Hoff lyfrau plant ein teulu ni a chyfle i ennill llyfr.

Published Mai 10, 2020 by gwanas

32-325512_transparent-children-reading-png-children-reading-a-book

Gobeithio eich bod chi’n dal i ymdopi efo’r cyfnod Corona ‘ma. A gobeithio bod gynnoch chi ddigon o lyfrau i’ch cadw’n hapus! Mae’n debyg y bydd rhai llyfrgelloedd yn agor eto cyn hir, felly dyna gyfle i chi gael stoc newydd. Mae rhai siopau llyfrau Cymraeg wedi bod yn postio llyfrau dros y wlad hefyd, yn ogystal â gwales.com, felly cofiwch gysylltu efo nhw os dach chi isio llyfr i’w gadw go iawn.

Llyfrau oedolion dwi wedi bod yn eu darllen, a nifer ohonyn nhw’n rai Saesneg, ond ro’n i wedi benthyca fersiwn sain o hon o’r llyfrgell:

713gtpco3ZL

Chwip o nofel antur i’r arddegau +! Wedi edrych ar y sylwadau amdani ar amazon, dwi’n gweld nad ydi hi wedi plesio pawb – ond roedd 61% wedi rhoi 5 seren iddi. A dwi’n un o’r rheiny! Os dach chi isio nofel llawn adrenalin a braw a chynnwrf, rhowch gynnig arni.

Mi wnes i benderfynu holi plant iau ein teulu ni pa lyfrau maen nhw wedi eu mwynhau dros yr wythnosau caeth yma. Dau fachgen ydyn nhw, Caio Gwilym (8) a Mabon (6), ac ydyn, mae enwau’r ddau yn ymddangos yn llyfrau Cadi!

Ond ar wahân i lyfrau Cadi, mae arna i ofn mai cyfieithiadau sydd wedi eu hudo. Felly dwi’n gorfod torri fy rheol eto fyth! Be mae hyn yn ei ddeud am lyfrau Cymraeg gwreiddiol i blant, dwch? Trafoder…

Ta waeth, roedd y ddau (a’u mam) yn hoffi hon yn arw:

96574473_591289211574576_9061740932763746304_n

Llyfr sy’n ymdrin â thema bwlian. Mae un gwningen fawr greulon yn pigo ar weddill anifeiliaid bach y goedwig ac yn gwneud eu bywydau’n boen. Addasiad Helen Emanuel Davies.

Un arall sydd wedi plesio pawb ydi Seren Lowri, addasiad Mererid Hopwood:

220px-Seren_Lowri_(llyfr)

Stori am ferch fach unig sy’n dod i sylweddoli fod cyfeillgarwch yn gallu bod yn brofiad pleserus a phoenus. Mae Lowri’n dod o hyd i seren fach go iawn oedd wedi syrthio ar y pafin ac mae’n dod a hi i’r tŷ, lle mae’r seren fach yn dechrau disgleirio eto.

Ac addasiad arall (gan Roger Boore):

96054471_545375316098044_4561375450126876672_n

I’r lleuad ac yn ôl cyn amser bath? Beth nesaf! Stori sy’n hudo efo’i dychymyg a’i diniweidrwydd meddan nhw. Wel nid geiriau Caio a Mabon oedd rheina. Ar Amazon ges i’r rheina. “Da,” ddeudodd yr hogia.

Ffefryn Caio ydi addasiad Steffan Alun o Wil yn achub y byd, “Doniol iawn” medda fo:

will_yn_achub_y_byd

Ond mae ‘na un hen ffefryn gwreiddiol, diolch byth! Tydi Mabon ddim yn rhy hen i fwynhau darllen am Tomos Caradog fwy nag unwaith:

96157897_2754491594876909_7301909565338025984_n

Felly dyna i chi chydig o syniadau am lyfrau i blant dan 8/9 am yr wythnosau/misoedd nesaf. Os oes gynnoch chi ffefrynnau gan awduron Cymraeg o Gymru, rhowch wybod, da chi!

Dyma un i chi, i blant fymryn yn hŷn (tua 11+), ac ydw, dwi’n canu fy nhrwmped fy hun am eiliad – mae’n rhaid i rywun… Ro’n i wedi anghofio am yr adolygiad hyfryd yma o Edenia gan ferched Ysgol Penweddig ar wefan lysh Cymru. Diolch eto, ferched hyfryd, caredig Abersytwyth:
https://www.lysh.cymru/edenia

Ac yn olaf, dyma i chi chwip o syniad ar gyfer eich hoff lyfrau: ail-greu y cloriau fel mae’r ddau yma wedi gwneud efo The Tiger who Came to Tea:

Be amdani efo’ch hoff lyfrau Cymraeg? Allwch chi ail greu’r rhain sgwn i?

Neu unrhyw lyfr o’ch dewis chi, wrth gwrs. A deud y gwir, dwi’n hoffi’r syniad gymaint, dwi am gynnig un o fy llyfrau plant yn wobr i’r ‘clawr’ gorau! Os oes gen i gopi o’r llyfr yn y tŷ, wrth gwrs – a dwi’n meddwl bod y rhan fwya gen i.
Gyrrwch eich cynigion ata i drwy Twitter – @BethanGwanas neu Facebook.
Dyddiad cau? Be am Mai 24?

Mwynhewch!

4 comments on “Hoff lyfrau plant ein teulu ni a chyfle i ennill llyfr.

  • Dwi ‘di ffeindio’r un peth.
    Mae plant yn dewis addasiadau fel eu hoff lyfrau gan amlaf. (Wil y poenwr ‘na yn lyfr ardderchog- yr union beth mae plant yn gofyn am ddarllen- llawn rwtsh a hiwmor a dwdls di ri!)
    E.e. Mae Supertaten yn lyfr llunia poblogaidd iawn hefo Plant ifanc. Addasiad eto…
    Mae’n anodd iawn dadlau hefo nhw achos ma’r plant yn gwbod be ma nhw’n licio dydyn!
    Oes na le/angen gwneud hi’n fwy deniadol
    I gyhoeddi llyfrau gwreiddiol yn hytrach na addasiadau?!! Ydi hynny’n deg? Ydio’n bosib? Yn amlwg mae hi’n lot haws cyhoeddi addasiad na ydi creu rhywbeth gwreiddiol o’r newydd…
    Anodd ffeindio’r atab iawn dydi.
    Hmmm….

    • Mae hyn yn gur pen ers blynyddoedd. Gormod o bwyslais ar lyfrau ‘worthy’ , hardd neu addysgiadol yn hytrach na jest rhai sy’n adloniant pur? Dwn i’m. Ond mae ‘na rywbeth o’i le yn rhywle!

  • Gadael Ymateb

    Rhowch eich manylion isod neu cliciwch ar eicon i fewngofnodi:

    WordPress.com Logo

    You are commenting using your WordPress.com account. Log Out /  Newid )

    Google photo

    You are commenting using your Google account. Log Out /  Newid )

    Twitter picture

    You are commenting using your Twitter account. Log Out /  Newid )

    Facebook photo

    You are commenting using your Facebook account. Log Out /  Newid )

    Connecting to %s

    %d bloggers like this: