Llyfr am barchu pobl wahanol i ni

Perl arall gan Manon a Jac. Llyfr gyda’r mymryn lleia o eiriau, sy’n gadael i blentyn ‘ddarllen’ y lluniau. Felly mi allwch chi orffen hwn yn hawdd mewn un eisteddiad, a dwi’n siŵr y bydd y plant (a’r oedolion) yn sylwi ar rywbeth newydd yn y lluniau gyda phob darlleniad.

Ond cofiwch, “easy reading is damned hard writing” felly mi fedra i eich sicrhau chi bod Manon wedi pwyso a mesur bob gair, bob cymal, ac wedi torri a chwynnu er mwyn cael y cyfniad perffaith o eiriau a lluniau.

Mae’n stori bwysig hefyd, yn enwedig yn yr oes sydd ohoni. Mae’n ein dysgu i beidio â beirniadu rhywun sy’n edrych ac yn ymddwyn yn wahanol i ni, a bod rhaid parchu pawb.

Mae gan y cymdogion eu iaith eu hunain, ond maen nhw’n gallu siarad Cymraeg hefyd, a dwi wrth fy modd efo’r dudalen hon. Mi fydd plant wedi dotio.

Fel mae’n digwydd, mae’r plentyn gwahanol (piws) yn hoffi chwarae pêl-droed hefyd…gêm sydd wedi dod â phobl wahanol at ei gilydd ers blynyddoedd; ond nid pawb sy’n ddigon lwcus i gael byw drws nesa i’r teulu newydd a dod i’w nabod, ac mae rhai o’r plant yn yr ysgol yn gas efo’r plentyn newydd piws, ond mae’n plentyn gwyrdd ni yn edrych ar ei ôl…

Llyfr wirioneddol hyfryd. Bargen gan Y Lolfa am £3.99, ac yn eisin ar y gacen i mi, mae Manon wedi cyflwyno’r llyfr i’w chymdogion: “I Tomos Wyn a Huw Evans – y bobol drws nesaf ond un” sy’n digwydd perthyn i mi! Mi fydd y ddau wedi gwirioni.

Cadi a’r Celtiaid

Wps! Dwi wedi bod mor brysur yn blogio am lyfrau pobl eraill, dwi wedi anghofio deud bod Cadi a’r Celtiaid bellach yn y siopau!

Dyma’r clawr:

A dyma rai o fy hoff luniau gan Janet Samuel:

A dyma luniau efo’r ysgrifen yn y darnau adawodd Janet ar gyfer yr ysgrifen:

A dyma ddarn efo tipyn golew o sgwennu. Oes, mae ‘na waith darllen ar lyfrau Cadi, ond ro’n i isio creu llyfrau oedd yn rhy hir i’w darllen mewn un eisteddiad, achos – yn fy marn i – mae’n gwneud i blant arfer efo’r syniad o stori hirach/hwy, a gobeithio eu bod yn edrych ymlaen at gael mwy o’r stori y noson wedyn – a’r un wedyn! O, ac os sylwch chi, mae’r gair ‘pwmpian’ yna eto. Achos dyna, yn bendant, fyddai’n digwydd pan fyddai pawb yn cysgu yn yr un lle, a dwi’n nabod llawer o blant sy’n mwynhau hiwmor ‘blas y pridd’… a rhieni hefyd!

Mi fydd plant Ynys Môn yn nabod lle mae Cadi’n beicio ato fan hyn:

Ia, stafell gladdu Bryn Celli Ddu. Yno, ar fore diwrnod hira’r flwyddyn, mae Cadi’n cael ei gyrru’n ôl mewn amser i Oes y Celtiaid, ac yn dysgu ambell wers – ac yn cael ambell antur! Mae hi’n dysgu pa mor bwysig ydi dal ati a pheidio â rhoi’r ffidil yn y to, ac nad oes angen poeni os fydd hi’n gwneud camgymeriadau, achos fel’na mae rhywun yn dysgu.

Mae hi hefyd yn dysgu agor ei llygaid a’i chlustiau a chanolbwyntio go iawn.

Mi fydda i’n darllen peth o’r stori ym Mhlas yn Rhiw ddydd Sadwrn a Sul Tachwedd 30/Rhagfyr 1af, ac hefyd yng Nghanolfan Henblas, Y Bala ar nos Iau Rhagfyr 5ed rhwng 6 a 7 (noson siopa hwyr y Bala), ac wedyn yn Nhŷ Siamas yn ystod noson siopa hwyr Dolgellau tua 5-6 o’r gloch. Gobeithio eich gweld yno a chofiwch atgoffa eich rhieni/nain/taid/modryb/ewyrth i ddod â £5.99 efo nhw i brynu copi!

Mi ges i wahoddiad i’r Sioe Aeaf yn Llanelwedd ond dwi’n dysgu Cymraeg i oedolion bob bore Llun a Mawrth, sori. A sôn am rheiny: mae fersiwn newydd o Bywyd Blodwen Jones hefyd yn y siopau, efo clawr newydd gan Brett Breckon!

Mwy o lyfrau i’r plant iau

Dwi wedi cael pecyn hyfryd o lyfrau plant GWREIDDIOL gan Wasg Gomer, rhai gan hen lawiau a rhai gan enwau newydd. Dyma ddau sydd yr un maint (eitha mawr):

Ac un fymryn llai gan Nia Parry:

Yn union fel ‘Siôn Corn a’r Anrheg Gorau Un’, mae ‘Gwyn y Carw Claf’ yn gywaith prydferth rhwng (y Prifardd) Tudur Dylan Jones a Valériane Leblond.

Yn hon, mae merch fach o’r enw Greta yn darganfod carw bach cloff yn y goedwig. Mae’n helpu’r carw bach drwy glymu ei sgarff am ei goes. Fisoedd yn ddiweddarach mae Gwyn, y carw bach, yn rhoi cnoc ar ffenest Greta ar Noswyl Nadolig ac yn mynd â hi ar antur gyda Siôn Corn.

Yn anffodus, fel uchod, mae’r ysgrifen weithiau’n anodd ei weld, ond efallai mai fi a fy llygaid sy’n mynd yn hen. Ond y rhan fwya o’r amser, mae’r stori’n berffaith glir – ffiw!

Mae hi’n stori Nadoligaidd wirioneddol hyfryd, efo tro yn y gynffon fydd yn codi gwên, ac mae’r cwpledi’n llifo’n hawdd (wel, mae o’n brifardd, be dach chi’n ddisgwyl?) a dwi’n edrych mlaen yn arw i’w darllen hi ym Mhlas yn Rhiw Tachwedd 30 a Rhagfyr 1af (dwi wedi cael gwahoddiad i ddarllen yno yn eu dathliadau Nadolig eto eleni).

Partneriaeth newydd sbon ydi’r awdur Llio Maddocks a’r arlunydd Aled Roberts. Mae’r lluniau yn ‘Y Môr-leidr a fi’ yn fwy cartwnaidd, fel y gwelwch chi:

Mae Llio hefyd wedi mynd am gerddi bach sy’n odli, a hynny mewn ffordd llawer mwy boncyrs nag arddull dawel, hamddenol Tudur Dylan. Dwi wrth fy modd efo’r syniad a’r stori: mae’n llawn dychymyg, ac mi fydd unrhyw Nain yn hapus iawn yn darllen hon efo’i hwyrion. Mae’r plentyn yn hoffi dydd Gwener oherwydd mai Nain “sy’n fy nghasglu o’r ysgol, nid Mam.” Ha!

Dan ni’n cael gweld wedyn pam fod cwnmi Nain yn gymaint o hwyl. Mae hi’n un dda am fwydo ei ddychymyg a dan ni’n cael gweld be mae hi’n ei guddio yn y cwpwrdd dan staer a be’n union yw ei chyfrinach. Cawn gwrdd â’r giang ar fwrdd y llong, parot, dolffiniaid a theigr!

Fy hoff ddarn i ydi hwn am gyrtens/llenni’r llofft. Iawn, hwyliau’r llong ta:

Mae’r Carw yn £6.99 a’r Mor-leidr yn £5.99.

Llyfr cwbl wahanol ydi ‘Cwmwl Cai.’ Llyfr pwysig, allai fod o help mawr i blant bach fel Cai: bachgen bach sy’n cael ambell i bwl tywyll di-obaith lle mae o dan straen. Weithiau, mae bob dim yn iawn:

Ond weithiau, mae o’n drist ac yn poeni:

Mae llawer o blant bach fel Cai yn y byd. Mae’r llyfr hwn yn normaleiddio’r teimladau dwys yma ac yn cynnig syniadau ymarferol i blant a’u gofalwyr am ffyrdd i godi’r cwmwl a chodi ysbryd.

