Siom y llyfrau codi fflap

Wel wel… a ninna’n meddwl bod llyfrau plant bach sy’n cynnwys fflapiau a darnau o ddefnydd ac ati un ddefnyddiol ar gyfer annog plant i ddysgu darllen.

Gesiwch be? Tydyn nhw ddim – wel, ddim efo pawb. Mi nath tîm ymchwil o’r Royal Holloway yn Llundain ymchwil efo 31 plentyn –

mi wnes i stopio yn fanna i weld os oedd gan Bruce air da am ‘toddler’ a dwi wedi chwerthin , rhaid cyfadde: Allwch chi ddim galw toddler yn dwlsyn! Nac yn dwlsen!

geiriadur

toddler n.[-]

plentyn bach (plantos, plant bach), crwtyn m (crwts), croten (crotesi), crotesf (crotesi),N.W:occ: twdlyn m, shwlyn m, S.W:occ: twlsyn m,twlsen f, A rwan dwi methu cael gwared o’r bocs yma. Grrr. Ond jest isio deud : mi ddarganfyddodd yr ymchwil ‘ma (efo 31 twdlyn) bod y plant wedi dysgu’n llawer gwell efo’r llyfrau heb fflapiau. Ffaith! “Too distracting” oedd yn y datganiad ac mi fedra i ddeall hynnna. Mae plant yn ffidlan gymaint efo nhw, dydyn nhw’m yn sbio ar y geiriau na’r lluniau nacdyn? Weithiau, mae gormod o ffrils yn gallu gneud mwy o ddrwg nac o les.

Holi Siân Lewis

Mae’r awdures Siân Lewis newydd fod ar daith @LlyfrDaFabBooks o gwmpas ysgolion Sir Benfro. Un o gynlluniau  Cyngor Llyfrau Cymru i hyrwyddo darllen ydi’r daith, cyfle i ddisgyblion gyfarfod ag un o’n hawduron mwyaf toreithiog a phrofiadol. A dyma hi efo rhai o blant y sir:

Siân oedd awdur cyfrol fuddugol categori cynradd Gwobrau Tir na n-Og 2016 gyda’r arlunydd Valériane Leblond, sef Pedair Cainc y Mabinogi.

Hi hefyd oedd enillydd Tlws Mary Vaughan Jones yn 2015 am ei chyfraniad amhrisiadwy i fyd llenyddiaeth plant.  Mae’r tlws  yn cael ei roi bob tair blynedd i awdur sydd wedi sgwennu nifer fawr o lyfrau plant Cymraeg dros gyfnod o flynyddoedd, ac mae Sian Lewis wedi sgwennu cannoedd – yn llythrennol! Dros 250 o lyfrau i blant a phobl ifanc hyd yma.

Dyma i chi rai ohonyn nhw:

Un o ardal Aberystwyth ydy hi yn wreiddiol. Astudiodd Ffrangeg ( fel fi!) yng Nghaerdydd cyn dychwelyd i’w bro enedigol, ac ar  ôl cyfnod fel llyfrgellydd, bu’n gweithio i adran gylchgronau’r Urdd cyn mentro fel awdures ar ei liwt ei hun.

Ond tybed pa lyfrau oedd yn apelio ati hi ers talwm? Be ysbrydolodd hi i sgwennu cymaint? Dyma ei hatebion:

1. Pa lyfrau oeddet ti’n eu hoffi yn blentyn?
a) Ysgol Gynradd  – Cymraeg a Saesneg

Ces gopi o Trysorau Hafod Aur gan Idwal Jones ar fy mhen-blwydd yn 6. Dwi’n dal i gofio’r ias a’r cyffro, ac yn ffan o lyfrau ditectif byth oddi ar hynny.

Roedd nofelau Meuryn yn ffefrynnau.

Llyfr arall sy’n aros yn y cof yw Bandit yr Andes gan R. Bryn Williams.

Yn Saesneg roedd raid darllen llyfrau Enid Blyton, yn enwedig y gyfres ‘Adventure’. Yr unig un wnaeth fy siomi oedd The Mountain of Adventure a leolir yng Nghymru. Cymru Blytonaidd iawn!

Ro’n i hefyd yn mwynhau darllen llyfrau’r Americanesau Louisa M. Alcott a Susan Coolidge,

ac am amrywiol resymau, mae gen i atgof hapus iawn o The Secret Garden gan Frances Hodgson Burnett.

