Holi Mair Wynn Hughes

Edrych mlaen at y Steddfod? A fi – ac un o’r pethau cynta fydda i’n eu gwneud ( ar ôl gosod fy stondin efo’r campafan – os gai help rhywun i godi’r adlen hurt sy gen i) fydd holi’r awdures Mair Wynn Hughes. Mi fydd hynny’n digwydd  am 5.00 ar y pnawn Sul cynta, Awst 6ed yn y Llannerch ( llwyfan bach cysurus a chlên rhywle’n agos at y babell Lên meddan nhw) a chyn hynny, am 4.00 yn y Babell Lên, mi fydd hyn yn digwydd:

‘Hwyl Sgrifennu gyda Mair Wynn Hughes’ – Mwyniant o dros hanner can mlynedd o sgrifennu ar gyfer plant a’r arddegau, gyda darlleniad byr.

Dros hanner can mlynedd?! Ia, mae hi wedi cyhoeddi rhyw 103 o lyfrau dros y blynyddoedd. Dyma rai ohonyn nhw:

A dyma chydig mwy:

Sori, does gen i ddim lle i 103 clawr llyfr.

A dyma i chi un o’r rhai sgwennodd hi ar gyfer plant hŷn:

A dyma daflen Adnabod Awdur amdani wnaethpwyd sbel yn ôl:

Ia, landrofyr, felly mae’n amlwg ei bod hi’n byw ar ffarm tydi? Neu jest yn hoff o landrofyrs? Na, roedd hi’n wraig ffarm ac athrawes yn ogystal â bod yn awdures – dynes brysur – a hynod ddawnus.

Mi enillodd Wobr Tir na-Nog 4 gwaith, a dyma adolygiad o un ohonyn nhw – ‘Ein Rhyfel Ni’:

Hanes ifaciwîs o Lerpwl sy’n dod i ardal wledig ar Ynys Môn a geir yma. Brawd a chwaer yw canolbwynt y nofel, Norman a Milly; y mae eu tad yn filwr a’u mam yn gweithio mewn ffatri arfau. Dônt i aros ar fferm Tomos, ac wedi cyfnod o ansicrwydd ar ôl cyrraedd, o ran yr ifaciwîs a’r teulu o Gymru sy’n eu lletya, cawn hanes y ddau o Lerpwl yn ymgartrefu ac yn magu hyder ar y fferm ac yn yr ysgol.

Mae’r stori’n datblygu’n ddiddorol gyda nifer o hanesion dwys a digrif ar hyd y daith, megis awyrennau’n ymladd, gwisgo masgiau nwy, a’r Hôm Giard. Wrth i’r plant o Lerpwl ymgartrefu yng Nghymru, mae eu Saesneg hefyd yn graddol droi’n Gymraeg hyfryd, a’u defnydd o’r iaith weithiau’n codi gwên. Er bod yma hanesion doniol, mae’r awdur hefyd yn crybwyll sawl digwyddiad sy’n tanlinellu pa mor erchyll yw rhyfel, yn arbennig tua diwedd y stori.

Ceir yma felly ddarlun dilys a chredadwy o fywyd Cymru yn ystod yr Ail Ryfel Byd, a nofel gwerth ei darllen yn sicr, gyda lluniau cynnil Jac Jones yn rhoi cipolwg ar y cyfnod ac yn dod â’r cymeriadau’n fyw.

Elin Meek

Mae ‘na linc fan hyn i chi gael gwybod bron bob dim am Mair:

AA-MairWH

Ond, er mwyn i chi ddysgu chydig mwy na hynna amdani cyn y Steddfod, dwi wedi bod yn ei holi am ei hoff lyfrau yn blentyn, a dyma’r atebion:

 

1. Llyfrau Ysgol Gynradd

Anodd cofio erbyn hyn, mae o mor bell yn ôl! Cymraeg – Llyfr Mawr y Plant, wrth gwrs!

A Dail Difyr, os ydw i’n cofio’r teitl yn iawn. ( ydach – Bethan)

Nansi’r Dditectif.

Helynt Coed y Gell

 

Saesneg – Sunny Stories

The Railway Children

The Children of the New Forest.

2) Uwchradd.

Cymraeg –Nofelau Daniel Owen

Saesneg – Jane Austen, Trollope,- rhywbeth fedrwn i gael gafael arno.

 

 

2) Fyddwch chi’n dal i ddarllen llyfrau plant?

Pori’n ysbeidiol yn myd llyfrau plant o dro i dro.

Cymraeg – rhai i’r arddegau gan amlaf, fy hoff awdur: Gareth F Williams.

Saesneg – Gangsta Granny a.y.b gan David Walliams

 

(sori – methu peidio â gweld tebygrwydd rhwng Mair a’r nain…Bethan)

The Chronicles of Ancient Darkness  gan Michelle Paver – mwynhau rhain yn arw.

 

3) Hoff arlunydd?

Jac Jones. Y fantais wrth weithio efo Jac oedd ein bod yn medru ymgynghori wyneb yn wyneb.

Elwyn Ioan wedi dylunio llyfrau Wali Wmff a Morus Mihangel. Rwy’n gwerthfawrogi gwaith y ddau.

(Elwyn yn ddiweddar a sbel yn ôl, wastad efo barf)

4) Be wnaeth i chi ddechrau sgwennu?

Angen storïau Cymraeg i blant fy nosbarth yn y chwedegau cynnar.

5) Be dach chi’n ei fwynhau fwya am sgwennu?

Anodd dweud. Mae cymaint o bleser i’w gael wrth ddatblygu syniad yn thema, creu cymeriadau, a gadael iddyn nhw wau y stori wedyn.

6) Dwedwch chydig am eich nofel ddiweddara i blant.

I’r arddegau oedd fy nofel ddiweddaraf, a hynny ers peth amser bellach.‘I Feysydd Pell’ dilyniant i ‘F’annwyl Leusa.’

Y ddwy nofel wedi’u lleoli yn ystod y Rhyfel Byd Cyntaf. Sut mae Leusa’n ymdopi wedi colli William, mor anodd wynebu’r siarad a phwyntio bys wedi i William gael ei ddyfarnu’n llwfr yng ngwyneb y gelyn, a’i saethu ar doriad gwawr. Yn ‘I Feysydd Pell,’ mae Leusa’n gadael cartref i nyrsio yn Ysbyty Eryri yng Nghaernarfon. Yna cawn ei phrofiadau wrth ofalu am y milwyr tu ôl i’r llinell flaen yn Ffrainc, cyn iddi hithau golli ei bywyd yno. Dwy nofel i danlinellu erchylldra rhyfel, a’r effaith ar deulu a chydnabod.

(Adolygiad o F’Annwyl Leusa fan hyn:

http://www.gwales.com/bibliographic/?isbn=9781904845515&tsid=5#top

Ond oes dim sôn am I Feysydd Pell ar gwales.com!)

7) Pa lyfr(au) plant sydd ar y ffordd nesa?

Dim un! Wedi rhoi y ffidil yn y to!

O, naaa! Dowch i wrando arni yn y Steddfod ar y 6ed – i weld os allwn ni ei pherswadio i newid ei meddwl…

Holi Morgan Tomos

Morgan Tomos ydi’r diweddaraf i ateb fy nghwestiynau i. Mae o’n fwyaf adnabyddus am ei gyfres am Alun yr Arth:

ond mae o wedi sgwennu ambell lyfr arall hefyd, ac mae ‘na fwy ar ei wefan o (linc yn is i lawr y blog).

Daw Morgan  o Gaernarfon yn wreiddiol ond mae’n byw ym Mirmingham ar hyn o bryd – ond yn ceisio gwneud ei ffordd yn ôl i Gymru. Mae wedi’i hyfforddi fel animeiddiwr ac mae wrth ei fodd yn teithio o gwmpas ysgolion Cymru yn trafod llyfrau a chynnal gweithdai.

