadolig. Pam ddim gyrru hwn at rywun arbennig yn lle cerdyn eleni? Iawn, mae o fymryn drytach na cherdyn (£5.95) ac yn ddrytach i’w bostio – ond mae ‘na rai cardiau yn hurt o ddrud y dyddiau yma!

Stori arall gan Caryl Parry Jones a Craig Russell am Tomos y llygoden sy’n byw mewn theatr (lluniau gan Leri Tecwyn) ydi ‘Tomos Llygoden y Theatr a’r Nadolig Gorau Erioed’. Hon ydi’r 3edd cyfrol yn y gyfres, addas ar gyfer plant tua 5-8 oed, ac mae’n llawn hiwmor a dychymyg fel y ddwy arall.

20191117_152154

20191117_152212

Mae’n stori hyfryd am fod yn garedig (mae angen mwy o hyn yn ein byd a’n bywydau!) ond mae’n gweithio’n well pan fydd llai o ysgrifen. Fel golygydd, roedd fy siswrn yn ysu am dorri’r paragraff olaf fan hyn – o ‘Aha’ i ‘olaf’ oherwydd nad oedd ei angen.

20191117_154821

Ia, dwi’n gwybod, mae’n brifo awdur i weld peth o’i hiwmor a’i arddull yn cael ei dorri (bu’n rhaid i mi ffarwelio efo talpiau o Cadi a’r Celtiaid hefyd) ond mae’r golygyddion fel arfer yn llygad eu lle. Weithiau, mae jest angen mwy o ofod. Croeso i chi anghytuno, cofiwch!

Oherwydd ei fod yn glawr meddal, mae hwn chydig rhatach (£4.95). Bydd plant sy’n pendroni am rai o gyfrinachau Siôn Corn yn cael hwyl efo’r stori, ac ro’n i wrth fy modd efo pethau fel: “Wanwl, ma hi’n oer mwya sydyn” a “Jiw jiw, nagw i” sy’n dangos cyfoeth yr iaith o’r de i’r gogledd. Cyfle gwych i rieni actio’r stori a gwneud acenion gwahanol. Ac mae ‘na ddarluniau hyfryd yma.