Bob wythnos, rhwng fy mrawd a minnau, roedd hanner dwsin o gomics yn cyrraedd tŷ ni. Gwych!

b) Ysgol Uwchradd – Cymraeg a Saesneg

Dyma pryd y dechreuais ddarllen a mwynhau llyfrau Islwyn Ffowc Elis ( dyna fo uchod),

a threulio oriau difyr yn helpu ditectifs John Ellis Williams i ddatrys dirgelion.

Ro’n i’n breuddwydio am fod yn prima ballerina, felly ro’n i’n llowcio llyfrau Lorna Hill, A Dream of Sadler’s Wells ac ati.

Ffefryn arall oedd Mabel Esther Allan.

Hefyd fe etifeddais set o glasuron y 19eg ganrif – Dickens, Hardy, Brontë – a chael blas go iawn ar eu darllen.

2. Wyt ti’n dal i ddarllen llyfrau plant? Pa rai wyt ti wedi eu hoffi’n ddiweddar?

Dwi’n darllen llyfrau plant/pobl ifanc mor aml ag y galla i. Dwi newydd orffen Gwalia gan Llŷr Titus a The Lie Tree gan Frances Hardinge, llyfrau arbennig o dda.

Hefyd dwi wedi darllen Wcw, Mellten a Cip y mis hwn. Dwi’n dal i hoffi comics.

3. Pwy ydi dy hoff ddylunydd/arlunydd llyfrau? Pam?

Dwi wedi cydweithio â llawer o arlunwyr, felly alla i ddim dewis rhyngddyn nhw. Mae gan bob un arddull unigryw, a dwi wastad yn edrych ymlaen yn fawr at weld ymateb arlunydd i’m llyfrau.

4. Be nath i ti ddechrau sgwennu?

Dwi wedi bod yn arwres llawer iawn o storïau, achos roedd fy mam a ’nhad yn eu creu ar fy nghyfer bob nos wrth fynd i’r gwely. Dechreuais innau sgrifennu storïau cyfres – dechrau ond nid gorffen bob tro – a’u gyrru at Mam-gu a Tad-cu.

Mi ddechreuais sgrifennu go iawn ar ôl cael swydd yn Adran Gylchgronau’r Urdd.

5. Be wyt ti’n ei fwynhau fwya am sgwennu?

Dwi’n mwynhau gweld syniadau’n sboncio o nunlle, eu dal, a rhoi trefn arnyn nhw – wel, gobeithio!

6. Dwed chydig am dy nofel ddiweddara i blant.

Pedair Cainc y Mabinogi oedd fy llyfr diwethaf.

Roedd yn hwyl ailgwrdd â’r hen gymeriadau, didoli’r deunydd a phenderfynu sut i’w gyflwyno. Mae lluniau Valériane Leblond

yn rhoi naws gwreiddiol, gwahanol i’r llyfr.

7.Pa lyfr(au) plant sydd ar y ffordd nesa gen ti?

Stori’r Brenin Arthur fydd y llyfr nesaf. Unwaith eto mae’r hanesion yn bodoli’n barod, llawer gormod i un llyfr. Felly’r dasg yw dewis pa storïau i’w cynnwys a sut i’w clymu wrth ei gilydd. Mae Prydain gyfan a rhannau o’r cyfandir wedi hawlio Arthur, ond Arthur y Cymry fydd hwn.

Diolch yn fawr, Siân! Edrych mlaen yn arw at weld Stori’r Brenin Arthur.

Apêl rhyngwladol!

Meddwl y byswn i’n rhannu hwn efo chi. Mae niferoedd ymwelwyr â’r blog yn amrywio’n arw o wythnos i wythnos, ac nid hon ydi’r wythnos brysura o bell ffordd, ond difyr ydi gweld yr amrywiaeth o ran gwledydd. Pobl sy’n dysgu Cymraeg dybiwn i.

Llyfrau Plant Gwobr Costa

Mae’r fersiwn Prydeinig o Wobr Tir naN’og, y Gwobrau Costa, newydd gyhoeddi eu rhestr fer o lyfrau gorau ar gyfer plant, ac mae’n edrych yn ddifyr iawn:

Mae Francesca Simon ( awdures llyfrau Horrid Henry) wedi cyhoeddi ei nofel gyntaf ar gyfer plant h^yn: The Monstrous Child sy’n gomedi du efo cyffyrddiad o chwedlau Nordig mae’n debyg. “It’s a fizzing, gory read” yn ôl The Guardian.

Mae Orangeboy gan Patrice Lawrence yn nofel ar gyfer YA ( oedolion ifanc) sy’n dilyn brwydr hogyn 16 oed efo ffawd. Hefyd yn cael ei ganmol i’r cymylau. Reit – sylw bocs sebon: Mae’r sylw mae’r llyfrau hyn yn eu cael cyn cyrraedd rhestr fer Costa yn tanlinellu cyn lleied o sylw mae llyfrau plant Cymraeg yn ei gael. Doedd neb wedi adolygu Pluen gan Manon Steffan Ros nes i mi neud ar y blog yma. Grrrr…

Yr unig un ar y rhestr dwi eisoes wedi’i ddarllen  ydi Time Travelling with a Hamster gan Ross Welford ( fawr ddim am yr hamster, mwy am y bachgen sy’n trio achub bywyd ei dad drwy deithio mewn amser) ac mae’n wirioneddol hyfryd. Dyma be ddeudes i amdano ar y blog ‘ma pan ro’n i ar ganol ei ddarllen:

Dwi’n cael trafferth ei roi i lawr! A dwi’n gwybod y bydda i’n crio cyn y diwedd.

Nofel efo arwr 14 oed ydi The Bombs That Brought Us Together gan Brian Conaghan, stori am gyfeillgarwch a rhyddid mewn byd o ryfela.

Rhestr dda. Dwi isio’u darllen i gyd rwan.

Mae ‘na gategoriau eraill yn y gystadleuaeth, ac yn yr un am nofel gyntaf ( ar gyfer oedolion) mae Mae name Is Leon gan Kit de Waal, un arall dwi eisoes wedi ei ddarllen.

Chwip o stori, arhosodd efo fi am hir. Ac un delfrydol ar gyfer yr arddegau hefyd, ddeudwn i.

Maen nhw’n lwcus bod cymaint o ddewis ar gael yn Saesneg tydyn? Mae’r llyfrau Cymraeg ar gyfer yr arddegau eleni yn gywilyddus o brin, ond efallai bod â wnelo marwolaeth Gareth F Williams rhywbeth â hynny. Roedd gynno fo sawl un ar y gweill.

Maen nhw’n deud bod mwy tipyn mwy o nofelau plant Cymraeg, gwreiddiol ar y gweill ar gyfer 2017. Ieeee!

Pluen

Dwi newydd orffen nofel ddiweddara Manon Steffan Ros ar gyfer plant, a dwi wedi ei mwynhau hi’n arw.

Yn ôl y wybodaeth ar gwales.com, mae hi ar gyfer plant 9-11, ond mi blesiodd hen ddynes yn ei 50au hefyd!

Stori hogyn 12 oed o’r enw Huw yn ystod un gwyliau haf  ydi hi – un haf pan ddechreuodd goelio mewn pethau oedd ddim yn bod. Dyma’r dudalen gynta:

Mae Huw wrth ei fodd yng nghwmni ei nain anghyffredin, a phan mae’n sylweddoli ei bod hi’n dechrau dioddef o salwch meddwl dydi o ddim yn siwr sut i ymateb. Daw’n amlwg ei bod hi’n cuddio cyfrinach am ei brawd, Hywel, ac wrth i Huw ymchwilio i hanes Hywel yn yr Ail Ryfel Byd, mae pethau rhyfedd yn digwydd.

Dyma ddisgrifiad Gwales:

Nofel i blant gan yr awdures boblogaidd Manon Steffan Ros, sy’n dilyn hanes Huw wrth iddo baratoi prosiect am yr Ail Ryfel Byd dros yr haf. Ond mae pethau rhyfedd yn digwydd pan mae’n dechrau ymchwilio i gyfrinach brawd ei nain, a hithau yn dioddef o dementia. Nofel annwyl gyda chymeriadau cryf, themâu heriol a neges bwysig.

A dyma be dwi newydd ei roi ar y wefan fel ‘adolygiad cwsmer’:

Arbennig! Chwip o nofel sy’n delio efo themau anodd fel effeithiau rhyfel, heneiddio a dementia ond mewn ffordd hyfryd, hynod o ddarllenadwy fydd yn apelio’n bendant at ddarllenwyr 10-14 oed (12 ydi oed y prif gymeriad) ond hefyd at bobl o bob oed sy’n mwynhau stori dda wedi ei deud yn dywyllodrus o syml.

Felly ydw, dwi’n meddwl y bydd hi’n apelio at blant h^yn na 11. Dwi hefyd yn meddwl y dylai mwy o bobl sgwennu adolygiadau ‘cwsmer’ ar wefan gwales.com. Chymrith hi ddim dau funud i chi!

Mi allai weld plant yn gwirioni efo arddull Manon yn hon. Dyma dudalen arall i chi:

Galw rhywun yn gi rhech! Hyfryd. Ac mae ei gallu i greu tensiwn yn arbennig. Mi fyddai Gareth F Williams ei hun wrth ei fodd efo hon, ac roedd o’n giamstar ar wneud i chi ddeud “O – ooo!” yn uchel wrth ddarllen stori ysbryd.

Mae pob cymeriad yn taro deuddeg. Mi wnes i feddwl ar y dechrau bod nain 84 oed braidd yn hen i fachgen 12 oed, ond fy nheulu i sy’n fwy ifanc nag arfer erbyn meddwl. Mae fy chwaer 52 oed yn nain i ferch sy’n 9 oed, ac roedd Mam  yn nain pan oedd hi’n 44 oed, felly pan roedd Naomi, ei wyres hynaf yn 12, dim ond 56 oedd hi! (Dach chi’n gweld, dwi’n gallu gneud syms er gwaetha methu fy Lefel O Mathemateg) Ond mae’n debyg bod neiniau a theidiau yn eu 80au yn fwyfwy tebygol y dyddiau yma, gan fod cymaint mwy o bobl yn cael plant yn eu 30au a’u 40au.

O, ac mae’n debyg bod rhai pobl wedi drysu oherwydd tebygrwydd y teitl a’r clawr i gyfrol o straeon byrion gan Caryl Lewis:

Ond na, cyfrol ar gyfer oedolion ydi Plu, nofel i blant ydi Pluen. Iawn?

Prynwch hon, a mwynhewch! Ew, mae’n braf gweld nofel WREIDDIOL i blant yr oed yma… maen nhw wedi bod yn brin iawn eleni.

Hoff Lyfrau Sian Northey

Mi ges i ymateb da iawn i hoff lyfrau Manon Steffan, felly dyma i chi wledd arall, gan awdures arall, Sian Northey.

Mae hi’n sgwennu a barddoni ar gyfer oedolion a phlant – yn llwyddiannus iawn, a dyma rai o’i llyfrau ei hun ar gyfer plant:

A dyma rai o’i hoff lyfrau gan awduron eraill:

1. Pa lyfrau oeddet ti’n eu hoffi yn blentyn?
a) Ysgol Gynradd  – Cymraeg a Saesneg

Mi oeddwn I wrth fy modd efo comic yr Hebog (roedd Gerallt Lloyd Owen yn athro arna i)

ac mae gen i hefyd atgofion da o athro arall, Goronwy Williams, yn darllen straeon i ni ddiwedd y pnawn a hynny pan oeddan ni y dosbarth uchaf ond un, felly tua 10 oed, a hen ddigon hen i ddarllen ar ein pen ein hunain. Dw i’n ei gofio’n darllen Y March Coch a Bandit yr Andes.

Yn Saesneg mi oeddwn I’n darllen llyfrau am ferlod – Jill and the Perfect Pony, Jill’s Gymkhana a phethau felly,

a’u darllen sawl gwaith. Yr unig un dw i wedi’i gadw ydi Ponies Plot gan C. Northcote Parkinson.

Roedd o chydig yn wahanol – yn cael ei adrodd o safbwynt y merlod ac yn ddoniol. Llyfr arall dw i wedi’i gadw am fy mod yn hoff ohono ydi The Day the Guinea Pig Talked gan Paul Gallico.

b) Ysgol Uwchradd – Cymraeg a Saesneg

Mi ges i a fy ffrindiau gyfnod hir o ddarllen nofelau Agatha Christie a’u ffeirio ymysg ein gilydd. Ac mi oeddwn i, efallai am bod fy nhad yn dod a thunelli ohonynt o’r llyfrgell, yn darllen llawer iawn o sci-fi, gan gynnwys y clasur Y Dydd Olaf.

Awdur arall mae gen i atofion braf o ddarllen ei gwaith yn fy arddegau hŷn yw Oriana Fallacci – dw i’n credu mod i’n meddwl mod i’n soffistigedig yn darllen llyfrau am wleidyddiaeth a rhyfel a hawliau merched a ballu a rheini wedi eu cyfieithu o’r Eidaleg!

2. Wyt ti’n dal i ddarllen llyfrau plant? Pa rai wyt ti wedi eu hoffi’n ddiweddar?

Yndw siŵr! Dw i wedi bod yn darllen nofelau mewn cerddi fatha One gan Sarah Crossan gan fy mod i’n trio gwneud rhywbeth tebyg;

ac mi wnes i fwynhau Gwalia gan Llyr Titus yn arw.

Y llyfr plant diweddaraf i mi ei brynu oedd Mog y Gath Anghofus gan Judith Kerr (awdur Y Teigr a ddaeth i De). Mi oeddwn i a Cira, fy wyres 5 oed, wedi mynd i Gaerdydd ar y trên ac wedi anghofio rhoi llyfr stori yn y bag! Felly roedd rhaid prynu rhywbeth, ac mi wnaethon ni ei fwynhau’n arw.

3. Pwy ydi dy hoff ddylunydd/arlunydd llyfrau? Pam?

Shirley Hughes (llyfrau Alfie a llyfrau eraill)

ac Angharad Tomos – y ddwy ohonynt yn sgwennwyr sy’n creu lluniau, neu’n artistiaid sy’n sgwennu eu straeon eu hunain.

Efallai mai cenfigenus ydw i! Ac mi ydw i’n hoff o lyfrau fel pethau ac yn credu bod pob rhan o’r dylunio yn bwysig – dewis ffont, pwysau papur, siap a maint y llyfr, popeth…

4. Be nath i ti ddechrau sgwennu?

Dw i ddim yn cofio dechrau, mae o mhell bell yn ôl erbyn hyn. Mi wnes i beidio sgwennu am gyfnod hir iawn, tua 15 mlynedd, a dw i ddim hyd yn oed yn cofio pam nes i ailddechrau. Ond fuoedd yna ddim cyfnod pan nad oeddwn i’n darllen.

5. Be wyt ti’n ei fwynhau fwya am sgwennu?

Dau beth – ar y pryd, y diflannu i mewn i stori. Mae o fatha darllen ond yn well. Ac wedyn, os ydi rhywbeth yn cael ei gyhoeddi, dw i’n mwynhau ymateb pobl, yn enwedig rhywun na fyswn i wedi’i ddisgwyl iddyn nhw ddarllen un o fy llyfrau i.

6. Dwed chydig am dy nofel ddiweddara i blant.

Y Gwaith Powdr. Hen ffatri ffrwydron sydd bellach yn warchodfa natur ydi’r gwaith powdr. Mae o wrth ymyl fy nhŷ a phan wnes i symyd i Benrhyndeudraeth a mynd a’r ci am dro yna mi oeddwn i’n gwbod yn syth mod i isio sgwennu amdano. Ac mi oedd fy nhad yn wael yn yr ysbyty pan oeddwn I’n ysgrifennu’r llyfr felly efallai mai dyna pam fod yna hen ddyn, taid y prif gymeriad, yn wael yn y llyfr. Gyda llaw, Cira ydi enw’r prif gymeriad, fel fy wyres. Felly fe ddylwn greu cymeriadau o’r enw Jac a Cerys a Joey a Casi hefyd – dyna enwau fy wyrion eraill.

7. Pa lyfr(au) plant sydd ar y ffordd nesa gen ti?

Dw i wedi cael cais i sgwennu stori fer i blant ac mae gen i syniad da. Mi fydd hi wedi’i gosod yn y dyfodol ac yn sôn am symud o un wlad i’r llall ac am groesi ffiniau. Ond dw i’n amau mai pennod gyntaf nofel fydd hi go iawn. Ac mae hynna wedi fy atgoffa am lyfr gwych arall nes i ei ddarllen pan yn blentyn – I am David gan Anne Holm. A rŵan dw i isio darllen hwnnw eto!

Diolch Sian!

Hoff lyfrau Manon Steffan Ros

Ar ddiwrnod fydd yn llawn newyddion brawychus o’r Unol Daleithiau, dyma ddechrau syniad newydd ar gyfer y blog llyfrau plant yma: holi gwahanol awduron am y llyfrau roedden nhw’n eu hoffi’n blant, be maen nhw’n ei ddarllen (a’i sgwennu) rwan ac ati.

A dyma ddechrau efo Manon Steffan Ros.

1. Pa lyfrau oeddet ti’n eu hoffi yn blentyn?
a) ysgol gynradd  – Cymraeg a Saesneg

Ro’n i wrth fy modd efo Cyfres Corryn, yn enwedig un llyfr arbennig a hyfryd o’r enw Cyfrinach Betsan Morgan gan Gwenno Hywyn.

Dwi wedi casglu’r rhan fwyaf o’r gyfres eto fel oedolyn drwy dyrchu mewn sels cist car a siopau elusen.

Yn Saesneg, dwi’n meddwl mai Boy gan Roald Dahl ydi fy hoff lyfr hyd heddiw.

Mae o’n gyfuniad perffaith o ddireidi a gwiriondeb a thorcalon. Dwi’n darllen Boy o leia’ unwaith y flwyddyn ers bron i chwarter canrif!

b) ysgol uwchradd – Cymraeg a Saesneg
Ro’n i wrth fy modd efo llyfrau gan awduron fel Judy Blume a Paula Danziger- llyfrau oedd yn son yn ddiflewyn ar dafod am fywyd go iawn pobol ifanc.
Mi wnaeth O Ddawns i Ddawns gan Gareth F. Williams newydd fy mherthynas i efo llenyddiaeth Gymraeg.

Ro’n i wedi teimlo cyn hynny fod rhyw bellter rhyngof fi a’r cymeriadau, ond roedd y bobol yn O Ddawns i Ddawns yn gig a gwaed, yn amherffaith ac felly’n hawlio sylw a chydymdeimlad. Dwi’n darllen O Ddawns i Ddawns o leia’ unwaith y flwyddyn ers bron i ugain mlynedd!
Roedd Mochyn Gwydr gan Irma Chilton hefyd yn ffefryn mawr. Mae’n fy synnu i’n fawr nad ydi’r nofel yma’n cael mwy o sylw, achos mae’n glasur, yn fy nhyb i.

2. Wyt ti’n dal i ddarllen llyfrau plant? Pa rai wyt ti wedi eu hoffi’n ddiweddar?
Dwi’n tueddu darllen llyfrau YA (Young Adult) yn fwy na llyfrau i oedolion. Ac mae gen i ddau o feibion, felly dwi’n darllen efo nhw. Mae Half-Brother gan Kenneth Oppel yn wirioneddol wych- hanes teulu sy’n mabwysiadu chimpanzee!  Dwi wrth fy modd efo Cyfres Clec, ac mae ‘na gyfrol o farddoniaeth dwi’n troi ‘nol ati dro ar ôl tro- Cerddi’r Cof, a olygwyd gan Mererid Hopwood.

3. Pwy ydi dy hoff ddylunydd/arlunydd llyfrau? Pam?
Ychydig flynyddoedd yn ôl, ges i’r cyfle i weithio efo Jac Jones. Roedd o’n gymaint o fraint! Ro’n i’n eitha’ star-struck o gwrdd a fo. Dwi’n meddwl  ei fod o’n portreadu emosiwn yn glir iawn yn ei gymeriadau- ‘da chi’n teimlo be’ maen nhw’n teimlo. Mi fedra i grwydro orielau celf mawr pwysig heb deimlo’r empathi mae gwaith Jac yn ei greu.

4. Be nath i ti ddechrau sgwennu?
Ro’n i ‘di bod yn gweithio fel actores, ac wedi rhoi’r gorau iddi pan ges i blant. Ro’n i wedi colli Mam pan roedd hi’n ifanc, ac roedd hi’n loes calon gen i feddwl na fyddai ‘mhlant i yn ei ‘nabod hi, felly mi ‘sgwennais i Trwy’r Darlun a Trwy’r Tonnau efo Mam yn brif gymeriad yn y nofelau. Ro’n i’n meddwl y byddai hynny’n ffordd dda o gyflwyno ei hiwmor a’i hanwyldeb i ‘mhlant. Mae fy mab hynaf yn darllen Trwy’r Darlun efo’i ddosbarth Cymraeg yn yr ysgol rŵan, sy’n deimlad rhyfedd a hyfryd iawn.