A dyma ei atebion o am ei hoff lyfrau:

1. Pa lyfrau oeddet ti’n eu hoffi yn blentyn? a) Ysgol Gynradd  – Cymraeg a Saesneg. Sali Mali
   

   

   a Seraffin: roedd na gyfeithiad Cymraeg ohono fo ar gael yn y 1970au: 

 

1.    

  a Barti Ddu gan T Llew Jones

Allai ddim cofio rhai Saesneg.

Ysgol Uwchradd – Cymraeg a Saesneg.

Allai ddim cofio heblaw am i mi droi at lyfrau y gwnaed ffilmiau ohonynt er mwyn cymharu.

2. Wyt ti’n dal i ddarllen llyfrau plant? Pa rai wyt ti wedi eu hoffi’n ddiweddar?

Tydw i ddim wedi darllen llyfrau i blant yn ddiweddar heblaw mewn sesiynau gyda phlant. Roedd ‘na un am ddeinosoriaid.

 

3. Pwy ydi dy hoff ddylunydd/arlunydd llyfrau?

E H Shepard. Mae ei luniau’n llawn brwdfrydedd.

 

4. Be nath i ti ddechrau sgwennu?

Sgwennu ar gyfer fy mhlant yn gyntaf. Mae’r ddau, Robin a Carwyn, yn eu harddegau rŵan.

 

5. Be wyt ti’n ei fwynhau fwya am sgwennu?

Cyfuno llun a geiriau.

 

6. Dwed chydig am dy lyfr diweddara i blant.

Alun yr Arth a’r Ddraig Fach Goch. Yn y stori mae Alun yn dod yn ffrindiau a Draig Goch ac yn cael dysgu am Gymru. Daeth y stori’n fyw yn ystod sesiwn gyda plant Ysgol Bro Dyfrdwy.

 

7. Pa lyfr(au) plant sydd ar y ffordd nesa gen ti?

Dwi wedi bod yn arbrofi. Mae sefyllfa llyfrau plant wrthi’n newid gyda theclynnau megis yr i-pad ac ati ac mae’n rhaid ymateb i hyn; ymateb yn swyddogol ond yn y bôn yn answyddogol ac anffurfiol oherwydd y bwriad yw cynnal brwdfrydedd tuag at ddarllen – am fwynhad ac i gynnal gwerthoedd.

Felly dwi wedi bod yn creu stori gyda phlant Ysgol Bro Dyfrdwy gan greu stori’n seiliedig ar syniadau’r plant, ‘Gwlad y Gacen’. Y bwriad yw mynd drwy’r broses fesul cam ond gorffen gyda stori gyfa. Mi wnes i rywbeth tebyg gyda phlant ysgol yn ystod yr Ŵyl ‘Spread the Word’ (Lleidr Cariad) ym mis Mawrth. Y prif fwriad yw creu stori – rhaid i stori sefyll ar ei thraed ei hun heb ddyletswyddau y tu allan i’r stori. Mi fuasai’r Ysgol yn cyflawni y gwaith angenrheidiol o gynnig addysg, ond hefyd yn cynnig y llwyfan i ddangos yr hwyl a sbri sydd i’w gael o weithio’n greadigol ac yn ffrwythlon. Ceisio torri tir newydd ydw i fel ymateb i’r newid ym myd llyfrau plant ac mae ffrwyth yr ymdrech hyd yma i’w weld ar:

https://morgantomos.wixsite.com/straeon

Tydw i heb osod yr oll o’r deunydd ar y wefan eto. Pwysleisiaf mai arbrawf yw hyn a dwi wedi cael modd i fyw gyda’r plant ysgol ond gyda byd y llyfrau plant yn newid rhaid cael ymateb creadigol, agored.

Diolch, Morgan!

 

Cipio’r Llyw, Awen Schiavone

Do’n i’n gwybod dim am hanes Hywel Dafydd o Aberdaugleddau, ond roedd o’n foi go iawn, yn fôr-leidr yn y 1700au, a’i hanes o sydd yn nofel gyntaf Awen Schiavone: Cipio’r Llyw.

Nofel ar gyfer oedolion ifanc ydi hi, ac mi gyrhaeddodd y bennod gyntaf restr fer cystadleuaeth Gwobr Goffa T. Llew Jones yn 2013. Cofio’r gystadleuaeth honno? Dwi’n siwr ei bod hi’n bryd ei chynnal eto – ond fel mae’n digwydd, fi enillodd yn 2013! Efo Gwylliaid.

Sgwennu nofelau ar gyfer plant 10-12 oed oedd y dasg, ond mae Cipio’r Llyw yn bendant ar gyfer oedran hŷn.

‘Mae angen mwy o lyfrau Cymraeg i blant a phobl ifainc,’ meddai Awen pan gafodd y nofel ei chyhoeddi, ‘ac mae dirfawr angen cynyddu’r nifer o lyfrau gwreiddiol yn y Gymraeg i’r gynulleidfa honno.’

Amen, medda fi, a diolch iddi am ddeud hynna ac am gynyddu’r nifer o nofelau gwreiddiol sydd ar gael yn Gymraeg i bobl ifanc!

‘Mae’n bwysig hefyd cyhoeddi llyfrau gwreiddiol i blant a phobl ifainc sy’n trin a thrafod hanes Cymru a chymeriadau hanesyddol,’ meddai Awen. ‘Y gwir amdani yw bod ein hanes yn byrlymu ag unigolion, grŵpiau o bobl, a digwyddiadau dirifedi sy’n wirioneddol ddiddorol a chyffrous…Does dim rheswm dros beidio rhoi bywyd newydd i’r hanesion hyn.’

Amen eto! Dyna roedd T Llew isio ei wneud hefyd, ac yn bendant, mae ei ddylanwad o yn amlwg ar y nofel hon – mae hi am fôr ladron yn un peth! – ond dechreuodd Awen ysgrifennu’r gyfrol pan oedd hi’n cwblhau traethawd ymchwil MPhil ar waith T. Llew Jones, felly mae hi’n gwybod ei stwff.

Rydan ni’n cael cliw at bwy mae hi’n anelu’r nofel bron yn syth:  ar yr ail dudalen: ‘Roedd Hywel wedi troi’n bymtheg oed yr wythnos honno…’

A dyma i chi’r dudalen gynta i chi gael blas o’r cynnwys a’r arddull:

 

A dyma dudalen lle mae pethau’n dechrau poethi:

Dwi ddim yn mynd i ddifetha’r darllen i chi drwy ddeud be sy’n digwydd, ond ydi, mae hogyn bach diniwed o Gymru yn cael ei ddenu i’r môr i chwilio am antur, ond mae’n cael llawer mwy o anturiaethau na’r disgwyl!

Mae’n dechrau’n dda, ac ro’n i isio gwybod be fyddai’n digwydd i Hywel, ac ro’n i mor siŵr y byddai’r mor leidr brawychus, Capten England yn dod yn ôl i’r stori gan fod pennod yn gorffen efo: ‘Gweddiodd na fyddai’n dod ar draws Capten England fyth eto.’