Mae Nia, efo help arbenigwyr yn y maes, a lluniau Gwen Millward, wedi creu llyfr hyfryd am y technegau o lonyddu ac ymdawelu sy’n seiliedig ar ‘ymwybyddiaeth ofalgar’ neu ‘mindfulness’. Dwi’n siŵr y bydd o o gymorth mawr i blant fel Cai a’u teuluoedd. Mae ‘na lawer mwy o syniadau a thechnegau yn y llyfr, yn cynnwys rhoi dy hoff degan ar dy fol a’i wylio’n mynd i fyny ac i lawr wrth i ti anadlu. A dychmygu Mam yn diffodd y cyfrifiadur am dipyn.

Dwi’n siŵr y byddai’n talu i oedolion sy’n byw dan gymylau gael copi o hwn hefyd.

Ond dull arall o godi’r galon ydi mynd ar gwrs sgwennu creadigol i Ganolfan Tŷ Newydd, fel y gwnes i a chriw (arbennig) o ddysgwyr dros y penwythnos. Dyma fi a Sarah Reynolds, fy nghyd-diwtor – ar y dydd Sul, cofiwch!

Mae hi wedi cyhoeddi 2 gyfrol yn Gymraeg ers dysgu Cymraeg yn rhugl:

Llyfrau hwyliog, ysgafn, sy’n donic – ond yn llawn gwirioneddau… ac mae hi’n gweithio ar nofel Saesneg ar hyn o bryd. Dwi’n edrych mlaen yn barod!

2 lyfr bach Nadolig

Mae Gwasg Carreg Gwalch wedi cyhoeddi dau lyfr bach i blant sy’n addas ar gyfer y Nadolig:

Mae ‘Nadolig yn y Cartref’ gan Luned Aaron ar gyfer plant iau, ond yn iawn ar gyfer rhai tua 7 oed hefyd. Math o lyfr adfent ydi o, gyda 24 llun o bethau Nadoligaidd a chwpled i fynd efo pob llun, fel hyn:

Roedd fy nosbarth dysgwyr (oedolion!) i yn hoffi’r llyfr hefyd am ei fod yn hawdd iddyn nhw ei ddeall ac yn dysgu ambell air newydd iddyn nhw. Ond roedd yr ysgrifen ar y dudalen hon (gwyn ar gefndir melyn) fymryn bach yn anodd ei weld. Mwy am bethau felly yn y blog nesaf…

Llyfr bach tlws, clawr caled sy’n gyflwyniad hyfryd i rai o agweddau traddodiadol y Nadolig. Pam ddim gyrru hwn at rywun arbennig yn lle cerdyn eleni? Iawn, mae o fymryn drytach na cherdyn (£5.95) ac yn ddrytach i’w bostio – ond mae ‘na rai cardiau yn hurt o ddrud y dyddiau yma!

Stori arall gan Caryl Parry Jones a Craig Russell am Tomos y llygoden sy’n byw mewn theatr (lluniau gan Leri Tecwyn) ydi ‘Tomos Llygoden y Theatr a’r Nadolig Gorau Erioed’. Hon ydi’r 3edd cyfrol yn y gyfres, addas ar gyfer plant tua 5-8 oed, ac mae’n llawn hiwmor a dychymyg fel y ddwy arall.

Mae’n stori hyfryd am fod yn garedig (mae angen mwy o hyn yn ein byd a’n bywydau!) ond mae’n gweithio’n well pan fydd llai o ysgrifen. Fel golygydd, roedd fy siswrn yn ysu am dorri’r paragraff olaf fan hyn – o ‘Aha’ i ‘olaf’ oherwydd nad oedd ei angen.

Ia, dwi’n gwybod, mae’n brifo awdur i weld peth o’i hiwmor a’i arddull yn cael ei dorri (bu’n rhaid i mi ffarwelio efo talpiau o Cadi a’r Celtiaid hefyd) ond mae’r golygyddion fel arfer yn llygad eu lle. Weithiau, mae jest angen mwy o ofod. Croeso i chi anghytuno, cofiwch!

Oherwydd ei fod yn glawr meddal, mae hwn chydig rhatach (£4.95). Bydd plant sy’n pendroni am rai o gyfrinachau Siôn Corn yn cael hwyl efo’r stori, ac ro’n i wrth fy modd efo pethau fel: “Wanwl, ma hi’n oer mwya sydyn” a “Jiw jiw, nagw i” sy’n dangos cyfoeth yr iaith o’r de i’r gogledd. Cyfle gwych i rieni actio’r stori a gwneud acenion gwahanol. Ac mae ‘na ddarluniau hyfryd yma.

Syniadau gwych ar gyfer Bl 1 a 2

Mi ges i ddiwrnod prysur ond hynod ddifyr a phleserus ddoe. I ddechrau, ro’n i wedi cael gwahoddiad i Barti Hud Ysgol Bro Cinmeirch, fy ysgol ‘Cyfaill Darllen.’ Roedd plant Blwyddyn 1 a 2 wedi bod yn hynod brysur yn gwneud pob math o weithgareddau yn seiliedig ar Coeden Cadi

ac yn mynd i wisgo i fyny fel corachod a thylwyth teg ac wedi gofyn i minnau wneud yr un peth! Felly sbiwch be ddois i o hyd iddo fo mewn siop elusen yn Nolgellau:

A choron hefyd! Achos mae na frenhines y tylwyth teg yn y llyfr, felly fi oedd honno siwr iawn…

a dyma lun ohonon ni – a’r plant yn chwifio’r ffonau hud wnaethon nhw:

Roedd y plant eu hunain a’r staff wedi meddwl am bob math o weithgareddau yn deillio o’r llyfr:

Sgwennu a pherfformio eu rheolau eu hunain ar gyfer teithio ar yr enfys (achos mae ‘na reolau yn y llyfr)

sgwennu o bob math a deud y gwir, a chliciwch ar y llun uchod i weld y bwyd hud wnaethon nhw, a cherbydau hud ar gyfer y corachod, a Byd yr Enfys mewn bocsiau esgidiau, a chelf arbennig o drigolion yr enfys. Dyma fwy i chi:

Ac yn y parti ddoe, mi ges i weld dawns FFANTASTIG wnaethon nhw! A gweld triciau hud a chlywed jôcs:

Heb sôn am y gân wirioneddol hyfryd wnaethon nhw ei chyfansoddi efo help Sam (oedd ddim yno ddoe, yn anffodus):

Mi ges i flasu un o’r cacennau wnaethon nhw:

a wir i chi, roedd arogl yr enfys arnyn nhw – a blas enfysaidd hefyd!

Ro’n i wir wedi mopio, gwirioni a rhyfeddu at yr holl syniadau a gweithgareddau oedd wedi deillio o fy llyfr bach i. A phan ofynnais i pam oedden nhw wedi dewis Coeden Cadi: am fod Miss Davies wedi cael llond bol ar wneud y Gryffalo! Ond roedd hi eisiau defnyddio coed fel thema (dwi’n meddwl), ac mi gofiodd rhywun bod ‘na goed (wel, coeden) yn Coeden Cadi…

Felly dyna brofi nad oes angen troi at lyfrau Saesneg o hyd (hyd yn oed os ydyn nhw’n glasuron) a bod ‘na lyfrau Cymraeg allan fan’na sy’n gallu bod cystal. Dwi isio deud ‘os nad gwell’ ond mi fysa hynna’n rhy… wchi… yn bysa… (fi sgwennodd Coeden Cadi wedi’r cwbl).

Wedyn y noson honno es i yn fy mlaen (fy mol yn llawn cacen hud a fy llygaid yn llawn enfysau) i Fenllech, Ynys Môn i holi Marlyn Sanuel am ei 4edd nofel ar gyfer oedolion, Cicio’r Bwced. Os oes gynnoch chi rieni neu neiniau a theidiau sy’n mwynhau chwerthin, mae’r nofel hon yn wirioneddol ddigri! A thrist hefyd weithiau… ond noson hwyliog tu hwnt oedd hon, efo John ac Alun yn ei morio hi:

y lle mor llawn, roedd rhaid chwilio am fwy o gadeiriau:

ac mi werthwyd pob un copi o’r llyfr!

Roedd hud Bro Cinmeirch wedi cyrraedd Ynys Môn yn amlwg…

Y Cwilt

Mi fyddwch chi wedi gweld darluniau Valériane Leblond o’r blaen, mewn llyfrau (rhai Caryl Lewis, Elin Meek a Haf Llewelyn er enghraifft), ar gardiau a chalendrau ac ati. Mae hi wedi ennill gwobrau am ei gwaith. Ond y tro yma, a hynny am y tro cyntaf erioed, hi sy’n gyfrifol am y geiriau hefyd.

Stori hyfryd, dawel a chynnil am ymfudo a hiraeth ydi hi. Mae teulu bychan yn gadael Cymru a mynd i chwilio am fywyd gwell yn America. Mae’r fam yn creu cwilt cyn gadael, ac mae’r cwilt hwnnw’n dod â chysur mawr pan mae hiraeth yn codi ar y daith ac wedi cyrraedd byd a bywyd newydd, diarth. Dyma i chi flas o’r dechrau:

A dyma’r fam yn gweithio ar y cwilt. Mae’r defnydd o liwiau a phatrymau yn glyfar iawn drwy’r llyfr:

Sbiwch ar y ffordd mae patrymau’r cwilt yn troi’n wenoliaid. Ac mi welwn ni wenoliaid fwy nag unwaith. A’r lliwiau hyn hefyd. Mae ‘na elfen o farddoniaeth yn y darluniau, yn bendant!

Be am y geiriau? Dyma fwy i chi:

Ia, cynnil, syml a phwyllog. Bydd rhieni a modrybedd/teidiau/neiniau ac ati wrth eu bodd yn darllen hon yn uchel i blant ifanc 3+ a bydd plant sy’n gallu darllen drostyn nhw eu hunain yn ei mwynhau hefyd. Dwi’n eitha siŵr y byddan nhw’n mwynhau sylwi ar yr ail-adrodd o liwiau a delweddau hefyd.

“Mae gen i ddiddordeb mewn cwiltiau a gwaith clytwaith ers fy arddegau, pan wnaeth fy mam gwilt i mi,” meddai Valériane, ac ers symud o Ffrainc i Gymru, mae hi wedi peintio a darllen llawer am y grefft gwiltio Gymreig, “sy’n hollol unigryw.” Mae’n mynnu ei fod yn llawer mwy na chrefft, “mae’n gelf haniaethol gain!” Mae’r gyfrol hyfryd hon yn hynod gain hefyd – llongyfarchiadau, Valériane! Mi wnaiff anrheg Nadolig gwych. Mae’n glawr caled ac yn fargen am £5.99 (Y Lolfa).

Isio sgwennu ar gyfer bobl ifanc?

Fory (dydd Gwener) ydi’r diwrnod cau ar gyfer gwneud cais am gwrs wythnos am ddim yng Nghanolfan Ysgrifennu Tŷ Newydd.

Mae hwn wir yn gyfle arbennig gan Llenyddiaeth Cymru a Chyngor Llyfrau Cymru.
Chwilio am bobl sydd eisiau ysgrifennu ar gyfer bobl ifanc ydan ni, a nifer cyfyngedig o lefydd sydd ar gael.

Dowch ‘laen – crafwch am amser i ffwrdd o’r gwaith; perswadiwch rywun i gymryd y plant am chydig ddyddiau. Manon Steffan Ros

a fi yw’r tiwtoriaid a dan ni’n ysu am gael trafod eich syniadau, eich helpu i feddwl am syniadau, eich rhoi ar ben ffordd ym mhob ffordd, er mwyn cael mwy o lyfrau gwych, difyr, cynhyrfus, hardd, hapus, trist, emosiynol, amhosib eu rhoi i lawr i fachu dychymyg pobl ifanc Cymru (a thu hwnt).

Gyrrwch eich cais heddiw https://bit.ly/2kSTgZb

Os nad ydach chi wedi bod yn Nhŷ Newydd eto, mae’n le hudolus, ac mae’r bwyd yn wych! Ac yno, fel mae’n digwydd, ar gwrs tebyg i hwn, flynyddoedd yn ôl, y ces i’r syniad am fy ‘best-seller’, sef trioleg ‘Bywyd Blodwen Jones’ ar gyfer dysgwyr (fydd yn cael ei ail-gyhoeddi’n fuan efo cloriau newydd)

Seren a Sbarc a Hunllef o Anrheg

Dwi’n berson lwcus iawn – dwi’n un o 10,000 sydd wedi derbyn hwn drwy’r post!

Dyma fwy o’r 10,000:

Babi Huw Aaron ac Elidir Jones ydi Seren a Sbarc, llyfr gafodd ei ariannu gan Lywodraeth Cymru mewn cydweithrediad ag Undeb Rygbi Cymru. Pam? Am ei fod yn hybu dysgu a defnyddio’r Gymraeg drwy rygbi! Ieee! Syniad gwych.

Mae ‘na wefan, ond dydi o ddim yn gweithio i mi (gremlins?) ond mae’n ddigon hawdd dilyn y cyfrif twitter:@LlyfrauBroga

Dyma i chi flas o’r llyfr:

Cyfuniad o hiwmor boncyrs Huw ac Elidir yn gweithio i’r dim. Mae’n deud ar y cefn ei fod yn “Llyfr comic addas i blant 7+ ac oedolion cŵl.” Yhy. Felly dwi’n oedolyn cŵl achos dwi wedi ei fwynhau o’n arw.

Mae’r stori am yr arwyr Seren a Sbarc yn dilyn tîm rygbi Cymru i Siapan a cheisio dod o hyd i Cwpan y Bydysawd (mae rhyw grinc wedi ei ddwyn) gan orfod brwydro yn erbyn Ninjas, Robots a Robo-ninjas! Heb sôn am y Robo-anghenfil sy’n ymosod ar ddinas Tokyo.

Dyma i chi ran o ddechrau’r llyfr, ac mi wnes i biffian chwerthin efo’r llinell am y tocyn llyfr… ha!

Gwnaeth hwn i mi biffian hefyd:

Hiwmor oedolyn mae’n siŵr… ond mae ‘na bethau yma i apelio at hiwmor plant ac oedolion. Dwi ddim am ddifetha’r hwyl i gyd i chi, gwell i chi ei ddarllen drosoch chi’ch hun, ac os na chewch chi afael ar gopi caled, mae’r e-lyfr ar gael i’w lawrlwytho AM DDIM yma:
👉
http://bit.ly/2mp01mw

Llongyfarchiadau Huw ac Elidir – gwych!
A llongyfarchiadau hefyd i dîm Cymru am wneud mor dda yn Siapan.

A llongyfarchiadau i dîm De Affrica am ennill y cwpan! Haeddiannol iawn.

Llyfr arall, cwbl wahanol sydd newydd ei gyhoeddi ydi hwn:

Mae lluniau Graham Howells yn wych, sbiwch:

Ac mae o’n arbennig o dda am wneud angenfilod!

Dilyniant i Y Bwbach Bach Unig

ydi hwn, ond does dim angen bod wedi darllen hwnnw er mwyn mwynhau hwn. Ac ia, fi sydd wedi addasu hwn, ac ydi, mae cymeriad Aled yn ddeheuol (gan mai yn ne-orllewin Cymru mae’r cyfan yn digwydd) ond gog ydi’r Bwbach. Felly dwi’n gobeithio y bydd yn apelio at blant dros Gymru.

Mi wnes i weithio’n galed i symleiddio’r arddull, ond gawn ni weld be fydd eich barn chi!

Pam mod i wedi cytuno i’w addasu, a finna’n tantro cymaint yn erbyn gormod o addasiadau? Oherwydd mai llyfr o Gymru, gan Gymro ydi hwn! Ac mae llyfrau gwreiddiol o Gymru angen sylw. Felly nyyyy!

Os dach chi isio gwybod mwy am gymeriadau o fyd y tylwyth teg yng Nghymru, mae ‘na wrach o’r enw Ceridwen yma, a’r Ladi Wen, Gwyn ap Nudd – Y Brenin Gwyrdd, Mallt y Nos, Yr Hwch Ddu, Cŵn Annwn – maen nhw i gyd yma! A gwers am fwlis a bwlio… llyfr bach hyfryd yn fy marn i. Llongyfarchiadau, Graham Howells!