5. Be wyt ti’n ei fwynhau fwya am sgwennu?
Dwi’n meddwl mai dyma’r joban ora’ yn y byd! Dwi’n gallu ymgolli yn llwyr mewn bydoedd a phobol hollol newydd, yn gallu eistedd yn fy nghadair esmwyth yn y ty a mynd i bedwar ban byd heb symud cam. Mae’n fraint anhygoel pan fo rhywun yn codi un o fy llyfrau ac yn dechrau darllen, yn rhoi ei amser a’i meddwl i rywbeth dwi wedi ei greu.

6. Dwed chydig am Pluen, dy nofel ddiweddara i blant.

Mae Pluen yn nofel sy’n ymdrin a’r rhyfeloedd byd, ond o safbwynt modern a real iawn. Mae Huw, bachgen o Langefni, yn trio chwilio am hanes ei hen ewythr ar ôl yr ail ryfel byd. Ond mae’r nofel hefyd yn ymdrin a dementia. Mae hon yn nofel bersonol iawn i mi, ac ro’n i’n ei chael hi’n eitha’ anodd i’w ‘sgwennu ar brydiau. Ond yn y bon, dirgelwch hen ffasiwn sydd yn y stori, efo ‘chydig o dro yn y cynffon hefyd!

7. Pa lyfr(au) plant sydd ar y ffordd nesa gen ti?
Dwi wrthi’n sgwennu cyfres o lyfrau i blant bach, ac mae gen i nofel ar y gweill hefyd. Sgwennu i blant ydi ‘nghariad cynta’, heb os nag oni bai.

Diolch, Manon!

Cyfres Clec i blant 6+

Hwre! Mae ‘na ddau lyfr arall ar gael ar gyfer plant 6+ yn y gyfres Cyfres Clec gan Wasg Carreg Gwalch: Y Bws Hud/OMB a Gwely Haul/Pen-blwydd Hapus Anna a Hanna:

Mae’r gyfres gan wahanol awduron, felly bydd gwahanol lyfrau yn apelio at blant gwahanol. Dwy stori sydd ym mhob un hefyd, felly os na fyddwch chi’n hoffi un stori ryw lawer, efallai y byddwch chi’n hoffi’r llall! Neu, os ydach chi’n hoffi’r ddwy – pleser dwbwl amdani.

Dwi’m wedi cael cyfle i weld be ydi barn criw fy nheulu i am rhain eto, ond braf fyddai cael eich barn chi ( neu eich plant/disgyblion chi, os mai oedolion ydach chi) am y gyfres hon.

Ond yn bendant, os dach chi isio tynnu eu sylw at yr amgylchedd, llanast a sbwriel ac ati, mae stori cawr OMB – Orig Mwyn Benfawr, gan Eurgain Haf jest y peth.

Ond mae’n stori fach hyfryd am gawr sy’n wahanol i gewri eraill, hefyd. Hon oedd fy ffefryn i o’r pedair stori, yn bendant.

Mae’r Bws Hud yn llawn dychymyg hefyd, a lluniau Hannah Doyle yn siwr o godi gwên (sori, mae rhoi to bach ar ‘w’ yn boen ar y peiriant yma).

Haf Roberts ydi awdur y gyfrol arall, a bydd hanes Gwil Gwylan (gwylan glên sydd byth yn “plymio’n ddirybudd o’r awyr a dwyn sglodion a sos coch plentyn bach llwglyd”) yn handi iawn ar gyfer dysgu plant am ddaearyddiaeth Cymru, yn ogystal â rhoi gwers wyddoniaeth am yr haul.

Stori am efeilliaid cwbl wahanol i’w gilydd ydi’r ail stori ganddi. Mi fydd plant sydd unai’n hoffi neu’n casau pethau pinc yn chwerthin wrth ddarllen hon, dybiwn i.

£4.99 yr un – bargen am lyfrau gwreiddiol, Cymraeg!

O, a dyma restr gwerthwyr gorau llyfrau plant ar gyfer mis Hydref:

http://www.gwales.com/ecat/?sf_ecat_id=1104&tsid=3

6 llyfr gwreiddiol yn y 10 uchaf – da iawn!  Ac mae Pluen, nofel newydd Manon Steffan Ros ar gyfer plant 9-11 oed yn eu mysg.

Dwi’m wedi cael fy nwylo ar hon eto ond dwi’n ysu am wneud!