Ond (sori – sboilar) tydan ni ddim! Ro’n i wedi fy llyncu gymaint gan y stori erbyn y diwedd (mae’r diweddglo yn arbennig) mi fues i’n gŵglo Hywel/Howell Davies a gweld bod nifer fawr o’r hyn ddigwyddodd yn berffaith wir. A dyma be sy’n anodd am sgwennu nofelau hanesyddol – weithiau, byddai’r stori’n well pe tae’r awdur yn newid/ychwanegu ambell i dro neu dwist na ddigwyddodd go iawn. Roedd Capten England yn gymeriad mor dda ro’n i wir, wir isio’i weld o eto! Ond dyna fo, trafodwch – a fyddai hynny’n gelwydd neu yn welliant ar nofel? Do’n i chwaith ddim yn derbyn y busnes efo peidio edrych ar lythyr tan ryw fan penodol – fyddai Capten England ddim callach pryd agorwyd y llythyr na fyddai? Ond bosib ‘mod i wedi colli rhywbeth yn fanna – ac efallai ei fod yn ffaith hanesyddol. Ond roedd o’n fy nharo i’n od.

Mi fydd yn ddifyr gweld be fydd ymateb pobl ifanc i hon. Dwi’n gwybod y bydd nifer yn ysu i gŵglo’r hanes go iawn fel wnes i. Ond dwi ddim yn meddwl y bydd hi’n apelio at fechgyn 15 + sydd ddim yn hoffi darllen/ darllen nofelau rhyw lawer. Ia, wn i, wrth gwrs na fyddai hi! Ond mae modd eu troi nhw weithiau, efo nofel fer, hawdd sydd ddim yn gwastraffu geiriau. Nid nofel felly mo hon. Dwi’n rhyw deimlo ei bod hi’n rhy hir a bod gormod o dindroi ac ailadrodd – ond fi ydi honno, ac mae ’na ormod o’r golygydd sy’n hoffi’r siswrn ynof fi, beryg! Mi fydd eraill yn hoffi’r agweddau hynny mae’n siwr.

Mi ddylai testun am fôr ladron apelio, yn enwedig a hithau wedi ei seilio ar hanes go iawn. Mae’r disgrifiadau o fywyd (a bwyd) ar y môr, yr ymosodiadau ar longau a’r gwahanol wledydd maen nhw’n eu gweld yn ardderchog – ond dydi hynny ddim yn synnu rhywun gan fod Awen wedi teithio gryn dipyn,

ac mae/roedd ei blog hi am ei theithiau llynedd yn wirioneddol ddifyr! Ac yn dangos bod ganddi wir addewid fel awdur. Dyma fo fan hyn: https://aweawen.wordpress.com/.

Mae Awen yn llwyddo i greu cyffro ac ro’n i’n aml yn gwingo wrth feddwl ‘O na…mae na rywbeth ofnadwy’n mynd i ddigwydd rŵan…’

Ond os ydach chi isio gwybod be ddigwyddodd – prynwch gopi! £6.99 Gwasg y Lolfa.

Mwy o nofelau ar gyfer Oedolion Ifanc rŵan os gweli di’n dda,  Awen. Ond fy ‘nhip’ i  i ti ydi – chwynna fwy tro nesa!

O, ac mae’n gywilydd bod cyn lleied o adolygu nofelau ar gyfer Oedolion Ifanc – dwi’n meddwl mai fi ydi’r cynta, ac mae hi allan ers mis Mai. Braf fyddai cael barn rhywun 15-18 oed ynde? Eu barn nhw sy’n bwysig wedi’r cwbl.

 

Alun yr Arth rhif 25!

Hwrê! Mae un o’r cyfresi Cymraeg mwyaf poblogaidd erioed i blant bach dan 7 oed yn dathlu carreg filltir yr wythnos hon: cyhoeddi’r 25ain llyfr yng nghyfres Alun yr Arth! Sef  Alun yr Arth a’r Ddraig Fach Goch gan Morgan Tomos.

Yn yr antur newydd, mae Alun yn mynd ar gefn y ddraig fach goch ar daith o gwmpas Cymru ac mae’n gweld rhyfeddodau di-ri! Ond pam mae’r ddraig fach mor drist?

‘Daeth y syniad ar gyfer y stori am Alun yn cwrdd â draig goch ar ôl i mi ymweld â Ysgol Bro Dyfrdwy yn gynharach eleni,’ meddai Morgan, ‘Mae’r diolch yn bennaf i ddisgybl o’r enw Meirion am ddychmygu’r syniad!’

Dwi’n siŵr bod Meirion wrth ei fodd bod ei syniad o wedi creu llyfr!

Mae dros 50,000 o lyfrau Alun yr Arth wedi eu gwerthu erbyn hyn. Dyma i chi rai ohonyn nhw:

A dyma’r awdur – a’r arlunydd, Morgan, yn sgwrsio efo criw o blant bach:

Mae ‘na hefyd apiau a chyfrif Twitter a gwefan newydd sbon – linc fan hyn: http://www.alunyrarth.cymru/
Cefnogwch lyfrau gwreiddiol Cymraeg!

Holi awdur – Gwenno Hughes

Hwrê! Mae ‘na awdur llyfrau plant arall wedi ateb fy nghwestiynau! Dyma i chi luniau o Gwenno Hughes:

Ers iddi ddechrau cyhoeddi yn 1999, mae Gwenno wedi sgwennu naw o lyfrau ac wedi cyfrannu i nifer o gyfrolau, a dyma rai ohonyn nhw:

 

Yn 2000, enillodd Wobr Tir na n-Og am ‘Ta-ta Tryweryn!’

Adolygiad Gwales

Syniad da yw cydio mewn digwyddiadau hanesyddol a’u cyflwyno ar ffurf stori neu nofel fer i blant. Dyna a wneir yma, a helynt boddi Cwm Celyn yw’r digwyddiad. Mae Iolo a rhai o’i ffrindiau yn clywed am y bygythiad ac yn mynd ati i chwarae rhan bwysig yn yr ymgyrch i geisio achub y cwm. Mae’r ymdrech hon yn cynnwys y daith enwog i Lerpwl pan gafodd Gwynfor Evans gyfle i annerch y Cyngor.

Ofer oedd y cyfan wrth gwrs, a cheir darlun o’r tristwch a ddaeth ar ddiwedd yr ymgyrch, a’r mudo o’r tai a’r ffermydd, cau yr ysgol a dymchwel y capel. Na, ni ystumiwyd dim ar ffeithiau pwysig yr hanes hwn.

Mae’r stori wedi ei hadrodd o safbwynt un teulu’n arbennig – teulu Iolo – ond yn dwyn i mewn lawer o gymeriadau eraill gan gynnwys y nain nad yw byth am adael. Ond gadael sy raid, hyd yn oed iddi hi.

Mynegwyd mŵd y lle a’r awyrgylch oedd yn bodoli yn y pentre a’r cyffiniau yn ardderchog gan yr awdur, ac y mae’r nofelig fechan hon yn enghraifft dda o’r hyn y gellir ei wneud, a hynny heb fynd dros ben llestri, gyda digwyddiadau yn hanes Cymru ddylai fod yn rhan o wybodaeth ac etifeddiaeth pob plentyn o Gymro.

Elfyn Pritchard

A dyma fwy o’i llyfrau hi:

Hogan o Gaeathro ger Caernarfon ydi Gwenno, ond erbyn hyn, mae’n byw yng Nghaerdydd ac yn sgwennu’n llawn amser i gyfresi fel Pobol y Cwm, Dim ond y Gwir,

Rownd a Rownd, Tipyn o Stad ayyb.

O, ac mae’r awdures Emily Huws yn rhyw fath o fodryb iddi! Cyfneither i’w thad, “felly Anti Emily ydi hi wedi bod i mi rioed,” meddai Gwenno. “Mae hi’n handi iawn cael awdures yn Anti – llyfrau am ddim!”

A dyma atebion Gwenno am ei hoff lyfrau:

1. Pa lyfrau oeddet ti’n eu hoffi yn blentyn?  a) Ysgol Gynradd  – Cymraeg a Saesneg

Cymraeg – unrhyw beth gan T Llew Jones, Dafydd Parry, Emily Huws. Ro’n i’n hoffi’r cyfieithiadau Cymraeg o lyfrau Asterix hefyd.

Saesneg – hoffi llyfrau Enid Blyton yn fawr.

b) Ysgol Uwchradd – Cymraeg a Saesneg

Cymraeg – Cysgod y Cryman.

Saesneg – The Secret Diary of Adrian Mole.

 

2. Wyt ti’n dal i ddarllen llyfrau plant? Pa rai wyt ti wedi eu hoffi’n ddiweddar?

Ydw, dwi’n dal i ddarllen llyfrau plant. Dwi’n hoffi gweld beth sydd ar y farchnad. Dwi wedi joio holl gyfres Harry Potter a dwi’n hoffi stwff David Walliams. Doniol! Joio llyfrau Bethan Gwanas hefyd!   ( diolch, Gwenno! – 🙂  )

3. Pwy ydi dy hoff ddylunydd/arlunydd llyfrau? Pam?

Quentin Blake – lluniau prysur, hudolus.

 

4. Be nath i ti ddechrau sgwennu?

Dwi’n sgwennu ers pan dwi’n ddim o beth, yn bennaf achos mod i’n cael pleser mawr o wneud hynny.

5. Be wyt ti’n ei fwynhau fwya am sgwennu?

Dechrau gyda thudalen wag ac yna gorffen gyda stori gyflawn. (Er gwaetha’r chwys, gwaed a chrafu pen!)

 

6. Dwed chydig am dy nofel ddiweddara i blant.

Yr Haf Gorau Erioed oedd y nofel olaf i mi ei hysgrifennu. Stori antur wedi’i lleoli yn ardal Tregaron ydi hi. Mae yna ddirgelwch, dihirod a drwgweithredu ynddi hi. Ond hefyd mae yna dipyn o sbort!

Adolygiad Gwales

Mae’r ysgol wedi cau am wyliau’r haf. Mae chwe wythnos hir i’w llenwi. Mae angen chwilio am antur. A dyma’n union sydd yma. Yn un o lyfrau cyfres Strach, mae Yr Haf Gorau Erioed gan Gwenno Hughes yn ein cyffroi ninnau.

O’r dechrau un mae Lefi Daniels yn benderfynol o gael gwyliau gwerth chweil, gan wibio ar ei BMX ar drywydd ambell antur. Ond a ydi’r ffeit bomiau dŵr yn ddigon i gadw ei ffrind gorau Sbaner a’i chwaer fach Meg ac yntau rhag diflasu? Yn fuan iawn, mae pethau wedi poethi. Mae’r tri yn dod ar draws antur annisgwyliedig o gyfrinachau, o gyffuriau ac o drysor cudd ac maen nhw’n treulio eu haf yn mynnu dod at wraidd dirgelwch Keira a Tal, y ddau ddieithryn. Mae hon yn nofel sydd yn siŵr o’ch difyrru wrth i’r dirgelwch ddwysáu, gan gyrraedd uchafbwynt gyda’r ddamwain ddramatig ar y diwedd. Ydi Gang Gelli Aur yn dod yn arwyr, neu a yw hi’n ormod o gymhlethdod i dri mor ifanc?

Yn hynod o debyg i gyfres y Pump Prysur (addasiadau o waith Enid Blyton), stori yw hon sydd yn ddigon i’n difyrru ninnau hefyd. Bron nad yw’r darllenydd yn teimlo ei fod yntau wedi bod trwy’r antur law yn llaw â Lefi. O na byddai’n haf o hyd!

Llinos Griffin

 

7. Pa lyfr(au) plant sydd ar y ffordd nesa gen ti?

Does gen i ddim byd pendant ar y ffordd ar y funud – ond mae na gwpwl o syniadau’n cynniwair. Watch this space!

Diolch, Gwenno – pob lwc efo’r syniadau!